បុរសខ្លាំងពូទីនថា Sepp Blatter គួរតែឈ្នះពានរង្វាន់ណូបែល

2015-07-28 21:53:59
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Sepp Blatter ដែលជាប្រធានសហព័ន្ធបាល់ទាត់អន្តរជាតិ FIFA ត្រូវបានលោក Vladimir Putin ប្រធានាធិបតីរុស្ស៊ីកោតសរសើរថាជាមនុស្សល្អ គួរតែទទួលបានពានរង្វាន់ណូបែល មិនសមត្រូវគេចោទប្រកាន់ថាពុករលួយនោះទេ។

ក្នុងបទសម្ភាសន៍មួយនៅប្រទេសស្វីស លោកពូទីនបាននិយាយចំពោះអត្តចរិត និងការងារដែលលោក Sepp បានធ្វើកន្លងមកថា៖ "យើងគ្រប់គ្នាដឹងពីអ្វីដែលកើតឡើងចំពោះលោក Blatter ហើយ។ ខ្ញុំមិនចង់និយាយច្រើនទេ ប៉ុន្តែខ្ញុំមិនជឿថាគាត់ជាប់ពាក់ព័ន្ធរឿងពុករលួយឡើយ។ ខ្ញុំគិតថាមនុស្សដូច Blatter គឺកម្ររកបានណាស់ គាត់បានជួយផ្នែកកីឡាច្រើនដែលយើងនឹកស្មានមិនដល់។ អ្វីដែលគាត់ធ្វើគឺសក្ដិសមណាស់នឹងទទួលបានពានរង្វាន់ណូបែល”។

FIFA បានប្រកាសហើយថាព្រឹត្តិការណ៍ World Cup 2018 នឹងត្រូវធ្វើឡើងនៅប្រទេសរុស្ស៊ីដដែល បើទោះបីជាប៉ុន្មានខែចុងក្រោយនេះសហព័ន្ធបាល់ទាត់អន្តរជាតិមួយនេះ ត្រូវបានគេចោទប្រកាន់រឿងពុករលួយយ៉ាងណាក៏ដោយ។ ចំពោះទំនាក់ទំនងរវាងលោកពូទីន និង Sepp Blatter វិញ ត្រូវបានគេដឹងថាចាក់ទឹកមិនលិចនោះទេ ព្រោះថាពួកគេទាំងពីរនាក់នេះជាមិត្តភ័ក្ដិនឹងគ្នាជាយូរមកហើយ៕

ចុចអាន៖ អ្នកកំប្លែងអង់គ្លេស បាចដុល្លារក្លែងក្លាយដាក់ប្រធាន FIFA

ប្រែសម្រួល៖ មុន្នី រម្យ ប្រភព៖101greatgoals