ញ៉ាំអាហារប្រៃប៉ះពាល់សុខភាព តើគួរដោះស្រាយបែបណា?

2015-07-28 23:07:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបរិភោគអាហារប្រៃ ឬអាហារមានជាតិសូដ្យូមច្រើនពេក អាចបង្កបញ្ហាដល់សុខភាពជាច្រើន ដូចជាជំងឺបេះដូង ឬជំងឺដាច់សរសៃឈាមក្នុងខួរក្បាលជាដើម។ ដោយហេតុនេះ សហរដ្ឋអាមេរិកបានណែនាំឲ្យប្រជាពលរដ្ឋខ្លួន កំណត់របបអាហារឲ្យមានជាតិសូដ្យូមយ៉ាងច្រើនត្រឹម ២៣០០ មីលីក្រាម ក្នុង១ថ្ងៃ និង១៥០០មីលីក្រាមសម្រាប់មនុស្សចាស់អាយុលើសពី៥០ឆ្នាំ។

ដោយសារវាបង្កផលវិបាកដល់សុខភាព ដូចនេះ វិទ្យាស្ថានសុខភាពជាតិ និងការស្រាវជ្រាវនៃសាកលវិទ្យាល័យវេជ្ជសាស្ត្រ Feinberg សហរដ្ឋអាមេរិកបានណែនាំពីរបៀបមួយចំនួន ដើម្បីកាត់បន្ថយ សារជាតិសូដ្យូមក្នុងរបបអាហារ ដូចខាងក្រោម៖

១. ការធ្វើអាហារញ៉ាំដោយខ្លួនឯង

ការវិភាគមួយបានបង្ហាញថា អាហារដែលគេចម្អិនស្រាប់មួយពេលសម្រាប់ដាក់លក់ គឺមានផ្ទុកជាតិសូដ្យូម ដល់ទៅ១៣៥០ មីលីក្រាមទៅហើយ។ ដូចនេះការធ្វើអាហារញ៉ាំដោយខ្លួនឯងអាចបន្ថយហានិភ័យបានមួយកម្រិត និងប្រសើរជាងការទៅញ៉ាំនៅខាងក្រៅ។

២. ជ្រើសរើសផលិតផលចំណីអាហារណាដែលមានកម្រិតសូដ្យូមទាប

គប្បីជ្រើសរើសផលិតផលណាដែលមានគ្មានជាតិសូដ្យូម ឬកម្រិតជាតិសូដ្យូមទាប តាមរយៈការពិនិត្យមើលការបញ្ជាក់នៅលើប្រអប់ ឬសំបកផលិតផលទាំងនោះ។

៣. ជៀសវាងអាហារដែលសំបូរជាតិប្រៃពេក

បើអាចជៀសបាន ដូចជាអាហារមួយចំនួនដែលមានជាតិប្រៃច្រើន តួយ៉ាងស៊ុតចៀនប្រៃ ឬអាហារកំប៉ុងមួយចំនួន។ បើពុំចាំបាច់ ជៀសវាងការបន្ថែមជាតិប្រៃ ដូចជា ទឹកស៊ីអ៊ីវ ឬដុំម្សៅស៊ុប ក្នុងអាហារ ដើម្បីការពារសុខភាព។

៤. ញ៉ាំបន្លែ និងផ្លែឈើ

បន្លែ និងផ្លែឈើធម្មជាតិស្រស់ៗ គឺពុំមានជាតិសូដ្យូមទេ ហើយប្រសិនបើអ្នកចម្អិនបន្លែ ក៏គួរកុំបន្ថែមអំបិលច្រើនពេកដែរ៕

ចុចអាន៖ រកឃើញអំបិលមានជាតិពុល២ម៉ឺនតោននៅចិន

ប្រែសម្រួល៖ មាន រតនា ប្រភព៖usnews