ខេមរៈ ភូមិន្ទ រកឃើញទ្រនំ

2015-08-19 13:45:56
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបោះជំហានលើវិថីសិល្បៈជាច្រើនឆ្នាំមក វ៉ាត រ៉ាវី តារាសម្ដែងមានមុខមាត់ស្រដៀង ខេមរៈ សិរីមន្ត ហើយបានដាក់រហ័សនាមខ្លួនថា ខេមរៈ ភូមិន្ទ បច្ចុប្បន្នបានស្វែងរកទ្រនំឃើញហើយ ដោយលោកទើបតែចុះកុងត្រាធ្វើជា តារាចម្រៀងឲ្យផលិតកម្មថ្មីមួយ។

ផលិតកម្មដែលទទួល ភូមិន្ទ ទៅច្រៀងនោះមានឈ្មោះថា HD Production នេះបើតាមការរៀបរាប់របស់សាមីខ្លួនប្រាប់ Sabay ។ ភូមិន្ទ បានថ្លែងប្រាប់ថា លោកទើបតែចុះកុងត្រាឲ្យផលិតកម្ម HD កាលពីជាង១០ថ្ងៃមុននេះ ហើយកុងត្រាដែលចុះនោះមានរយៈពេល២ឆ្នាំ។ "ឥឡូវហ្នឹងខាង ផលិតកម្មកំពុងតែរៀបចំចម្រៀងឲ្យខ្ញុំច្រៀង គាត់ថា នឹងឲ្យខ្ញុំទៅហាត់ច្រៀងឆាប់ៗនេះ " ខេមរៈ ភូមិន្ទ បញ្ជាក់បន្ថែម ។

តារាដែលធ្វើខ្លួនត្រាប់តាម លោក ខេមរៈ សិរីមន្ត ជាច្រើនឆ្នាំមកនេះ បានលើកឡើងថា លោកពិតជាមានអារម្មណ៍ សប្បាយរីករាយជាខ្លាំង នៅពេលដែលបានក្លាយជាតារាចម្រៀងមានទ្រនំត្រឹមត្រូវបែបនេះ ត្បិតអីបំណងមួយនេះលោកប្រាថ្នាតាំងពីចូលសិល្បៈ ដំបូងមកម្ល៉េះ។

ខេមរៈ ភូមិន្ទ បានប្រលូកក្នុងវិស័យសិល្បៈជាច្រើនឆ្នាំមកហើយ ប៉ុន្តែការដើរលើវិថីនេះ តារាវ័យ២៦ឆ្នាំម្នាក់នេះ លូកមិនបានជ្រៅឡើយ ព្រោះជាប់រវល់នឹងការងារយោធា ដោយបច្ចុប្បន្នលោក គឺជាទាហានក្នុងកងកម្លាំងរក្សាសន្តិសុខរបស់ អង្គការសហប្រជាជាតិ។ បែបនេះក្ដី ភូមិន្ទ បានប្ដេជ្ញា ចិត្តថា ត្រូវតែឆ្លៀតពេល ដើម្បីអនាគត៕