តារា ៣ ដួង បញ្ជាក់រឿងសប្បុរសធម៌ដើម្បីយកមុខមាត់

2015-08-24 18:44:21
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លងមកធ្លាប់មានអ្នកសិល្បៈ និង មហាជនលើកឡើងស្រដៀងគ្នាថា តារាខ្មែរមួយចំនួនចូលចិត្ត ធ្វើបុណ្យទានជាមួយជនក្រីក្រ ដើម្បីតែសម្ញែងអ្នកដទៃយកប្រជាប្រិយភាពប៉ុណ្ណោះ ដែលមិនមែនកើតចេញពីសទ្ធាពិតប្រាកដនោះទេ។

សាវីន ហ្វីលីព បានអះអាងថា សកម្មភាពសប្បុរសធម៌របស់លោកកន្លងមក ចេញពីចិត្តពិតប្រាកដ មិនមែនដើម្បីប្រជាប្រិយភាពអ្វីនោះទេ។ លោកបន្ថែមថា៖ "មនុស្សភាគច្រើនបានដឹង និង ឃើញនូវអ្វី ដែលខ្ញុំកំពុងធ្វើហើយ។ ខ្ញុំត្រូវបានជ្រើសរើសជាឯកអគ្គរាជទូតសុឆន្ទៈរបស់អង្គការអន្តរជាតិមួយ"។

លោកបន្តថា មិនត្រឹមតែជនជាតិខ្មែរទេ សូម្បីតែជនបរទេសមួយចំនួនក៏បានចូលរួមសកម្មភាពជាមួយលោកដែរ។ លោកបានសង់អណ្ដូងទឹកស្អាតជាង ១០០ ហើយដល់អ្នកក្រីក្រនៅតាមខេត្តនានា។ ក្រៅពីនោះក៏បានជួយសង់ផ្ទះដល់ស្ត្រីមេម៉ាយ, ចាស់ជរា កុមារក្រីក្រ និង វត្តអារាមជាដើម។ លោកថា មិនខ្វល់ចំពោះការលើកឡើងនោះទេ។

ស្រដៀងគ្នានេះដែរ តារាសម្ដែង អេន យ៉ាដាវ បានអះអាងថា កន្លងមកក៏ធ្លាប់បាន រងការរិះគន់លើបញ្ហានេះដែរ ប៉ុន្តែ នាងគិតថា ជាសិទ្ធរបស់អ្នកនិយាយប៉ុណ្ណោះ។ “ខ្ញុំមិនបានសម្ញែងបុណ្យនោះទេ តែជាទឹកចិត្តសប្បាយរីករាយនៅពេលបានធ្វើអំពើល្អចំពោះអ្នកក្រ។ ខ្ញុំចង់ឱ្យពួកគាត់មានទឹកចិត្តចូលរួមដែរ"។ យ៉ាដាវ បញ្ជាក់ដូច្នេះ។ ម្ចាស់ហាងសាឡនបន្តថា ធ្វើទានដល់អ្នកក្រីក្រជារឿយៗដោយមិនកំណត់ទីកន្លែងនោះទេ អាស្រ័យលើលទ្ធភាពមាន។

ពាក់ព័ន្ធទៅនឹងបញ្ហានេះដែរ តារាសម្ដែង និង បង្ហាញម៉ូដ សាយ សៀរ៉ា ឯណេះវិញ ក៏ធ្លាប់បានលើកឡើងដែរថា រូបគេជួយអ្នកក្រមិនមែន ដើម្បីមុខមាត់ទេ ប៉ុន្តែជាជំនួយដោយសុទ្ធចិត្ត។ សៀរ៉ា បន្តថា៖"ខ្ញុំសូមប្រាប់ទៅបងប្អូនទស្សនិកជនថា ខ្ញុំធ្វើនេះមិនមែនដើម្បីយកមុខយកមាត់ទេ តែនេះជាទឹកចិត្តរបស់ខ្ញុំដែលបានឃើញមនុស្សរាងខ្សត់ខ្សោយជាង មិនថាចាស់ឬក្មេងទេ"។ សៀរ៉ា ក៏ធ្លាប់ជាកូនអ្នកដែរ ដែលយល់ច្បាស់ពីអារម្មណ៍បែបនេះ៕