តារាល្បីៗនិយាយអ្វីខ្លះពីសាលាបណ្ដុះបណ្ដាលភាពយន្តកម្ពុជា?

2015-08-25 21:03:20
ចំនួនមតិ 0 | ចំនួនចែករំលែក 0

ចន្លោះមិនឃើញ

សាកលវិទ្យាល័យភូមិន្ទវិចិត្រសិល្បៈ បានបើកសាលាបណ្ដុះបណ្ដាលតារាភាពយន្តកម្ពុជា ដែលទើបបើកបង្រៀនជំនាញសម្ដែងភាពយន្តដំបូងបំផុតនៅកម្ពុជា បានធ្វើឲ្យតារាល្បីៗជាច្រើនបានបង្ហាញពីទស្សនៈវិជ្ជមាន និង សាទរនឹងវត្តមានកន្លែងបង្ហាត់ដ៏ពោរពេញដោយសាស្ត្រាចារ្យ ដែលមានបទពិសោធន៍យូរឆ្នាំ។ ដូចនេះកុំបង្អង់មកស្ដាប់ តារាល្បីៗ ថា តើពួកគាត់បាននិយាយអ្វីខ្លះពីសាលាភាពយន្តនោះ៖

លោក ហម ឈរ៉ា តារាសម្ដែងជើងចាស់តាំងពីទសវត្សរ៍ ៨០ បានឲ្យដឹងថា លោកពិតជាមានអារម្មណ៍សប្បាយរីករាយជាខ្លាំងដែលស្រុកខ្មែរមានសាលាបែបនេះ។ "ត្បិតខ្ញុំជាតារាដែលមានបទពិសោធន៍សម្ដែងជាង ២០ ឆ្នាំមកហើយក៏ពិតមែន តែប្រសិនបើមានឱកាសខ្ញុំនឹងចូលសាលា។ អ្វីដែលសម្ដែងកន្លងមក គឺជា ទេពកោសល្យពីធម្មជាតិមែន តែក៏ត្រូវការការហាត់រៀនបន្ថែមទៀតដែរ”។

ចំណែកឯកញ្ញាសាច់សកម្ពស់បាន ម៉ាក សែនសូនីតា ក៏បានបង្ហាញពីជំហរមិនចាញ់រៀមច្បងខាងលើប៉ុន្មានដែរ។ តែតួឯកស្រីក្នុងរឿងបងទុំ អូនទាវ ២០១៥ បានប្រាប់ថា៖ "ខ្ញុំគាំទ្រពេញទំហឹងចំពោះវត្តមានសាលានេះ ព្រោះធ្វើឲ្យប្អូនៗជំនាន់ក្រោយដែលមានបំណងប្រឡូកក្នុងវិស័យសិល្បៈបានរៀនសូត្រពីមូលដ្ឋានគ្រឹះខាងក្រោម។ តែទោះជាមានឱកាសក៏ខ្ញុំអត់ទៅរៀនទៀតដែរ ព្រោះមុនចូលសិល្បៈខ្ញុំបានចូលហ្វឹកហាត់តាមក្លិបបណ្ដុះបណ្ដាលបែបនេះច្រើនមកដែរហើយ”។

រីឯកំលោះសង្ហាបែបខ្មែរអង្គរ លោក ញ៉ែម សុគន្ធ ក៏បានឲ្យដឹងថា៖ "ការបង្កើតសាលាបណ្ដុះបណ្ដាលតារាភាពយន្តកម្ពុជានេះឡើង គឺកំពុងតែបង្កើនវិស័យសិល្បៈខ្មែរឲ្យរីកដុះដាលកាន់តែមានភាពទូលំទូលាយជូនដល់យុវជនជំនាន់ក្រោយ។ មិនត្រឹមតែប៉ុណ្ណោះសាលានេះក៏ជួយជាដើមទុនមួយដែលជាជំនួយដល់ប្អូនសម្រាប់ចូលប្រឡូកក្នុងវិស័យសិល្បៈផងដែរ នៅពេលនោះហើយគឺអាចធ្វើឲ្យពួកគាត់កាន់តែចង់ចូលរៀននៅសាលានោះកាន់តែច្រើន”។ ជាចុងក្រោយ ញ៉ែម សុគន្ធ បានបញ្ជាក់ថាលោកនឹងទៅចុះឈ្មោះដើម្បីរៀនជំនាញផ្សេងៗបន្ថែមទៀត៕

អត្ថបទ៖ទ្រី រ៉ាវី