មានគេលួចចម្លងបទរបស់បេក្ខភាព "ស្ដាប់ចម្រៀងរបស់ខ្ញុំ" ខណៈត្រៀមចេញ MV

2015-08-31 17:12:41
ចំនួនមតិ 0 | ចំនួនចែករំលែក 0

ចន្លោះមិនឃើញ

សាំង សុខសេរី អតីតបេក្ខភាពកម្មវិធី "ស្ដាប់ចម្រៀងរបស់ខ្ញុំ" ឬ "Hear My Song 2014” បានប្រាប់ថា បទចម្រៀងរបស់នាងដែលបានដាក់ប្រឡងក្នុងកម្មវិធីខាងលើ ត្រូវបានគេលួចចម្លង ខណៈត្រៀមចេញវីដេអូចម្រៀងផ្លូវការ(MV)។

"គេជាតារាចម្រៀងមួយរូបដែរ ហើយគេបានលួចយកបទខ្ញុំធ្វើកម្មសិទ្ធិផ្ទាល់ខ្លួន។ បទខ្ញុំហ្នឹង អា Lyric កន្ទុយគេយកទាំងអស់ អាកណ្ដាល ទាំង Melody និង Lyric ក៏របស់ខ្ញុំទាំងអស់ដែរ គ្រាន់តែគេប្ដូរពីមុខមកក្រោយ ពីក្រោយមកមុខ ហើយគាត់ធ្វើជារបស់គាត់"។

សាំង សុខសេរី អតីតបេក្ខភាពកម្មវិធី "ស្ដាប់ចម្រៀងរបស់ខ្ញុំ" និងជាម្ចាស់បទ "ពន្លឺ"

ដំណឹងនេះ ដើមឡើយ សេរី មិនដឹងទេ ប៉ុន្តែមានអ្នកគាំទ្រនាងមួយចំនួន បានផ្ដល់មកអោយ។ ជាមួយគ្នានោះពួកគេ(អ្នកគាំទ្រ) បានចូលទៅ Comment ស្ដីអោយអ្នកលួចចម្លងបទគេរូបនោះទៀតផង។ យ៉ាងណា តារាចម្រៀងរ៉េបវ័យក្មេងរូបនេះ បន្តថា នាងមានការតូចចិត្តនូវអ្វីដែលតារាចម្រៀងដែលនាងសុំមិនទាន់បញ្ចេញឈ្មោះនោះបានធ្វើ ខណៈប្រតិកម្មរបស់នាងមានប្រសិទ្ធភាពតិចតួច។

សេរី លើកឡើងថា "ខ្ញុំបានទាក់ទងទៅហើយ ដំបូងគេសុំទោស និងថាចេញមុខសុំទោសខ្ញុំជាសាធារណៈតាមវិទ្យុអី តែមកដល់ឥឡូវ គឺគេអត់បានធ្វើ មិនត្រឹមប៉ុណ្ណឹង គេបាន Block គណនីខ្ញុំចោលទៀត ហើយដូរគណនីយូធូបរបស់គេពី Real Life ទៅ Original Songទៀត"។

ដោយសារតែបែបនេះ នាង បានធ្វើបទចម្រៀង Rap មួយទៀត មានចេតនាថាអោយបុរសរូបនោះ ស្រាប់តែគេបានយកបទហ្នឹងទៅទៀត។ "ដល់អីចឹងខ្ញុំហួសចិត្តហ្មង ប្រហែលជាគាត់ស្រឡាញ់ការសរសេរ Lyric របស់ខ្ញុំពេកមើលទៅ។ មិនត្រឹមប៉ុណ្ណឹង គាត់នៅមកគំរាមខ្ញុំថា បើនៅតែធ្វើបទថាអោយគាត់ គាត់នឹងយកបទហ្នឹងឡើងច្រៀងលើទូរទស្សន៍ MyTV, CTN អីដើម្បីឲ្យគេគ្រប់គ្នាថាបទហ្នឹងរបស់គាត់ទៀត ដល់អីចឹងខ្ញុំអស់អីនិយាយហ្មង"។

បទចម្រៀងរ៉េប “ពន្លឺ" ត្រូវបានផលិតឡើងអំឡុងឆ្នាំ ២០១២ មុនពេលម្ចាស់បទ យកមកដាក់ប្រឡងក្នុងកម្មវិធី "ស្ដាប់ចម្រៀងរបស់ខ្ញុំ" ឬ "Hear My Song 2014”។ បន្ទាប់ពីផ្ដើមមានប្រជាប្រិយតាមរយៈកម្មវិធីនេះ "ពន្លឺ" ក៏ត្រូវបានគេលួចចម្លងតែម្ដង។ នេះបើតាមម្ចាស់បទ។

យោងតាមលក្ខខណ្ឌរបស់កម្មវិធី រាល់បទដែលចូលរួមប្រឡង នឹងត្រូវបានការការពារពីការលួចចម្លងព្រោះបទទាំងនោះបានទទួលស្គាល់ដោយក្រសួងព័ត៌មានរួចហើយ។ ដូច្នេះពាក់ព័ន្ធករណីខាងលើ លោក សុខ សិរីសុភា មន្ត្រីគម្រោង បានប្រាប់ថា លោកបានទំនាក់ទំនងបឋមទៅបុរសរូបនោះរួចហើយ។ លោក ថ្លែងថា "គេបានទទួល...គឺគាត់ថាបាន Cover អីចឹងហើយគាត់បានប្រាប់ទៀតថា គេនឹងប្រកាសប្រាប់គ្រប់គ្នាថា បទនេះមិនមែនជាបទគាត់ទេ"។

មន្ត្រីគម្រោងដដែល បញ្ជាក់ថា ក្រុមការងារចាំសង្កេតមើលទៀតថា តើតារាចម្រៀងរូបនោះ ធ្វើសកម្មភាពអ្វីទៀតឬអត់ មុនពេលបញ្ចេញប្រតិកម្មបន្តបន្ទាប់ទៀត។

ទោះមានបញ្ហាដូចខាងលើ សាំង សុខសិរី បទចម្រៀងរ៉េប មានចំណងជើងថា "ពន្លឺ" របស់នាង គ្រោងនឹងចេញវីដេអូចម្រៀង(MV)ផ្លូវការក្នុងរង្វង់ខែកញ្ញានេះ ៕

អត្ថបទ៖ ទារិកា