ខាន់ ឈិត ចង់ល្បីដូច ខាន់ ជែមស៍

2015-09-01 13:11:21
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ខាន់ ឈិត តារាចម្រៀងតាមអកកេះ ដែលមានមុខមាត់ស្រដៀងទៅនឹង លោក ខាន់ ជែមស៍ បានថ្លែងប្រាប់ថា បច្ចុប្បន្នលោកកំពុងតែស្វែងរកទ្រនំជ្រក ដើម្បីឲ្យបានក្លាយទៅជាតារាចម្រៀងល្បីដូចលោក ខាន់ ជែមស៍។

ខាន់ ឈិត មានឈ្មោះពិតថា ស៊ន សឿម មានកំណើតមកពីខេត្ត បាត់ដំបង បច្ចុប្បន្នមានវ័យ២៧ឆ្នាំ។ដោយសារតែស្រលាញ់សិល្បៈ ខាន់ ឈិត បានផ្ញើខ្លួនលើវិថីមួយនេះជិត១០ឆ្នាំមកហើយ តាមរយៈការច្រៀងអកកេះ នៅតាមរោងការ ក៏ដូចជា តាមខនសឺត តាមបណ្ដាខេត្តនានា។ បទចម្រៀងដែលលោកច្រៀងភាគច្រើន ជាបទរបស់ លោក ខាន់ ជែមស៍ ។

ដោយមាន មុខមាត់ស្រដៀង លោក ខាន់ ជែមស៍ ហើយចូលចិត្តតុបតែងខ្លួនតាមផង ពេលចេញច្រៀងម្ដងៗ តែងតែមានទស្សនិកជនមួយចំនួនច្រឡំលោកថាជា ខាន់ ជែមស៍ មិនតិចនោះឡើយ។ " ការពិតខ្ញុំគ្មានជាប់សាច់ឈាមជាមួយបង ជែមស៍ អីទេ តែមុខមាត់ខ្ញុំស្រដៀងគ្នា ក៏ដាក់ឈ្មោះ ឲ្យស៊ីគ្នាដែរទៅ មានគេច្រឡំច្រើនតើ! ។" ខាន់ ឈិត បញ្ជាក់បន្ថែម។

ក្រៅពីច្រៀងអកកេះតាមរោងការ និង ខនសឺតតាមបណ្ដាខេត្ត ជារឿយៗ ខាន់ ឈិត តែងតែត្រូវបានស្ថានីយទូរទស្សន៍ក្នុងស្រុកជាច្រើនហៅឡើងច្រៀងផងដែរ។ តារាចម្រៀងមានកំណើតមកពីខេត្តបាត់ដំបងម្នាក់នេះ ប្រាប់ថា លោកធ្លាប់ឡើងច្រៀងស្ទើរគ្រប់ស្ថានីយទូរទស្សន៍ទាំងអស់ ប៉ុន្តែមួយរយៈនេះរាងស្ងាត់បន្តិច។

តារារូបនេះ បានព្យាយាមស្វែងរកផលិតកម្មចូលជាច្រើនលើកមកហើយ ប៉ុន្តែមិនទាន់មានផលិតកម្មណាមួយ សម្រេចចិត្តទទួលលោកជាផ្លូវការនៅឡើយ ពោលគឺបានត្រឹមតែសុំពេលពិចារណាសិនប៉ុណ្ណោះ។ ទោះជាបែបនេះក្ដី ក៏មិនអាចបង្អាក់ទឹកចិត្តលោកឡើយ ផ្ទុយទៅវិញលោកបានថែមទាំងព្យាយាមផលិតបទចម្រៀងផ្ទាល់ខ្លួនបានមួយចំនួនថែមទៀតផង ។ "ឥឡូវហ្នឹង ខ្ញុំធ្វើបទខ្លួនឯងបាន២បទហើយ តែ MP3 ទេ គឺបទ "បួសសងគុណម្ដាយ " និងបទ "ស្រណោះខ្នងភ្នំបាខែង" ធ្វើលេងទៅបង ក្រែងមានផលិតកម្មណាគេចាប់អារម្មណ៍"។