ស្គាល់សិស្សពូកែនិន្ទេសAទាំង ៧ រូប នៅខេត្តបាត់ដំបងទេ?

2015-09-14 22:47:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញនេះ លទ្ធផលនៃការប្រឡងសញ្ញាប័ត្រមធ្យមសិក្សាទុតិយភូមិបានប្រកាសផ្លូវការចំពោះលទ្ធផលតាមបណ្ដាខេត្តនានា ឃើញថា ចំនួនសិស្សដែលប្រលងជាប់មានការកើនឡើងជាងឆ្នាំមុន រួមទាំងអ្នកទទួលបាននិន្ទេស Aល្អប្រសើរ ក៏កើនពី១១នាក់ដល់ទៅ ១០៨ នាក់ដែរ នៅឆ្នាំនេះ។ ក្នុងចំណោមសិស្សឆ្នើមទាំង ១០៨ រូបនោះ មាន៤៨នាក់មកពីភ្នំពេញ ១៤ នាក់មកពីសៀមរាប និង ៧ នាក់ មកពីខេត្តបាត់ដំបង។ សិស្សពូកែទាំង៧ រូបនោះ មាន៥នាក់ជាសិស្សនៅក្នុងក្រុងបាត់ដំបង និង ២នាក់ទៀតជាសិស្សមកពីស្រុក។ពួកគេមានទាំងសមត្ថភាពដ៏ខ្លាំងពូកែ និងមានរូបសម្ផស្សស្រស់ស្អាតថែមទៀត។

តើអ្នកទាំងអស់គ្នាស្គាល់ពួកគេដែរឬទេ? តោះ! ទៅមើលរូបភាព និង ពត័មានខ្លះៗអំពីពួកគេ

១. កញ្ញា អ៊ូង មុនីរាសី

ទាំងស្អាត និង ពូកែ កញ្ញា អ៊ូង មុនីរាសី ជាសិស្សថ្នាក់ទី១២ ”M” នៃវិទ្យាល័យព្រះមុនីវង្ស ទទួលបានលំដាប់ពិន្ទុខ្ពស់ជាងគេនៅខេត្តបាត់ដំបងគឺ ៩៩.៩៨១។ កញ្ញាជាកូនពៅ នៃគ្រួសារមួយ ដែលប៉ា និង ម៉ាក់ជាវេជ្ជបណ្ឌិត។ ដោយមានបំណងចង់ក្លាយជាវេជ្ជបណ្ឌិតឯកទេសផ្នែកសម្ភព និង រោគស្រ្តី កញ្ញានឹងចូលរៀននៅសកលវិទ្យាល័យសុខាភិបាលនៅក្រុងភ្នំពេញ ហើយក៏មានបំណងប្រាថ្នាចង់បានអាហាររូបករណ៍ទៅសិក្សានៅក្រៅប្រទេសផងដែរ។

២. យុវជន ថាច័ន្ទ សុផាន់ប៊ុនថង

សិស្សពូកែនិន្ទេស A លេខពីរនៅខេត្តបាត់ដំបងគឺ យុវជន ថាច័ន្ទ សុផាន់ប៊ុនថង ដែលជាសិស្សនៃថ្នាក់ទី១២ ”M” នៃវិទ្យាល័យព្រះមុនីវង្ស ហើយយុវជនរូបនេះ បានទទួលលំដាប់ពិន្ទុ ៩៩.៩៤៩។ នៅក្នុងគ្រួសារដែលមានបងប្អូន ៤ នាក់ និង ឪពុក-ម្តាយ ជាអ្នកលក់ដូរ យុវជនដែលជាកូនពៅគេក្នុងគ្រួសារនេះ បានឲ្យដឹងថា រូបគេនឹងចូលរៀននៅសកលវិទ្យាល័យដោយចាប់យកជំនាញស្ថាបត្យកម្ម។

៣. កញ្ញា ប្រសិត លក្ខណា

កញ្ញា ប្រសិត លក្ខណា ជាសិស្សនៃវិទ្យាល័យថ្មគោលនៅឆ្ងាយពីក្រុងបាត់ដំបងជាច្រើនគីឡូម៉ែត ប៉ុន្តែ ទទួលបានលំដាប់ពិន្ទុខ្ពស់ជាងគេលំដាប់ទី ៣ នៅខេត្តបាត់ដំបង។

៤. កញ្ញា គង់ មាសមល្លិកា

សិស្សពូកែនិន្ទេស A ដែលទទួលបានលំដាប់ពិន្ទុខ្ពស់លំដាប់ទី ៤ គឺ កញ្ញា គង់ មាសមល្លិកា ជាសិស្សនៃវិទ្យាល័យ អេសអូអេសហៃម៉ាន់ម៉ៃន័រ បាត់ដំបង។ យុវតីរូបនេះបានឲ្យដឹងថាខ្លួននឹងរៀនបន្តផ្នែកវេជ្ជសាស្ត្រ។

៥. យុវជន អ៊ន ឌីដាណាក់

ត្រឡប់មកវិទ្យាល័យព្រះមុនីវង្សម្តងទៀត យុវជនអ៊ន ឌីដាណាក់ ជាសិស្សថ្នាក់ទី ១២P និង តែងទទួលបានលទ្ធផលល្អក្នុងការសិក្សា ហើយជាសិស្សពូកែនិទ្ទេស A ទទួលបានលំដាប់ពិន្ទុ ៩៩.៩២៨ ។ យុវជនរូបនេះជាកូនទីបីក្នុងគ្រួសារ ដែលមានបងប្អូន ៥ នាក់ ឪពុកជាជាងឡាន និង ម្តាយជាមេផ្ទះ ហើយនឹងបន្តការសិក្សានៅក្រុងភ្នំពេញ ដោយចាកយកជំនាញជាវិស្វករ នាងពេលឆាប់ៗនេះ។

៦. កញ្ញា ភួង រតនលី

សិស្សពូកែនិន្ទេស A ដែលមិនមែនជាសិស្សនៅក្នុងវិទ្យាល័យក្នុងក្រុងបាត់ដំបងគឺ កញ្ញា ភួង រតនលី។ យុវតីដែលមើលទៅស្រគត់ស្រគំរាបសាររូបនេះ ទទួលបានលំដាប់ពិន្ទូ ៩៩.៩០០ និង ជាសិស្សនៅវិទ្យាល័យពេជ្យចិន្តា ថ្នាក់ទី១២A។ ចំពោះការសិក្សាបន្តទៅមុខទៀត រតនលី នៅមិនទាន់ប្រាកដថា នឹងជ្រើសរើសមុខជំនាញអ្វីនៅឡើយ។

៧. កញ្ញា សួគ៌ កែវពិព័ណ

ចុងក្រោយគេ គឺកញ្ញា សួគ៌ កែវពិព័ណ ជាសិស្សថ្នាក់ទី ១២M នៃវិទ្យាល័យព្រះមុនីវង្ស។ ជាកូនច្បងនៅក្នុងគ្រួសារដែលមានជីវភាពមធ្យម កញ្ញា ដែលមានស្នាមញញឹមស្រស់ស្អាតនេះ ស្ថិតនៅក្នុងការពិចារណានៅឡើយចំពោះជំនាញពីរផ្សេងគ្នា គឺទាក់ទងនឹងខាងបរិស្ថាន ឬបច្ចេកទេសនៅសាលាតិចណូ៕

មានអត្ថបទថ្មី និង ប្លែកៗ កើតមានគ្រប់ទីកន្លែង ប្រិយមិត្តចង់រាយការណ៍ ឬ ចង់ឲ្យ Sabay ចុះផ្សាយ សូមទំនាក់ទំនងតាម៖

-ទូរសព្ទ៖ 012 567 8 82 -អ៊ីមែល៖ Chip.chet@cidc.com.kh -លេខទូរសព្ទ៖ 099 588 880 -អ៊ីមែល៖ bin.bunna@cidc.com.kh

ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ!

អត្ថបទ៖ ហួន ទីណារ័ត្ន