សាវីន ហ្វីលីព ស្រក់ទឹកភ្នែកពេលឃើញក្បួនផ្សព្វផ្សាយកុនថៃ

2015-09-22 21:14:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយភ្ជាប់នូវរូបភាពក្បួនផ្សព្វផ្សាយភាពយន្តថៃរបស់ទូរទស្សន៍ក្នុងស្រុកមួយផងនោះ លោក សាវីន ហ្វីលីព បានបង្ហាញអារម្មណ៍សោកសៅលើគណនី Facebook ថា លោកគ្មានអ្វីត្រូវនិយាយទៀតទេ ខណៈឃើញភាពយន្តថៃកំពុងរាលដាលគ្រប់ទីកន្លែងទូទាំងប្រទេសកម្ពុជា សូម្បីតាមស្ថានីយទូរទស្សន៍នានា។

តារាសម្ដែងរូបនេះ បានសរសេរក្នុងអត្ថន័យជាភាសាអង់គ្លេសបកជាខ្មែរថា៖ "ទឹកភ្នែករបស់ខ្ញុំបានស្រក់ចុះ ពេលឃើញភាពយន្តថៃទាំងនេះ ធ្វើសកម្មភាពផ្សព្វផ្សាយនៅទីក្រុងដូចរូបថតបានភ្ជាប់ជួន..... ព្រោះភាពយន្តខ្មែរនឹងស្លាប់ទៅឆាប់ៗ។ តើខ្មែរដែលមានទេពកោសល្យទាំងអស់នឹងរស់នៅបែបណាវិញ? ជាពិសេស សិល្បករ-សិល្បការិនី ដែលចិញ្ចឹមជីវិតដោយសិល្បៈ"។

ឯកអគ្គរាជទូតសុឆន្ទៈមូលនិធិអង្គការ CGF រូបនេះបន្ថែមទៀតថា ក្នុងនាមតារាសម្ដែងកម្ពុជា ១ រូប លោកមានការសោកស្ដាយចំពោះរឿងនេះ និងកំពុងស្វែងរកជំនួយពីរាជរដ្ឋាភិបាល ដើម្បីមានចំណាត់ការណាមួយពាក់ព័ន្ធទៅនឹងបញ្ហាលើកឡើង ក្នុងការថែរក្សាវប្បធម៌ និងសិល្បៈ។ ជាពិសេស ភាពយន្តផ្ទាល់ខ្លួនរបស់ជាតិខ្មែរយើង។

ទោះបីជាយ៉ាងណា Sabay មិនអាចស្វែងរកការបញ្ជាក់បន្ថែមពីតារាសម្ដែងខាងលើនោះទេ ខណៈទូរសព្ទរបស់លោកមិនអាចទាក់ទងបាន។ ប៉ុន្តែកន្លងមក លោកមានប្រតិកម្មជារឿយៗពាក់ព័ន្ធទៅនឹងការចាក់ផ្សាយទូរទស្សន៍ស្ទើរទាំងអស់ក្នុងប្រទេសកម្ពុជា ដែលធ្វើឱ្យភាពយន្តខ្មែរប្រឈមនឹងការគំរាមកំហែង ឬចុះខ្សោយ។

ថ្មីៗនេះសមាគមភាពយន្តកម្ពុជា និង សមាគមសិល្បករខ្មែរ ក៏បានធ្វើលិខិតរួមគ្នាមួយ ផ្ញើជូនប្រមុខរាជរដ្ឋាភិបាល ដើម្បីជួយអន្តរាគមន៍រួចហើយដែរពាក់ព័ន្ធទៅនឹងការចាក់បញ្ចាំងកុនបរទេសនៅក្នុងម៉ោងមាសតាមបណ្ដាស្ថានីយទូរទស្សន៍នានាក្នុងស្រុក។ ប្រធានសមាគមភាពយន្តកម្ពុជា ឆាយ បូរ៉ា បានអះអាងថា លិខិតនោះក៏បានចម្លងជួនក្រសួងវប្បធម៌ និងវិចិត្រសិល្បៈ និង ក្រសួងព័ត៌មានផងដែរ។ ទោះបីជាយ៉ាងណា ពេលនេះលោកកំពុងរង់ចាំទទួលការឆ្លើយតបពីខុទ្ទកាល័យសម្ដេចនាយករដ្ឋមន្ត្រីនៅឡើយ៕

អានអត្ថបទ៖ ភិន សុដាលីស និង ប៉ែន ចំរុង នាំគ្នាទៅចុះអេតាស៊ីវិលត្រៀមរស់នៅជុំគ្នា

អានអត្ថបទ៖ បេក្ខភាព Cambodian Idol ម៉ៅ ហាជី៖ “ខ្ញុំមិនមែនជាមនុស្សវាយឫកទេ”