U-18 ក្រោនទទួលក្រុមខ្លាំងមកពីជប៉ុន Kashima Antlers ម៉ោង៦ល្ងាចនេះ
- 2015-10-14 15:00:55
- ចំនួនមតិ 0 | ចំនួនចែករំលែក 0
U-18 ក្រោនទទួលក្រុមខ្លាំងមកពីជប៉ុន Kashima Antlers ម៉ោង៦ល្ងាចនេះ
ចន្លោះមិនឃើញ
ក្រុមយុវជនអាយុក្រោម១៨ឆ្នាំ(U-18)ភ្នំពេញក្រោនដល់ពេលបើកទ្វារកីឡដ្ឋាន RSN របស់ខ្លួនទទួលស្វាគមន៍ក្រុមខ្លាំងមកពីប្រទេសជប៉ុន Kashima Antlers ហើយវេលាម៉ោង៦ល្ងាចនេះនៃពានរង្វាន់ Asia Champions Trophy សម្រាប់ជើងទីពីរដែលផ្សាយផ្ទាល់ដោយទូរទស្សន៍ BTV។
ក្នុងពានរង្វាន់នេះ យុវជនភ្នំពេញក្រោន ឆ្លងកាត់៤ប្រកួតហើយក្នុងនោះស្មើ៣ និងចាញ់១ ប៉ុន្តែមិនទាន់ស្គាល់ជ័យជម្នះម្តងណាឡើយពោលគឺលើកទី១ ចាញ់ក្រុមខ្លាំងជប៉ុន Kashima Antlers នៅក្រៅដីដោយលទ្ធផល ៥-០ និងស្មើក្រុមម៉ាឡេស៊ី Frenz United B នៅក្នុងដីខ្លួនឯង ១-១ ហើយបន្តស្មើក្រុមនេះនៅទឹកដីម៉ាឡេស៊ី២-២។ ភ្នំពេញក្រោនបានធ្វើដំណើរទៅប្រកួតស្មើនឹងម្ចាស់ផ្ទះវៀតណាម PVF ដោយលទ្ធផល ២-២ ទៀត។ ប្រកួតបញ្ចប់ជម្រុះក្នុងពូល ភ្នំពេញក្រោន ត្រូវទទួលភ្ញៀវ PVF នៅថ្ងៃទី២២ ខែតុលា ខាងមុខ។
ចំណែកយុវជនជើងខ្លាំងប្រចាំប្រទេសជប៉ុន Kashima Antlers ក៏ឆ្លងកាត់៤ប្រកួតដែរ និងស្គាល់បរាជ័យ១លើកដូចភ្នំពេញក្រោនដែរ ប៉ុន្តែស្គាល់ជោគជ័យ៣លើក។ Kashima Antlers បានចាញ់ក្រុមម៉ាឡេស៊ី Frenz United B ដោយលទ្ធផល ២-១ នៅក្រៅដី ប៉ុន្តែឈ្នះក្រុមវៀតណាម PVF ទាំងពីរជើងគឺក្នុងដី៣-១ និងក្រៅដី ១-០ ព្រមទាំងឈ្នះភ្នំពេញក្រោនក្នុងដី៥-០។ ប្រកួតបញ្ចប់ក្នុងពូល យុវជនជប៉ុននេះត្រូវទទួលស្វាគមន៍ក្រុមដែលខ្លួនបរាជ័យគឺ Frenz United B នៅថ្ងៃទី២២ ខែតុលា។
តាមប្រភពព័ត៌មានពីភ្នំពេញក្រោនបានឲ្យដឹងថា សមាជិក៤នាក់របស់ក្រុម Kashima Antlers បានដាក់បញ្ចូលទៅក្រុមធំ Kashima សម្រាប់លេងក្នុងក្របខណ្ឌបាល់ទាត់កំពូលជប៉ុន (J-League)។ ពួកគេសុទ្ធតែយុវជនឆ្នើមដែលជាអនាគតដ៏ល្អសម្រាប់ជម្រើសជាតិជប៉ុន។
សម្រាប់ការប្រកួតថ្ងៃនេះ អ្នកទស្សនាដែលបានទៅមើលផ្ទាល់នឹងមានឱកាសឈ្នះរង្វាន់ជាច្រើនដូចជាទូរសព្ទទំនើប iPhone 6 ចំនួន១រង្វាន់ កាត់ទូរសព្ទ Smart (១០ដុល្លារ)ចំនួន១៥រង្វាន់ និងអាវយឹតរបស់ភ្នំពេញក្រោនចំនួន៤រង្វាន់។
ពានរង្វាន់នេះនៅក្នុងពូល B ក្រុមជើងខ្លាំងជប៉ុននេះបានឆ្លងកាត់៤ប្រកួតហើយគឺឈ្នះ៣ និងស្មើ១។ កាលពីជើងទីមួយនៅលើទឹកដីជប៉ុន ក្រុមភ្នំពេញក្រោនបានចាញ់ដោយលទ្ធផល ៥-០។ ចុះជើងទីពីរនៅក្នុងដីរបស់ខ្លួន យុវជនភ្នំពេញក្រោនអាចធ្វើបានល្អទេ?