ប៊ូយ ដារី មានមោទនភាពដែលU-18ក្រោនប្រកួតនឹងក្រុមខ្លាំងមកពីជប៉ុន

2015-10-17 00:01:54
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូបង្វឹកក្រុមយុវជនភ្នំពេញក្រោនអាយុក្រោម១៨ឆ្នាំមានអារម្មណ៍សប្បាយចិត្ត និងមោទនភាពដែលក្រុមរបស់លោកបានប្រកួតនឹងក្រុមខ្លាំងមកពីប្រទេសជប៉ុន Kashim Antlers កាលពីថ្ងៃទី១៤ ខែតុលាកន្លងទៅនេះ ទោះជាក្រុមរបស់លោកចាញ់២-០ នៃពានរង្វាន់ U-18 Asia Champions Trophy 2015។

លោកគ្រូបង្វឹក ប៊ូយ ដារី បានប្រាប់ Sabay ថា ក្រុមមួយខ្លាំងទៅបានអាស្រ័យការហ្វឹកហាត់ និងប្រកួតជាមួយដៃគូខ្លាំងទើបបានក្លាយជាក្រុមមួយដ៏រឹងមាំបាន។ ចំពោះក្រុមរបស់លោកដែលបានចាញ់យុវជនមកពីជប៉ុន Kashima Antlers ២-០ មិនអាចចាត់ទុកថា ជារឿងអាក្រក់ខ្លាំងឡើយ ប៉ុន្តែលោកសប្បាយចិត្ត និងមោទនភាពដែលក្រុមរបស់ខ្លួនបានលេងជាមួយក្រុមខ្លាំងដែលជាយុវជនឈានមុខគេនៅប្រទេសជប៉ុន។

លោកបានលើកឡើងថា ក្រុមរបស់លោកនៅមានចំណុចខ្វះខាតច្រើនពាក់ព័ន្ធនឹងបទពិសោធន៍ប្រកួតនឹងក្រុមខ្លាំង ហើយពួកគេខ្លាចក្នុងការលោត ប៉ះទង្គិច បុក ឬពាំងជាដើមដែលទាំងនេះដោយសារតែកន្លងមកលេងតែជាមួយក្រុមដែលមានកម្រិតប្រហាក់ប្រហែលគ្នា ឬខ្សោយជាង។

ទោះជាយ៉ាងណា លោក ប៊ូយ ដារី សង្កេតឃើញថា ក្រុមរបស់លោកមានបច្ចេកទេស និងល្បិចកល់មិនចាញ់ក្រុម Kashima Antlers ឡើយ ប៉ុន្តែក្រុមរបស់លោកធ្វើមិនបានសម្រេចសម្រាប់លទ្ធផលចុងក្រោយពោលគឺស៊ុតមិនចូលទីគេ។

កាលពីជើងទី១ ក្រុមយុវជនភ្នំពេញក្រោនបានចាញ់ Kashima Antlers នៅប្រទេសជប៉ុនដោយលទ្ធផល៥-០ ប៉ុន្តែនៅជើងទី២ក្នុងដីខ្លួនឯងចាញ់ត្រឹមតែ២-០ និងមានឱកាសស៊ុតបាល់ជាច្រើនលើកដែរសម្រាប់ការប្រកួតពានរង្វាន់យុវជនអាស៊ី U-18 Asia Champions Trophy 2015នៅពូល B៕

សូមទស្សនាវីដេអូ