ចម្រៀង១បទរបស់រាជនីសំឡេងមាស រស់ សេរីសុទ្ធា បានចុះបញ្ជីកម្មសិទ្ធិបញ្ញា

2015-10-22 19:06:41
ចំនួនមតិ 0 | ចំនួនចែករំលែក 0

ចន្លោះមិនឃើញ

បទចម្រៀង១បទរបស់រាជនីសំឡេងមាស រស់ សេរីសុទ្ធា ត្រូវបានក្រសួងពាណិជ្ជកម្មចុះបញ្ជីកម្មសិទ្ធិបញ្ញាជាស្ថាពរហើយ។ នេះបើតាមការឲ្យដឹងពីឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម ថ្លែងក្នុងសន្និសីទសារព័ត៌មាន កាលពីរសៀលម្សិលមិញ ។

បទចម្រៀង១បទនោះមានចំណងជើងថា " ឈាមខ្មៅ" ។ ជាការពិតរាជនីសំឡេងមាស រស់ សេរីសុទ្ធា មានបទចម្រៀងរាប់ពាន់បទ ប៉ុន្តែក្រុមគ្រួសារ ទើបតែស្រាវជ្រាវបាន១បទប៉ុណ្ណោះ គឺបទ "ឈាមខ្មៅ" ដែលជាការតែងនិពន្ធដោយរាជនីសំឡេងមាសនេះផ្ទាល់តែម្ដង ហើយបច្ចុប្បន្នក្រុមគ្រួសារកំពុងតែ ខិតខំស្វែងរកបន្ថែមទៀត។ នេះជាការលើកឡើងរបស់អ្នកស្រី រស់ សាមឿន ត្រូវជាបងស្រីបង្កើត រស់ សេរីសុទ្ធា ។

ការចុះបញ្ជីកម្មសិទ្ធិបញ្ញាស្ដីបទចម្រៀងនេះ ត្រូវបានឯកឧត្ដម ស៊ុន ចាន់ថុល បញ្ជាក់ឲ្យដឹងថា មិនមែនមានតែបទចម្រៀង រស់ សេរីសុទ្ធា ឬ ស៊ីន ស៊ីសាមុត នោះទេ ពោលគឺគ្រប់តារាចម្រៀង និងក្រុមគ្រួសារតារាចម្រៀងទាំងអស់មានសិទ្ធិស្នើគ្នាក្នុងការស្នើសុំក្រសួងពាណិជ្ជកម្ម ដើម្បីចុះបញ្ជីបាន សំខាន់ឲ្យតែមានភស្តុតាងបញ្ជាក់ថា បទចម្រៀងទាំងនោះ គឺជាស្នាដៃរបស់ខ្លួនផ្ទាល់។

ឯកឧត្តម បន្តថា ក្រោយពីមានការស្នើសុំ ពីសាមីខ្លួន ឬសាមីគ្រួសារក្រសួងពាណិជ្ជកម្ម នឹងពិនិត្យមើល ហើយធ្វើការចេញផ្សាយលើបណ្ដាញ សារព័ត៌មានចំនួន១ខែ ប្រសិនបើមិនមានជនណាមកតវ៉ាទេ នោះបទចម្រៀងដែលស្នើសុំ នឹងមានការទទួលស្គាល់ជាផ្លូវច្បាប់។

អ្នកស្រី រស់ សាមឿន ត្រូវជាបងស្រីបង្កើតតារាចម្រៀង រស់ សេរីសុទ្ធា

អត្ថប្រយោជន៍នៃការបានចុះបញ្ជីកម្មសិទ្ធិបញ្ញាជាផ្លូវការ ត្រូវបានទេសរដ្ឋមន្ត្រីរូបនេះបញ្ជាក់ឲ្យដឹងថា ម្ចាស់បទ ឬក្រុមគ្រួសារ នឹងទទួលបានសិទ្ធិការពារតាមផ្លូវច្បាប់ ប្រសិនបើមានជនណាដែលលួចចម្លង ឬយកបទចម្រៀងនោះទៅធ្វើអាជីវកម្មដោយមិនមានការអនុញ្ញាត។ នេះជាប្រវត្តិសាស្ត្រថ្មីមួយទៀតសម្រាប់បទចម្រៀងរបស់កម្ពុជា ដែលត្រូវបានចុះបញ្ជីកម្មសិទ្ធិបញ្ញានេះ បន្ទាប់ពីបទចម្រៀងរបស់អធិរាជសម្លេងមាស ស៊ីន ស៊ីសាមុត ចំនួន៧០បទត្រូវបានចុះបញ្ជីកម្មសិទ្ធិបញ្ញារួចរាល់ថ្មីៗ។

ជាចុងក្រោយ ឯកឧត្ដម ស៊ុន ចាន់ថុល បានស្នើទៅ តារាចម្រៀង ក៏ដូចជាក្រុមគ្រួសារតារាចម្រៀងផ្សេងៗទៀត ប្រសិនបើចង់ចុះបញ្ជីកម្មសិទ្ធិបញ្ញា បទចម្រៀងរបស់ខ្លួន អាចដាក់ពាក្យស្នើសុំមកក្រសួងពាណិជ្ជកម្មបាន៕

ចង់ដឹងថា បទចម្រៀងបទ" ឈាមខ្មៅ" របស់រាជនីសម្លេងមាស រស់ សេរីសុទ្ធា ពីរោះ និងមានអត្ថន័យកម្រិតណា តោះ... ទៅស្ដាប់ទាំងអស់គ្នា!!!