ទិដ្ឋភាពក្មេងៗធ្វើការក្នុងរោងចក្រសម្លៀកបំពាក់នៅបង់ក្លាដេស

2015-12-01 15:21:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកថតរូបម្នាក់ឈ្មោះ Claudio Montesano Casillas បានទៅដល់សង្កាត់ Keraniganj ក្រុង Dakha ប្រទេសបង់ក្លាដេស ដោយបានផ្ដិតយកទិដ្ឋភាពសកម្មភាពរស់នៅរបស់ក្មេងៗ និងមនុស្សជាច្រើនដែលបម្រើការងារជាកម្មកររោងចក្រកាត់ដេរសម្លៀកបំពាក់។

សកម្មភាពកម្មករវ័យក្មេងជាច្រើននាក់ បានធ្វើការជាមួយម៉ាស៊ីនដេរប្រហែល១៥គ្រឿងក្នុងមួយបន្ទប់។ ពួកគេពុំមានពេលទៅសាលារៀនទេ ដោយត្រូវរកប្រាក់តាមរយៈការដេរក្រណាត់ សំពត់ ផលិតជាសម្លៀកបំពាក់ដើម្បីផ្គត់ផ្គង់ទៅទីផ្សារបណ្ដាប្រទេសលោកខាងលិច។ អ្នកថតរូប Claudio បានឲ្យដឹងថាពួកក្មេងទាំងនោះភាគច្រើនគឺមកពីភូមិផ្សេងៗ និងទៅស្វែងរកការងារក្នុងទីក្រុងដើម្បីឲ្យជីវភាពគ្រួសារពួកគេប្រសើរជាងមុន។ ប៉ុន្តែជីវិតធ្វើការងារនៅរោងចក្រក្នុងទីក្រុង មិនងាយស្រួលឡើយ ពួកគេត្រូវធ្វើការរៀងរាល់ថ្ងៃក្នុងមួយសប្ដាហ៍ និងមានថ្ងៃឈប់សម្រាកបានតែកន្លះថ្ងៃប៉ុណ្ណោះក្នុងមួយសប្ដាហ៍។ ពួកក្មេងៗទាំងនោះសម្រាកក្នុងរោងចក្រ ឬជួលបន្ទប់នៅក្បែរៗនោះ។

យោងតាមរបាយការណ៍អង្គការ UNICEF កម្មករក្នុងប្រទេសបង់ក្លាដេសភាគច្រើនជាក្មេងៗមានអាយុចាប់ពី១០ទៅ១៤ឆ្នាំ។ ក្នុងមួយខែៗ ក្មេងៗក៏ដូចជាមនុស្សវ័យជំទង់គឺអាចរកបានចំណូលតិចជាង ៨០០តាកា ពោលគឺប្រហែល១០ដុល្លារប៉ុណ្ណោះក្នុងមួយខែ សម្រាប់ប្រាក់ខែខ្ពស់បំផុតគឺបានចំនួន ១៩៥០តាកា ស្មើ ២៤,០៨ដុល្លារប៉ុណ្ណោះក្នុងមួយខែ។ រោងចក្រកាត់ដេរនៅបង់ក្លាដេសប្រហែល៧ពាន់រោងចក្របានបង្កើតឡើងជាលក្ខណៈតូចៗមិនផ្លូវការពុំស្របតាមស្តង់ដារត្រឹមត្រូវនោះទេ។ នៅក្នុងរោងចក្រធ្វើឡើងជាទ្រង់ទ្រាយតូចៗទាំងនោះ ភាគច្រើនគឺពុំអាចធានាសុវត្ថិភាពកម្មករនៅកន្លែងការងារបាន តួយ៉ាងរោងចក្រមួយចំនួនគឺពុំមានច្រកចេញពេលមានអាសន្ន បំពង់ពន្លត់អគ្គីភ័យត្រឹមត្រូវនោះទេ៕