ថវិកា ៧០% នៃកម្មវិធី Save The Earth, Save Children ចូលគន្ធបុប្ផា

2015-12-14 22:52:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ថវិកាចំនួន ៧០ ភាគរយ បានពីការលក់សំបុត្រ ក្នុងកម្មវិធី Save The Earth, Save Children នឹងត្រូវបរិច្ចាគដល់មន្ទីរពេទ្យគន្ធបុប្ផា ហើយ ៣០ ភាគរយទៀត នឹងចូលអង្គការពន្លឺអនាគតកុមារ។

Save The Earth, Save Children ដែលធ្វើឡើងដោយសាកលវិទ្យាល័យវេស្ទើន កាលពីថ្ងៃទី ១២ ធ្នូកន្លងទៅ ជាកម្មវិធីមួយ បង្ហាញពីផលប៉ះពាល់ និងការការពារ នៃការកើនឡើងកម្ដៅផែនដី ដែលបណ្ដាលមកពីកត្តាជាច្រើនដូចជា ការកាប់បំផ្លាញព្រៃឈើ ការអភិវឌ្ឍន៍ កំណើនរោងចក្រ យានយន្ត (ផ្សែងពុល) ការដុតបំផ្លាញព្រៃឈើនោះ នាំមានបម្រែបម្រួលអាកាសធាតុ កើតគ្រោះរាំងស្ងួត និងបាតុភូតធម្មជាតិផ្សេងៗ។ ដើម្បីកាត់បន្ថយការកើនកម្ដៅផែនដី មនុស្សត្រូវដាំដើមឈើ កាត់បន្ថយការកាប់បំផ្លាញព្រៃឈើ ប្រើរថយន្តសាធារណៈជាដើម។ គោលបំណងសំខាន់ពីរទៀតនៃកម្មវិធី គឺចង់រៃអង្គាសថវិកា ជួយដល់មន្ទីរពេទ្យគន្ធបុប្ផា និងអង្គការពន្លឺអនាគតកុមារ ដែលកំពុងជួបវិបត្តិ និងចង់ឱ្យសិស្សនិស្សិត ចេះសាមគ្គីគ្នា។

លោក ឡុង ប៊ុនតេង (រូបថត៖ ទូរសព្ទដៃ)

លោក ឡុង ប៊ុនតេង ព្រឹទ្ធបុរសរងក្រោយថ្នាក់ឧត្ដមសិក្សា និងប្រធានផ្នែកកម្មវិធីសិក្សាអន្តរជាតិ នៃសាកលវិទ្យាល័យខាងលើ បានប្រាប់ Sabay ថា ក្រៅពីឱ្យសិស្សនិស្សិតយល់ពីផលប៉ះពាល់ និងវិធីការពារផែនដី គោលដៅធំផ្សេងនោះគឺ លោកចង់រកថវិកាជូនមន្ទីរពេទ្យគន្ធបុប្ផា អង្គការពន្លឺអនាគតកុមារ និងឱ្យសិស្សចេះធ្វើការជាក្រុម។

លោក ប៊ុនតេង បញ្ជាក់ថា៖ «បើសកម្មភាពសង្គមយើងមានច្រើនណាស់ ប៉ុន្តែយើងឃើញពេទ្យគន្ធបុប្ផា មានតម្រូវការច្រើនពេក ដូចទិន្នន័យនិស្សិតបង្ហាញអ៊ីចឹង ក្នុងមួយថ្ងៃមានក្មេងៗ ២.០០០ នាក់មកព្យាបាល។ យើងជាខ្មែរ យើងត្រូវបណ្ដុះគំនិតក្មេងៗឱ្យចេះជួយគ្នា បើពឹងលើលោក Doctor តើគាត់ជួយបានយូរអត់ គាត់ចាស់ហើយ ចឹងយើងត្រូវជួយគាត់។ យើងជួយគន្ធបុប្ផា ៧០% សល់ ៣០ % ជួយអង្គការកុមារកំព្រា [អង្គការពន្លឺអនាគតកុមារ]"។

បើតាមការឱ្យដឹង តួលេខថវិកាដែលបានពីការលក់សំបុត្រ មានចំនួនសរុប ១.២៩៣ ដុល្លារអាមេរិក ហើយលោក ប៊ុនតេង បានថ្លែងអរគុណដល់សិស្សនិស្សិត ដែលបានចូលរួម និងម្ចាស់ឧបត្ថម្ភនានា ដែលធ្វើឱ្យមានកម្មវិធីនេះកើតឡើង។

គួរបញ្ជាក់ថា ដើម្បីជួយមន្ទីរពេទ្យគន្ធបុប្ផា លោកវេជ្ជបណ្ឌិត Beat Richner ជាប្រធាននិងស្ថាបនិក បានចំណាយពេលលេងវីយោឡុង ២ ដងក្នុងមួយសប្ដាហ៍នៅសៀមរាប។