គាត់មិនគួរប្រើឈ្មោះជាក្មួយអ្នកមាន មកបោកខ្ញុំ
- 2014-10-21 22:05:03
- ចំនួនមតិ 0 | ចំនួនចែករំលែក 0
គាត់មិនគួរប្រើឈ្មោះជាក្មួយអ្នកមាន មកបោកខ្ញុំ
ចន្លោះមិនឃើញ
សួស្ដីបង Sabay! សូមមេត្តាចុះផ្សាយអត្ថបទរបស់ខ្ញុំផង ព្រោះខ្ញុំមានបញ្ហាមួយចង់ ឲ្យមិត្តអ្នកអានរបស់ Sabay ជួយដោះស្រាយខ្ញុំផង។ ខ្ញុំជាកូនស្រីអ្នកខេត្តកណ្ដាល ដែលរៀនបានត្រឹមថ្នាក់ទី១២ តែប៉ុណ្ណោះ ដោយសារជីវភាពក្រីក្រពេក ទើបខ្ញុំបញ្ចប់ការសិក្សាបានត្រឹមថ្នាក់១២នេះ។ ក្រោយពីរៀនចប់ថ្នាក់ទី១២ហើយ នៅឆ្នាំ២០០៨មក ខ្ញុំបានធ្វើការនៅភោជនីយដ្ឋានរបស់បារាំងមួយ ជាតួនាទីជាអ្នកបម្រើ។ ការងាររបស់ខ្ញុំគឺគ្រាន់បើដែរ ពីព្រោះជាហាងលំដាប់មធ្យម។ អ្នកមានជីវភាពគ្រាន់បើ ទើបហ៊ានចូលទៅពិសាអាហារនៅទីនោះ។
រូបតំណាង
មួយ ឆ្នាំក្រោយពីធ្វើការនៅទីនោះ ខ្ញុំបានស្គាល់គ្នាជាមួយនឹងបុរសម្នាក់ ដែលជាអង្គរក្សអ្នកធំ។ ថ្ងៃដែលគាត់ជូនមេរបស់គាត់មកពីសារអាហារនៅហាងរបស់ខ្ញុំលើក ដំបូង គាត់បានឆ្លៀតសួរនាំខ្ញុំជាច្រើន និងហ៊ានសុំលេខទូរសព្ទរបស់ខ្ញុំទៀត ដោយប្រាប់ខ្ញុំថា ទុកសម្រាប់ទាក់ទងមកខ្ញុំមុន ពេលណាគាត់ត្រូវជូនពូរបស់គាត់មកពិសាអាហារអីទៀត ដើម្បីខ្ញុំរៀបចំកន្លែងទុកជាមុន។ ដំបូងខ្ញុំបានប្រកែកថា គេមានលេខទូរសព្ទសម្រាប់ Order ដែរ អាចខលមកលេងនោះបានគ្រប់ពេល។ ប៉ុន្តែគាត់នៅតែសុំលេខខ្ញុំមួយទៀតឲ្យទាល់តែបាន។ ក្រោយពីបានលេខទូរសព្ទនោះហើយ ទូរសព្ទរបស់ខ្ញុំមិនសូវទំនេរឡើយ គឺគាត់ខលចូលរហូត សួរនាំខ្ញុំរឿងមិនសូវបានប្រយោជន៍ជាច្រើនដូចជា ញ៉ាំអាហារហើយឬនៅ? រាល់ថ្ងៃនៅជាមួយអ្នកណាគេ? និងមានគូហើយឬនៅ?
តែទោះបីយ៉ាងណាខ្ញុំដូចជាមិនទាន់ធុញ ទ្រាន់នឹងគាត់ដូចពេលនេះទេ។ ក្រោយចេញពីធ្វើការ គាត់សុំនិយាយជាមួយខ្ញុំពីរទៅបីម៉ោងឯណោះ។ ខ្ញុំក៏បានសួរនាំគាត់ថា ធ្វើការនៅឯណាដែរ ហើយគាត់បានប្រាប់ខ្ញុំថា គាត់ធ្វើការឲ្យពូរបស់គាត់ ក្នុងតួនាទីជាអ្នកបើកឡាន។ ខ្ញុំជឿគាត់ទាំងស្រុង ពីព្រោះឃើញគាត់តែងបើកឡើងដឹងបុរសអ្នកមាននោះមកពិសាអាហារអីចឹង មែន។
ពីមួយថ្ងៃទៅមួយថ្ងៃ ទំនាក់ទំនងរបស់យើងកាន់តែស្អិតរមួតទៅៗ។ ពេលណាខ្ញុំទំនេរ គាត់បានមកយកខ្ញុំទៅញ៉ាំអីនៅខាងក្រៅ។ គាត់បាននាំខ្ញុំ ដែលមករស់នៅភ្នំពេញប្រហែល៥ឆ្នាំទៅហើយ បានស្គាល់ភោជនីយដ្ឋានធំៗ ហាងកាហ្វេទំនើបៗ និងទៅមើលកុនទៀតផង។ គាត់បានទិញខោអាវថ្មីៗឲ្យខ្ញុំ ដែលមានតម្លៃថ្លៃ ពីក្នុងហាងដែលមានអតិថិជនសុទ្ធតែអ្នកមាន។ ដំបូលឡើយ ខ្ញុំប្រកែកមិនយកទេ ប៉ុន្តែគាត់អង្វរពេក និងម្យ៉ាងខ្លាចខ្មាសគេផងនៅក្នុងហាងទំនើបដែលមានមនុស្សជាច្រើន កំពុងតែទិញឥវ៉ាន់ដែរ ដូច្នេះខ្ញុំក៏បង្ខំចិត្តយកទៅ។ ពេលទិញឥវ៉ាន់ម្ដងៗ ក៏ខ្ទង់មួយរយដុល្លារដែរ ហើយគាត់ចេញលុយឲ្យខ្ញុំទាំងអស់ មិនដែលឲ្យខ្ញុំចេញម្ដងណាទេ។ ខ្ញុំមានអារម្មណ៍ថាជំពាក់គុណគាត់យ៉ាងខ្លាំង មួយរឿងញ៉ាំអាហារដែលត្រូវគាត់ប៉ាវ និងមួយគឺសំលៀកបំពាក់ដែលត្រូវគាត់ចេញលុយទិញឲ្យខ្ញុំគ្រប់ពេល។ ពេលខ្លះខ្ញុំឆ្ងល់ដែរ ថាគាត់បានលុយមកពីណាអីក៏ច្រើនម្ល៉េះ មកនាំខ្ញុំញ៉ាំអាហារ និងទិញរបស់របរឲ្យខ្ញុំ។ ខ្ញុំក៏ចាប់ជឿថា គាត់ពិតជាក្មួយលោកអ្នកមានម្នាក់នោះមែនហើយ ទើបគាត់មានលុយសម្បើមយ៉ាងហ្នឹង។
គាត់នាំខ្ញុំចេញក្រៅជាញឹក ញយ និងពេលខ្លះថែមទាំងបើកឡានថ្លៃមកយកខ្ញុំទៅផង។ ខ្ញុំហៅគាត់ថា បង! បង! ចំណែកគាត់ហៅខ្ញុំវិញថា អូន! អូន! យើងដូចជាប្ដីប្រពន្ធនឹងគ្នាទៅហើយ។ គាត់ឱបខ្ញុំ ប្រឡែងលេងជាមួយខ្ញុំ ។ តែពេលខ្លះខ្ញុំក៏សួរនាំអំពីរឿងរៀបការ ហើយគាត់ថាមិនជាបញ្ហាអ្វីទេ។ ខ្ញុំក៏ជឿតាមគាត់ថាមិនជាបញ្ហាដែរ ពីព្រោះគាតនឹងមិនខ្វះទេលុយ។
តែថ្ងៃមួយធ្វើឲ្យខ្ញុំមាន អារម្មណ៍ថា ស្អប់លែងចង់ឃើញមុខគាត់ជារៀងរហូត នោះគឺនៅពេលដែលខ្ញុំដឹងថា អ្វីៗត្រូវបានគាត់កុហក។ ពេលមួយនោះរថយន្តដដែលបានជូនរបស់អ្នកមាននោះមកញ៉ាំអាហារជាមួយ មិត្តភ័ក្តិរបស់គាត់ដូចមុន ប៉ុន្តែអ្នកជូនមកនោះមិនមែនសង្សាររបស់ខ្ញុំទេ គឺអ្នកផ្សេង។ ពេលទំនេរដៃពីការងារបន្តិច ខ្ញុំបានទៅសួរនាំបុរសនោះអំពីសង្សាររបស់ខ្ញុំ របស់នោះបានធ្វើឲ្យខ្ញុំភ្ញាក់ផ្អើលមែនទែន នោះគឺបានប្រាប់ខ្ញុំថា សង្សាររបស់ខ្ញុំគឺជាអង្គរក្សថៅកែនោះ ដូចគាត់ដែរ។ ពេលនេះ គាត់ត្រូវបានថៅកែបញ្ឈប់ពីការងារបាត់ទៅហើយ ដោយសារយកឡានរបស់ថៅកែបើកដើរលេងច្រើនពេក។ ខ្ញុំធ្លាក់ថ្លើមក្ដុកតែម្ដង ពេលឮគាត់និយាយបែបនេះ ពីព្រោះខ្ញុំស្មានថា គាត់ជាក្មួយអ្នកមាន។ ខ្ញុំបានដឹងបន្ថែមទៀតថា សង្សាររបស់ខ្ញុំបានទៅធ្វើជាសន្តិសុខយាមតាមរោងចក្រនៅម្ដុំ ផ្លូវវេងស្រេង។
ខ្ញុំខូចចិត្ត និងដេកយំអស់ជាច្រើនថ្ងៃ។ ឯសង្សារខ្ញុំនៅតែបន្តទូរសព្ទមករកខ្ញុំ និងខំលាក់បាំងដូចគ្មានរឿងអីកើតឡើងទាំងអស់ តែខ្ញុំមិនបានលាក់បាំងរឿងនេះទេ ខ្ញុំបានប្រាប់គាត់ថា ខ្ញុំបានដឹងរឿងអ្វីៗគ្រប់យ៉ាងអស់ហើយ។ គាត់បានអង្វរខ្ញុំថាកុំបែកចិត្តពីគាត់ដោយក្ដីអាណិតបំផុត។ ខ្ញុំមិនបានអឺអើជាមួយគាត់ទេ គ្រាន់តែចុចទូរសព្ទបិទក្រោយពីនិយាយបានមួយភ្លែត។ ម្ដងនេះ ខ្ញុំអត់និយាយលេងយូរជាមួយគាត់ដូចមុននោះទេ។ បើទោះបីបាននិយាយគ្នាឲ្យជ្រះស្រលះហើយ ខ្ញុំមានអារម្មណ៍ថា នៅតែមិនសប្បាយចិត្តដដែល ហើយអារម្មណ៍ដែលស្រលាញ់គាត់ គឺនៅតែដក់ជាប់ក្នុងចិត្តខ្ញុំជានិច្ច តែអារម្មណ៍ខកចិត្តមានឥទ្ធិពលលើសលុបជាងគេ។
តាមពិតទៅខ្ញុំ មិនស្អប់គាត់ដែលជាអង្គរក្ស ឬអ្នកយាមអ្វីនោះទេ ប៉ុន្តែអ្វីដែលខ្ញុំមិនចូលចិត្តគឺ ការបោកប្រាស់ខ្ញុំជាកើលដំបូង។ នរណាក៏ដឹងដែរថា អាថ៌កំបាំងគ្មានទេ ក្នុងលោកនេះ ប៉ុន្តែហេតុអ្វីបានជាគាត់កុហកខ្ញុំ។ គាត់ចាត់ទុក្ខខ្ញុំជាទីងមោងឬ? បើទោះបីមិត្តភ័ក្ដិរបស់គាត់មិនប្រាប់រឿងនេះដល់ខ្ញុំ ក៏ថ្ងៃមុខថ្ងៃក្រោយខ្ញុំប្រាកដជាដឹង គ្មានអ្វីជាអាថ៌កំបាំងទេក្នុងលោកនេះ។
ពេល ឥលូវនេះ បញ្ហាតែមួយដែលខ្ញុំពិបាកដោះស្រាយគឺបន្ត ឬបែកពីមនុស្សដែលកុហកខ្ញុំ។ សូមមិត្តអ្នកអានជួយឆ្លើយសំនួរខ្ញុំផងថាតើ៖ ១) ខ្ញុំគួរតែលើកលែងទោសឲ្យគាត់ដែលជាមនុស្សកុហកខ្ញុំទេ និងបំភ្លេចរឿងគ្រប់បែបយ៉ាង តែបង្កើតស្នេហាជាមួយគាត់?
២) បើខ្ញុំមិនព្រមទទួលយកគាត់ តើខ្ញុំគួរឈប់ពីការងារនៅក្នុងហាងរបស់ខ្ញុំ ហើយត្រឡប់ទៅស្រុកវិញ ដើម្បីគេចមុខគាត់ ជាការល្អអត់?
៣) ឥលូវនេះខ្ញុំមានអារម្មណ៍ដូចជាខូចចិត្តជាខ្លាំង គឺខូចចិត្តចំពោះការដែលគាត់កុហកខ្ញុំ តើមានវិធីសាស្ត្រអ្វីដើម្បីបំបាត់ភាពឈឺចាប់នេះបានទេ?
ជា ចុងក្រោយ អរគុណបងSabay និងមិត្តអ្នកអានទាំងអស់ដែលជួយផ្ដល់គំនិតដល់រូបខ្ញុំ។ ជូនពរឲ្យបងៗទាំងអស់គ្នាមានសេចក្ដីសុខ និងកុំជួបមនុស្សបោកកុហកដូចរូបខ្ញុំ៕
ពី ផ.ន
-មើលអត្ថបទស្នេហាផ្ញើដោយប្រិយមិត្តអ្នកអាន ចុចត្រង់នេះ
ប្រសិនបើ ប្រិយមិត្ត មានបញ្ហាស្នេហាដែលចង់ចែករំលែកដល់មិត្តអ្នកអានបានជាបទ ពិសោធន៍ ឬជួយជាយោបល់ក្នុងការដោះស្រាយ សូមផ្ញើអត្ថបទរឿងរ៉ាវពិតរបស់ អ្នកមកកាន់ may.soklim@cidc.com.kh។ ឬអ្នកអាចទូរសព្ទមកយើង ០១៦ ៧៩២ ១៥១។ Sabay នឹងចុះផ្សាយជូន។
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
