សំដីក្មេងកំហូចមួយម៉ាត់ ធ្វើឲ្យយុវតីខ្មែរមួយរូបខូចចិត្ត១៥ឆ្នាំ!
- 2014-09-18 18:06:20
- ចំនួនមតិ 0 | ចំនួនចែករំលែក 0
សំដីក្មេងកំហូចមួយម៉ាត់ ធ្វើឲ្យយុវតីខ្មែរមួយរូបខូចចិត្ត១៥ឆ្នាំ!
ចន្លោះមិនឃើញ
រឿងកម្រមួយ បានកើតឡើងចំពោះយុវតីមួយរួបឈ្មោះ យ៉ា។ យុវតីរូបនេះបានពាក់ចិញ្ចៀនភ្ជាប់ពាក្យអស់រយៈពេលជិត១៥ឆ្នាំហើយ បើទោះបីនាងមិនទាន់បានភ្ជាប់ពាក្យពិតប្រាកដក្ដី។ តែអាថ៌កំបាំងត្រូវបានទម្លាយចេញតាមរយៈលិខិតរបស់កញ្ញាផ្ទាល់ ដែលបានផ្ញើមក Sabay ឲ្យជួយចុះផ្សាយខាងក្រោមនេះ៖
១៥ឆ្នាំមុន ខ្ញុំនៅជាសិស្សសាលាបឋមសិក្សាមួយនៅឡើយនាពេលនោះ។ សិស្សត្រូវបានបែងចែកវេនជាក្រុមៗ ដើម្បីធ្វើការបោសសម្អាតថ្នាក់រៀន ជារៀងរាល់ថ្ងៃ។ ថ្ងៃមួយ វេនបោសសម្អាតថ្នាក់បានវិលមកដល់។ ខ្ញុំ និងមិត្តភ័ក្ដិមានភារកិច្ចត្រូវសម្អាតថ្នាក់ឲ្យបានស្អាត មុននឹងគ្រូមកដល់។
-អានអត្ថបទ៖ ខ្ញុំខុសទេស្រឡាញ់មនុស្សពីរនាក់ ម្នាក់គេងជាមួយគ្នា៣ឆ្នាំ និងម្នាក់ទៀតប្ដីគេ?
មិន គួរឲ្យជឿសោះ ក្មេងប្រុសម្នាក់ ដែលសិស្ស និងគ្រូស្ទើរគ្រប់ថ្នាក់ស្គាល់យ៉ាងច្បាស់ថា ជាសិស្សកំពូលច្រឡឺម ប្រែជាសុភាពជាមួយនឹងកាយវិការដើរយឺតៗសំដៅមករកខ្ញុំ ដែលកំពុងបោសសំរាមនៅមុខថ្នាក់ ហើយក៏បាននិយាយយ៉ាងលឿនថា៖ “ខ្ញុំស្រលាញ់យ៉ា” រួចហើយក៏រត់យ៉ាងលឿនត្រលប់ទៅវិញ ព្រោះខ្លាចខ្ញុំយកអំបោសវ៉ៃក៏មិនដឹង ទើបបានជារត់លឿនយ៉ាងហ្នឹង។ សំដីនេះបានធ្វើឲ្យខ្ញុំខ្មាសមិត្តភ័ក្ដិស្រីៗរបស់ខ្ញុំយ៉ាង ខ្លាំង តែសំដីនេះក៏ដក់ជាប់ក្នុងចិត្តរបស់ខ្ញុំរហូតមកដែរ។ ក្មេងប្រុសនោះឈ្មោះ ជាតិ។ គាត់ និងខ្ញុំមិនមែនរៀនថ្នាក់ជាមួយគ្នាទេ គឺរៀនថ្នាក់ជាប់គ្នា។
“ជាតិ ស្រលាញ់យ៉ា! ជាតិស្រលាញ់យ៉ា!” សំដីចំអន់នេះ ខ្ញុំបានឮពេញមួយថ្ងៃនោះ។ ក្រោយពីនិយាយពាក្យនេះហើយ ខ្ញុំលែងឃើញស្រមោលជាតិ ក្មេងកំហូចនោះទៀត។ ឆ្ងល់ដែរ ក៏ដាច់ចិត្តសួរមិត្តភ័ក្ដិគេថា គេទៅណាអត់ឃើញមករៀនហ្នឹង តែមិត្តភ័ក្ដិគេក៏មិនដឹងថាគេទៅណាដែរ។ ខ្ញុំក៏មិនបានខ្វល់ច្រើនដែរ ព្រោះនឹកគិតថាប្រហែលជាគេខ្មាសខ្ញុំហើយមើលទៅ បានជាមិនហ៊ានមករៀនខ្លាចជួបមុខខ្ញុំ។
ស្អែកឡើងខ្ញុំមក រៀនដូចសព្វមួយដង តែមកយឺតបន្តិចថ្ងៃនោះ ដោយដើរកាត់ថ្នាក់គេ ក៏គ្រលៀសភ្នែកលួចរកមើលគេបន្តិចដែរ តែមិនឃើញគេនៅក្នុងថ្នាក់សោះ ឃើញតែសិស្សស្រីៗពីរបីនាក់កំពុងយំទៅវិញ។ ខ្ញុំក៏ដើរហួសមកថ្នាក់របស់ខ្ញុំដូចធម្មតា។
មិត្តភ័ក្ដិ ខ្ញុំពីរបីនាក់ដើរមករកខ្ញុំទាំងមុខក្រៀមក្រំផង ទាំងទឹកភ្នែកផង ហើយប្រាប់ខ្ញុំទាំងសំដីអួលដើមកថា៖ “យ៉ា! ជាតិលង់ទឹកស្លាប់ហើយតាំងពីល្ងាចមិញ!”។
ខ្ញុំសួរពួកគេ ទាំងសំដីធ្ងន់ៗថា៖ "ពួកឯងនិយាយពីអី? កុំលេងសើចបានអត់!”។ ពួកគេយំខ្លាំងឡើងៗ ធ្វើឲ្យចិត្ត និងបេះដូងខ្ញុំកាន់តែពុះកញ្ជ្រោលចង់ដឹងថាមានរឿងអីកើតឡើង។ ពួកគេឱបខ្ញុំ ហើយនិយាយថា៖ “ខ្ញុំនិយាយមែនណា៎! ជាតិលង់ទឹកស្លាប់ហើយ”។
មិនអស់ចិត្តនឹងសំដីនេះ ខ្ញុំក៏រត់ទៅថ្នាក់របស់គេ ហើយសួរស្រីៗដែលកំពុងអង្គុយយំក្នុងថ្នាក់នោះថា មានរឿងអីកើតឡើយ។ ពេលនោះហើយដែលខ្ញុំឮសំដីមួយឃ្លានោះជាលើកទីបី។
ម្ដងនេះ ខ្ញុំមិនសួរបញ្ជាក់ពីពួកគេម្ដងទៀតទេ ព្រោះខ្ញុំដឹងច្បាស់ហើយថា ខ្ញុំស្ដាប់មិនច្រឡំនោះទេ។ ខ្ញុំត្រលប់មកថ្នាក់ខ្ញុំវិញដោយស្ងៀមស្ងាត់ ហើយអង្គុយស្ងៀមមិននិយាយស្ដីអ្វីទាំងអស់។ តាមពិតខ្ញុំកំពុងគិតពីសំដី និងរាល់សកម្មភាពដែលគេបានធ្វើកន្លងមកដាក់ខ្ញុំ ជាពិសេសគឺសំដីកាលពីម្សិលមិញ ដែលនៅក្ដៅៗនឹងត្រចៀកទាំងពីររបស់ខ្ញុំនៅឡើយ។
ពីដំបូង ខ្ញុំយំមិនចេញសោះ តែបន្តិចក្រោយមកទើបទឹកភ្នែករបស់ខ្ញុំព្រមហូរចុះមកជាមួយនឹង អារម្មណ៍ហួសចិត្តរកនិយាយមិនត្រូវ។ តាមពិតទៅ ពួកយើងក៏មិនទាន់ជាសង្សារនឹងគ្នាដែរ ដូចនេះខ្ញុំក៏មិនបានឈឺចាប់អីយូរណាស់ដែរទេ។ ប៉ុន្តែអនុស្សាវរីយ៍ ទាំងឡាយក៏ដក់ជាប់នឹងកែវភ្នែកទាំងគូររបស់ខ្ញុំ។ សំដីមួយឃ្លាដែលប្រាប់ថា៖ “ស្រលាញ់យ៉ា” ក៏ដក់ជាប់ក្នុងបេះដូងខ្ញុំរហូតមកដែរ។
មិនយូរប៉ុន្មាន ខ្ញុំក៏បញ្ចប់ការសិក្សានៅកម្រិតបឋមសិក្សា ហើយក៏ត្រូវបន្តការសិក្សានៅកម្រិតអនុវិទ្យាល័យបន្តទៀត។ ពេលនោះហើយដែលខ្ញុំដឹងថា ខ្លួនខ្ញុំមិនអាចបោះចោលការស្រលាញ់មួយនេះបានទេ ហើយក៏មិនដាច់ចិត្តបំភ្លេចការស្រលាញ់មួយនេះបានដែរ។ ខ្ញុំបានសម្រេចចិត្តធ្វើរឿងមួយដើម្បីតបស្នងការស្រលាញ់មួយនេះ គឺខ្ញុំបានសុំម៉ាក់របស់ខ្ញុំនូវចិញ្ចៀនមួយវង់ដើម្បីពាក់នៅ ម្រាមដៃនាង ដែលតំណាងឲ្យការបញ្ចាំចិត្ត និងស្ពាយរាល់អនុស្សាវរីយ៍ទាំងអស់តាមខ្លួនជានិច្ច តាំងពីពេលនោះមក។ ដល់បច្ចុប្បន្ននេះ បើទោះបីជាចិញ្ចៀនត្រូវបានផ្លាស់ប្ដូរពីរបីដងក៏ដោយ ក៏ទីតាំងនៃចិញ្ចៀននេះមិនបានផ្លាស់ប្តូទេ បើទោះបីជាមានការស្នើសុំពីសំណាក់ម្ដាយឪពុក និងសង្សារក្រោយៗរបស់ខ្ញុំក៏ដោយ។
ខ្ញុំដឹងថាធ្វើបែបនេះវា មិនអស្ចារ្យអីនោះទេ ប៉ុន្តែខ្ញុំមិនបានគិតថា ធ្វើរឿងនេះដើម្បីភាពអស្ចារ្យដែរ គឺខ្ញុំធ្វើឡើងដោយភាពស្ម័គ្រចិត្ត និងគ្រាន់តែចង់តបស្នងនូវក្ដីស្រលាញ់របស់មនុស្សម្នាក់ដែលតែង តែ ផ្ដល់មកឲ្យខ្ញុំនូវភាពរីករាយ និងស្នាមញញឹមរហូតមក។
-អានអត្ថបទ៖ ស្មានតែគេងយំតែខ្ញុំ នាងក៏គេងយំដែរ!
ជាតិ! កុំបារម្ភ។ ខ្ញុំ យ៉ា មិនបំភ្លេចមនុស្សដែលបាននិយាយថា ស្រលាញ់យ៉ា មុនគេបង្អស់ក្នុងជីវិតយ៉ាម្នាក់នេះ។ ការស្រលាញ់របស់ជាតិគឺនៅជាមួយយ៉ា១៥ឆ្នាំហើយ ហើយក៏នឹងនៅជាមួយយ៉ាជារៀងរហូត។ សង្ឃឹមថា ពេលនេះអ្នកកំពុងស្ថិតក្នុងទីស្ងប់សុខមួយទៅចុះ។ អរគុណដែលបានស្រលាញ់យ៉ាម្នាក់នេះណា! ជាតិ! យ៉ាអរគុណណា៎!
មិត្ត អ្នកអានអាចគិតថា ខ្ញុំឆ្កួតហើយដែលធ្វើបែបនេះ! អ្នកប្រាកដជាឆ្ងល់ថា តើធ្វើអីចឹងបានប្រយោជន៍អីដែរ? តែចង់ប្រាប់ថា ការធ្វើបែបនេះ គឺដោយសារភាពមិនអស់ចិត្តរបស់ខ្ញុំ ដែលមិនបានធ្វើអីទាល់តែសោះចំពោះមនុស្សម្នាក់ ដែលស្រលាញ់ និងធ្វើរឿងជាច្រើនសម្រាប់ខ្ញុំ រហូតដល់ថ្ងៃដែលគេបានចាកចេញពីរូបខ្ញុំទៅ និងគ្មានថ្ងៃណាបានជួបគ្នាវិញជារៀងរហូត។
អត្ថបទ៖ ពី យ៉ា ប្រសិនបើ ប្រិយមិត្ត មានបញ្ហាស្នេហាដែលចង់ចែករំលែកដល់មិត្តអ្នកអានបានជាបទ ពិសោធន៍ ឬជួយជាយោបល់ក្នុងការដោះស្រាយ សូមផ្ញើអត្ថបទរឿងរ៉ាវពិតរបស់ អ្នកមកកាន់ may.soklim@cidc.com.kh។ ឬអ្នកអាចទូរសព្ទមកយើង ០១៦ ៧៩២ ១៥១។ Sabay នឹងចុះផ្សាយជូន។
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
