ដំណោះស្រាយពេលដែលម៉ាស៊ីនឡានស្រាប់តែឡើងកម្ដៅខ្លាំង

2016-03-01 13:15:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រព័ន្ធបញ្ចុះកម្ដៅដែលដំណើរការខុសប្រក្រតីអាចធ្វើឲ្យរថយន្តម៉ាស៊ីនរថយន្តកើនឡើងកម្ដៅ ហើយវាអាចបណ្ដាលឲ្យម៉ាស៊ីនរថយន្តរងការខូចខាត។ ដូចនេះប្រសិនបើសង្កេតឃើញថារថយន្តអ្នកឡើងកម្ដៅខុសធម្មតា អនុវត្តតាមវិធីខាងក្រោមដើម្បីអាចជួយទប់ស្កាត់ការខូចខាតដល់រថយន្ត រហូតដល់ប្រព័ន្ធបញ្ចុះកម្ដៅបានជួសជុលរួច។

១. បន្ទាប់ពីសង្កេតឃើញថាទ្រនិចនៃកម្ដៅរថយន្តលើតាប្លូ ដៅចំអក្សរ H (ដែលមានន័យថាក្ដៅ) ឬក៏សង្កេតឃើញផ្សែងហុយចេញពីគម្របម៉ាស៊ីនឡាន ត្រូវឈប់ឡានជាបន្ទាន់ និងពន្លត់ម៉ាស៊ីនឡានដើម្បីឲ្យម៉ាស៊ីនឡានចុះត្រជាក់។

២. បើកគម្របម៉ាស៊ីនឡានដើម្បីឲ្យកម្ដៅភាយចេញ។

៣. កុំបើកគម្របកញ្ច្រែងម៉ាស៊ីនត្រជាក់ឲ្យសោះ ពេលដែលម៉ាស៊ីនកំពុងក្ដៅ ព្រោះសម្ពាធនៃទឹកម៉ាស៊ីនត្រជាក់រួមជាមួយចំហាយផ្សែងដែលបញ្ចេញមកអាចបង្កគ្រោះថ្នាក់ដល់អ្នកបាន។

៤. ពិនិត្យមើលធុងទឹកបញ្ចុះកម្ដៅ និងចាក់ទឹក (ទឹកបញ្ចុះកម្ដៅ, ឬទឹកធម្មតា) បញ្ចូលបន្ថែមប្រសិនបើចាំបាច់។ ឡានជំនាន់ថ្មីភាគច្រើនមានភ្ជាប់ធុងទឹកបញ្ចុះកម្ដៅជ័រជាប់នឹងកញ្ច្រែងម៉ាស៊ីនត្រជាក់ ដោយអាចឲ្យអ្នកមើលឃើញពីកម្រិតទឹកដែលមាននៅក្នុងធុងបាន។

ប្រសិនបើរថយន្តអ្នកមានតែកញ្ច្រែងម៉ាស៊ីនត្រជាក់ហើយគ្មានធុងទឹកបញ្ចុះកម្ដៅនោះ ត្រូវរង់ចាំឲ្យកញ្ច្រែងម៉ាស៊ីនត្រជាក់នោះចុះត្រជាក់សឹមត្រួតពិនិត្យកម្រិតទឹកដែលមាន រួចធ្វើការចាក់ទឹកបញ្ចូលបន្ថែមប្រសិនចាំបាច់។

៥. សម្រេចថាគួរបើករថយន្តទៅមុខពេលអនុវត្តចំណុចខាងលើរួចរាល់ ឬក៏ហៅជំនួយ។ ប្រសិនបើរថយន្តអ្នកខ្វះទឹកហើយអ្នកអាចចាក់បញ្ចូលបន្ថែមបាន មានន័យថាវាអាចមានសុវត្ថិភាពប្រសិនធ្វើដំណើរទៅមុខជាបន្ត។ ប្រសិនក្រោយពីបើករថយន្តទៅមុខបានមួយរយៈស្រាប់តែមានបញ្ហាឡើងកម្ដៅឡើងវិញត្រូវឈប់រថយន្តជាបន្ទាន់ និងសុំជំនួយ៕

ចុចអាន៖ រៀនសំគាល់ឡានដែលកែចម្ងាយកុងទ័រ ដើម្បីកុំឲ្យចាញ់បោកអ្នកលក់

ប្រែសម្រួល៖ ហៃ សុខហេង ប្រភព៖ WikiHow