Sammo Hung (តាម៉ាប់)៖ "អាយុ ១៥០ឆ្នាំ បានខ្ញុំគិតរឿងចូលនិវត្ត"

2016-03-11 13:17:22
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលតារាក្បាច់គុនហុងកុង Sammo Hung ហៅ "តាម៉ាប់" ឆ្នាំនេះមានអាយុ ៦៤ឆ្នាំហើយតែមិនទាន់គិតដល់ថ្ងៃឈប់ថតរឿងនោះទេ។ សម្រាប់លោក ការចូលនិវត្តគឺជារឿងវែងឆ្ងាយនៅពេលខាងមុខ។

ឆ្លើយតបនឹងកាសែតរបស់របស់ខេត្ត Guangzhou តារាសម្ដែងល្បីឈ្មោះ Sammo Hung បានបង្ហាញពីភាពជឿជាក់លើខ្លួនឯងបើទោះបីជាមានអាយុ ៦៤ ឆ្នាំក៏ដោយ។ ថ្មីៗនេះលោកទើបតែទទួលពាក្យចូលរួមក្នុងភាពយន្ត "My Beloved Guard” ដែលជាការសហការជាមួយតារាសម្ដែង លី តឺហួរ។

“មនុស្សជាច្រើនមានចម្ងល់ថាហេតុអីខ្ញុំធាត់តែបែរជារហ័សរហួនយ៉ាងនេះ ថតរឿងវាយតប់គ្នាគ្មានជួបឧបសគ្គអ្វីសោះ។ នេះគឺជាចំណុចដែលធ្វើឲ្យខ្ញុំជឿជាក់លើខ្លួនឯង។ ២០ឆ្នាំមុន ខ្ញុំនៅគិតដល់រឿងចូលនិវត្ត តែនៅពេលនេះ ខ្ញុំបានបោះបង់គំនិតនេះចោលហើយ"។ Sammo និយាយ។

Sammo Hung បញ្ជាក់ថាខ្លួននឹងបន្តថតរឿងរហូតទាល់តែទៅមុខលែងរួចទៀត។ "ដរាបណានៅកាន់ចានបាយហូបបាន ខ្ញុំនឹងបន្តថតរឿងទៀត។ ចូលនិវត្តឬ? នៅពេលណាខ្ញុំអាយុ ១៥០ ឆ្នាំទើបគិតដល់រឿងហ្នឹង"។ តួរឿង "Ip Man” សង្កត់។

អាចនិយាយបានថា Sammo Hung គឺបុគ្គលដ៏កម្ររកបានរបស់វិស័យភាពយន្ត ហុងកុងអំឡុងឆ្នាំ ១៩៨០-១៩៩០។ លោកបានសហការជាមួយកំពូលតារាសម្ដែងដូចជា ឈិន ឡុង និង Yuen Biao បង្កើតបានភាពយន្តល្បីៗទូទាំងអាស៊ីដូចជា "Plan A” “Dragons Forever” ជាដើម។ មិនត្រឹមតែចូលរួមសម្ដែងក្នុងភាពយន្តល្បីៗ តារាកើតឆ្នាំ ១៩៥២ ក៏ប្រជែងនឹងខ្លួនឯងក្នុងតួនាទីផ្សេងៗដូចជា អ្នកដឹកនាំរឿង អ្នកច្នៃក្បាច់គុននិងផលិតករជាដើម។ ស្ទីលក្បាច់គុនក៏ដូចភាពកំប្លុកកំប្លែងរបស់ Sammoនៅក្នុងរឿង ត្រូវគេវាយតម្លៃថាបានជះឥទ្ធិពលមិនតិចទេទៅលើ ឈិន ឡុងសិស្សប្អូនរបស់លោក៕

ចុចអាន៖ឈិន ឡុងល្វីងមុខនឹងសារព័ត៌មានចុះថាស្លាប់ជាបន្តបន្ទាប់

ប្រែសម្រួល៖ សុវណ្ណផៃ ប្រភព៖zing