វិទ្យាល័យ ហ៊ុន សែន ស្មាច់ដែង ក្លាយជាជើងឯកទូទាំងប្រទេស ឈ្នះទឹកប្រាក់ ៥ ពាន់ដុល្លារ

2016-04-16 06:13:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយបើកវគ្គជម្រុះ៤មណ្ឌលធំៗរយៈពេលមួយខែមកនេះ ក្រុម វិទ្យាល័យ ហ៊ុន សែន ស្មាច់ដែងនៃខេត្តព្រះសីហនុ បានក្លាយជាជើងឯកបាល់ទះឆ្នេរខ្សាច់ទូទាំងប្រទេសក្រោយឈ្នះក្រុម តារាបាល់ទះទេសចរណ៍នៅមណ្ឌលខេត្តព្រះសីហនុដូចគ្នា នៅវគ្គផ្ដាច់ព្រ័ត្រ ពីរសិតជាប់គ្នាដោយលទ្ធផលពិន្ទុ ២១-១៤ និង ២១-១៧ នាល្ងាចថ្ងៃទី ១៥ មេសា នេះនៅឆ្នេរអូឈើទាលអារីស្តុន។

ដូច្នេះ វិទ្យាល័យ ហ៊ុន សែន ស្មាច់ដែង ជាប់លេខ១ទទួលបាន ប្រាក់រង្វាន់ ៥០០០ ដុល្លារអមដោយមេដាយមាស និងពានមួយ ខណៈដែល លេខ២ តារាបាល់ទះទេសចរណ៍ ទទួលបានប្រាក់រង្វាន់ ២០០០ ដុល្លារ អមដោយមេដាយប្រាក់។ ចំណែក Aqua Family Resort (ខេត្តព្រះសីហនុ) និង យុវជនបាត់ដំបង C (បាត់ដំបង) ជាប់ចំណាត់ថ្នាក់លេខ៣ស្ទួន និង លេខ៣ ទទួលបានប្រាក់រង្វាន់ ១០០០ ដុល្លារ អមដោយមេដាយសំរឹទ្ធ។

តាមរយៈលទ្ធផលសរបញ្ជាក់ថា ខេត្តព្រះសីហនុ សម្បូរធនធានកីឡាករបាល់ទះខ្លាំងៗ ព្រោះថាក្នុងចំណោម ចំណាត់ថ្នាក់កំពូលទាំង ៤មានក្រុមខេត្តព្រះសីហនុរហូតដល់ ៣ ក្រុមទៅហើយ។ ក្រៅពីការប្រកួតយ៉ាងជក់ចិត្តនាវគ្គផ្ដាច់ព្រ័ត្រ ក៏មានការប្រកួតប្រកួតមិត្តភាពអន្តរជាតិដែរ ដោយកំពូលកីឡាការិនីបាល់ទះសញ្ជាតិហ្វីលីពីន Cha Cruz ចាប់ដៃគូជាមួយ លន់ សុធា លេងតតាំងនឹង និត ថិន និង ង៉ែត វ៉ាត មកពីបាត់ដំបង ដើម្បីផ្លាស់ប្ដូរបទពិសោធន៍។

គួររំលឹកថាមុនឈានដល់វគ្គផ្ដាច់ព្រ័ត្រនាថ្ងៃទី ១៥ មេសា នៅខេត្តព្រះសីហនុ កម្មវិធីជម្រុះកាលពាក់កណ្ដាលខែមីនា ដែលមាន ១២៨ ក្រុមចូលរួមដោយបែងចែកជា ៤ មណ្ឌលធំៗ ដូចជា បាត់ដំបង សៀមរាប កំពង់ចាម និង ខេត្តព្រះសីហនុ។ ក្រុមហ៊ុនស្រាបៀរអាន់ឆ័រ គ្រោងនឹងរៀបចំកម្មវិធីនេះជាថ្មីទៀតនាឆ្នាំក្រោយ និង មានកម្មវិធីរឹតតែប្លែក៕