សហព័ន្ធកីឡាហែលទឹកមាន ៤កម្មវិធីប្រកួតក្រៅស្រុកក្នុងឆ្នាំនេះ

2016-04-29 17:13:47
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហែម គីរី អគ្គលេខាធិការសហព័ន្ធកីឡាហែលទឹកកម្ពុជាបានឱ្យដឹងថា សហព័ន្ធមានកម្មវិធីប្រកួតនៅក្រៅស្រុក ដល់ទៅ៤កម្មវិធីប្រកួតសម្រាប់ឆ្នាំ ២០១៦នេះ។

លោក ហែម គីរី បានបញ្ជាក់ថាកម្មវិធីទាំង៤របស់សហព័ន្ធ ទី១គឺការប្រកួត ហែលទឹក និស្សិត ក្នុងតំបន់អាស៊ានដែលប្រព្រឹត្តទៅនៅប្រទេសសិង្ហបុរី ក្នុងខែកក្កដា ដែលសហព័ន្ធបានត្រៀមនិស្សិត ចំនួន៣រូបក្នុងនោះមានស្រី២ ប្រុស១ ។ កម្មវិធីប្រកួតទី២ គឺការប្រកួត School Game ក្នុងតំបន់អាស៊ាន (សិស្សវិទ្យាល័យ) ដែលសហព័ន្ធបានត្រៀមកីឡាករដែលជាសិស្សវិទ្យាល័យចំនួន៤រូប ក្នុងនោះមានកីឡាករ ២នាក់ និងកីឡាការិនី ២នាក់ ខណៈពេលដែលការបរិច្ឆេទនឹងទីកន្លែងប្រកួតមិនទាន់ដឹងច្បាស់នៅឡើយ។

ខណៈដែលកម្មវិធីទី៣ របស់សហព័ន្ធគឺការប្រកួតនៅចុងឆ្នាំនេះ ពោលគឺក្នុងខែធ្នូ ដែលការប្រកួតនេះធ្វើឡើងនៅប្រទេសកាណាដាក្នុងវិញ្ញាសា អាងទឹកខ្នាតខ្លីចម្ងាយ ២៥ម៉ែត្រ។ ចំពោះប្រកួតនេះ ខាងសហព័ន្ធនៅមិនទាន់កំណត់ នឹងបញ្ជូនកីឡាចំនួនប៉ុន្មាននាក់ អោយចូលរួមក្នុងព្រឹត្តិការណ៍នោះទេ។

ការប្រកួតទី៤ ដែលសំខាន់ជាងគេរបស់សហព័ន្ធកីឡាហែលទឹកកម្ពុជាគឺភារកិច្ចរ៉ាប់រងការប្រកួតកីឡាអូឡាំពិករដូវក្ដៅ ដែលប្រព្រឹត្តិទៅនៅប្រទេសប្រេស៊ីល នាខែសីហាខាងមុខនេះ ដោយកម្ពុជារំពឹងថានឹងធ្វើបានល្អ៕

អត្ថបទ៖ មួន សុគន្ធតារា