ប្រវត្តិ ភ្នំពេញក្រោន ជាក្លិបឈានមុខគេក្នុងស្រុក

2014-10-28 16:22:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបបាល់ទាត់ភ្នំពេញក្រោនបានកំពុងបោះជំហានក្លាយជាក្លិបអាជីពពិតប្រាកដមួយនៅក្នុងប្រទេសកម្ពុជា និងមានកេរ្តិ៍ឈ្មោះល្បីទៅកាន់ឆាកអន្តរជាតិ បន្ទាប់ពីទទួលបានជោគជ័យជាបន្តបន្ទាប់។ ជើងឯកមិត្តហ្វូនខេមបូឌានលីកឆ្នាំ២០១៤ ភ្នំពេញក្រោននឹងតំណាងឲ្យជើងឯកប្រទេសកម្ពុជាចូលរូមប្រកួតក្នុងព្រឹត្តិការណ៍ Toyota Mekong Club Championship នៅប្រទេសវៀតណាម នាចុងខែតុលានេះ ក្រោមការដឹកនាំរបស់គ្រូបង្វឹកសញ្ជាតិស្វីស Sam Schweingruber។

ភ្នំពេញក្រោនជើងឯកលីកកំពូលកម្ពុជាឆ្នាំ២០១៤

ឆ្នាំ២០១១ ក្រុមភ្នំពេញក្រោន ពិតជាបានធ្វើមិត្តអ្នកគាំទ្របាល់ទាត់ខ្មែរស្គាល់មិនតិចឡើយនិងជាក្រុមមួយដែលមានភាពរឹងមាំ សម្រាប់ការប្រកួតពានរង្វាន់ក្នុងស្រុក។ ជាពិសេសជាងនេះទៅទៀតក្រុមនេះបានបង្ហាញខ្លួនក្នុងកម្មវិធី AFC President’s Cup ដ៏អស្ចារ្យដែលបានបញ្ចប់កាលខែឧសភាឆ្នាំ២០១១នាពេល ថ្មីៗនេះ។ ក្រុមក្នុងលីកកំពូលរបស់កម្ពុជាមួយនេះបានឆ្លងទៅលេងវគ្គបន្ត ក្នុងកម្មវិធីខាងលើជាប្រវត្តិសាស្ត្ររបស់ខ្លួនក្រោមការដឹក នាំរបស់លោក Bojan Hodak គ្រូបង្វឹកសញ្ជាតិក្រូអាត។

បាល់ទាត់ខ្មែរ នៅក្នុងទសវត្សឆ្នាំ១៩៥០ និង ១៩៦០ គឺជាពេលដែលបាល់ទាត់កម្ពុជាទទួលបានភាពល្បីល្បាញនិងក្រុម ខ្លាំងនៅក្នុងតំបន់ដូចទៅនឹងក្រុមថៃ,ភូមា,និង ឥណ្ឌាជាដើម។ ក្រោយមកទៀតប្រទេសកម្ពុជាបានធ្លាក់ចូលក្នុងភ្លើងសង្គ្រាម ស៊ីវិលនៅក្នុងទសវត្សឆ្នាំ១៩៧០និងបានធ្វើកីឡាបាល់ទាត់ត្រូវ បញ្ចប់។

រហូតដល់ដើមទសវត្សឆ្នាំ១៩៩០ បាល់ទាត់ខ្មែរបានរស់ឡើងវិញនិងបានបង្ហាញខ្លួនក្នុងព្រឹត្តិការណ៍ កីឡាស៊ីហ្គេមក្នុងឆ្នាំ១៩៩៥ និងបានចូលរួមក្នុងយុទ្ធនាការជម្រុះបាល់ទាត់ពិភពលោកនៅ ក្នុងឆ្នាំដដែលនោះផងដែរ។

ឆ្នាំកកើតលីកក្នុងស្រុកនិងក្រោន ក្នុងឆ្នាំ២០០០ សហព័ន្ធកីឡាបាល់ទាត់កម្ពុជាបានបង្កើតក្របខ័ណ្ឌបាល់ទាត់កំពូល ក្នុងស្រុកដែលមានឈ្មោះថា Cambodian Premier League។ មួយឆ្នាំក្រោយមក ក្រុមបាល់ទាត់ Samart Unitedត្រូវបានបង្កើតឡើងដោយមានការឧបត្ថម្ភពីក្រុមហ៊ុនSamart ដែល ជាក្រុមហ៊ុនទូរគមនាគមន៍។ បន្ទាប់មក ក៏មានការផ្លាស់ប្ដូរឈ្មោះជាច្រើនរហូតដល់[ភ្នំពេញក្រោន ](Phnom Penh Crown) នាពេលបច្ចុប្បន្ន។ នៅឆ្នាំ២០០២ Samart Unitedត្រូវបានដឹកនាំដោយលោកហុក សុចិត្រាដែលលោកដើរតួជាអ្នកដឹកនាំលេងផងនិងនិងជាកីឡាករផង។

ក្នុង ឆ្នាំដដែលនេះ Samart United បានក្លាយជាម្ចាស់ជើងឯកលីកលើកដំបូង។ ក្នុងនាមជាម្ចាស់ការពារតំណែងជើងឯក ក្រុមរបស់កម្ពុជាមួយនេះបានទៅចូលរួមប្រកួតក្នុងកម្មវិធីAsian Club Championshipតែចាញ់ក្រុមPetrokimia Putra នៃប្រទេសឥណ្ឌូណេស៊ី។

ក្នុង ឆ្នាំ២០០៥ ក្រុម Samartត្រូវបានប្ដូរទៅជាក្រុមHello United វិញនិងបានបញ្ចប់រដូវកាលដោយជាប់ចំណាត់ថ្នាក់លេខ២ពីព្រោះចាញ់ ក្រុមខេមរាកីឡា ៣-០។ តែឆ្នាំនោះ កីឡាករ ហុក សុជីវ័នដែលជាប្អូនប្រុសរបស់លោកហុក សុចិត្រាស៊ុតបញ្ចូលទីបានច្រើនជាងគេរហូតដល់២២គ្រាប់។ Hello United ក៏បានចូលរួមប្រកួតក្នុងAFC President’s Cup លើកដំបូងតែ ធ្លាក់ក្នុងជុំដំបូងបើទោះជាឈ្នះ ២-១លើកក្រុម WAPDAរបស់ប៉ាគីស្ថានក៏ដោយ។

ឆ្នាំ២០០៦ Hello United ត្រូវបានប្ដូរទៅជាPhnom Penh Unitedហើយក្រុមស្ថិតនៅលំដាប់កំពូលក្នុងតារាងនេះបែរជាចាញ់ ការប្រកួតPlay-offផ្ដាច់ព្រ័ត្រនឹងក្រុមខេមរាកីឡាទៅវិញក្នុង លទ្ធផលប្រផុតប្រផើយ ៤-៥ នៅពីមុខអ្នកចូលទស្សនាប្រមាណ១០០០០នាក់ឯពហុកីឡដ្ឋានជាតិ អូឡាំពិក។

ឈ្មោះ Phnom Penh Empire ឆ្នាំ២០០៧ ក្រុម Khmer Empire និង Phnom Penh United ត្រូវបានបញ្ចូលគ្នាក្លាយជាក្លិប Phnom Penh Empire។ ក្រុមចាស់ឈ្មោះថ្មីនេះទទួលបានចំណាត់ថ្នាក់លេខ៣ ចំពេលដែលក្រុមណាហ្គាខបជាម្ចាស់ជើងឯក។ ឆ្នាំ២០០៨ Phnom Penh Empire ឈ្នះពានរង្វាន់សម្ដេចហ៊ុន សែនដោយផ្ដួលក្រុមព្រះខ័នរាជ ១-០។ មួយគ្រាប់របស់Phnom Penh Empire ស៊ុតដោយកីឡាករ Anucha Chuaisri ។

ឈ្មោះ Phnom Penh Crown ឆ្នាំ២០០៩ ពីPhnom Penh Empireត្រូវបានប្ដូរម្ដងទៀតទៅជាក្រុមភ្នំពេញក្រោន (Phnom Penh Crown)ដល់សព្វថ្ងៃដែលទទួលបានការឧបត្ថម្ភពី កាស៊ីណូក្រោន(Crown Casino)ហើយកាលនោះក្រុមនេះបានបញ្ចប់ទៅក្នុងលំដាប់ថ្នាក់លេខ៤ ក្នុងតារាង តែក្រុមបានឈ្នះពានរង្វាន់សម្ដេចហ៊ុន សែនជាលើកទី២ដោយបានយកឈ្នះលើក្រុមណាហ្គាខប១-០។ គ្រាប់ជ័យជម្នះរបស់ក្រោនរកបានដោយកីឡាករ កែវ សុខង៉ន។

ក្នុង ឆ្នាំ២០០៩ដដែលនោះ ភ្នំពេញក្រោនមិនអាចឆ្លងដល់ជុំបន្តនៃកម្មវិធីAFC President’s Cupឡើយបើទោះបីជាឈ្នះក្រុមBhutan’s Yeedzinក៏ដោយ តែក្រុមនេះបានចាញ់ពីរប្រកួតក្នុងចំណោមបីប្រកួត។ ឆ្នាំជាមួយគ្នានោះ ក្រោនបានយកឈ្នះក្រុម Young Lionsក្នុងSingapore Cupនិងបានឆ្លងដល់វគ្គ១/៨ផ្ដាច់ព្រ័ត្រតែធ្លាក់ក្រោមស្នាដៃ ក្រុមBangkok Glass មកពីប្រទេសថៃ។

ឆ្នាំ២០១០ ក្នុងឆ្នាំ២០១០ ភ្នំពេញក្រោនបានក្លាយជាម្ចាស់ជើងឯកពានរង្វាន់មិត្តហ្វូន ខេមបូឌានលីកដោយបានយកឈ្នះក្រុមព្រះខ័នរាជ៤-៣ក្នុងវគ្គផ្ដាច់ ព្រ័ត្រ។ ក្នុងឆ្នាំនោះដែរក្រោនអាចទទួលបានពានរង្វាន់សម្ដេចហ៊ុន សែនលើកទី៤ តែត្រូវភ្លាត់ស្នៀតចាញ់ក្រុមក្រសួងការពារជាតិក្នុងលទ្ធផល ២-៣ទៅវិញ។

ក្រោយបញ្ចប់រដូវកាលឆ្នាំ២០១០ អ្នកចាត់ការ បែ មករា និងគ្រូបង្វឹកសញ្ជាតិថៃApisit Im Amphaiបានចាកចេញពីក្លិបទៅបម្រើការងារនៅក្នុងប្រទេសថៃ តែជំនួសដោយគ្រូបង្វឹក Bojan Hodak សញ្ជាតិក្រូអាត។

ឆ្នាំ២០១១ ភ្នំពេញក្រោនបានឆ្លងផុតវគ្គជម្រុះ AFC President’s Cup 2011ក្នុងពូលA ដោយឈ្នះពីរប្រកួតនិងចាញ់មួយប្រកួតពីថ្ងៃទី២១-២៥ ឧសភាដែលកម្ពុជាជាម្ចាស់ផ្ទះ។ ក្នុងនោះក្រោនយកឈ្នះAbahani Limited មកពីបង់ក្លាដេស ១-០ដែលស៊ុតបញ្ចូលទីដោយចាន់ ឆាយ៉ានិងឈ្នះDon Bosco៣-០ មកពីស្រីលង្កាដែលស៊ុតដោយ ចាន់ ឆាយ៉ា, គួច សុកុម្ភៈ និងKingsley Njoku Metu តែចាញ់ក្រុម Neftchi របស់កៀហ្ស៊ីស៊ីស្ថាន១-០។ ជ័យជម្នះពីរប្រកួតក្រោនទទួលបាន៦ពិន្ទុដោយឈរលំដាប់លេខពីរ ក្នុងតារាងនិងអាចឡើងទៅប្រកួតនៅជុំបន្ត។

បន្ទាប់ពីដឹកនាំក្រុមភ្នំពេញក្រោនបានចំនួន៦ប្រកួតនៅក្នុង ក្របខ័ណ្ឌមិត្តហ្វូនខេមបូឌានលីក២០១១និងនាំឲ្យក្រុមឈរលំដាប់កំពូល តារាងហើយថែមទាំងជួយក្រុមឲ្យឆ្លងផុតវគ្គជម្រុះAFC President’s Cup លោកBojan Hodak បានចាកចេញពីភ្នំពេញក្រោនទៅវិញនាដើមខែមិថុនាឆ្នាំ២០១១ នេះដើម្បីទទួលតួនាទីជាជំនួយការគ្រូបង្វឹកក្លិបShandong Luneng FCរបស់ប្រទេសចិន។

កីឡដ្ឋាន កីឡដ្ឋានបាល់ទាត់របស់ភ្នំពេញក្រោនមានទីលានចំនួន២គឺទីមួយ សម្រាប់ហ្វឹកហាត់ និងទីពីរសម្រាប់ការប្រកួតផ្លូវការ។ ទីលាន ទាំងពីរដាំស្មៅធម្មជាតិដែលបង្កប់ដោយប្រព័ន្ធទុយោទឹក ហើយដាក់ដីខ្សាច់ពីលើ និងដាំស្មៅដើម្បីឲ្យទឹកហូរច្រោះបានលឿនពោលគឺត្រឹមតែ១៥ទៅ ២០នាទីទឹកហូរអស់ បន្ទាប់ពីភ្លៀងហើយអាចធ្វើការប្រកួតវិញបានធម្មតា ព្រមទាំងមានអគារ និងបន្ទប់សម្រាប់ការបណ្តុះបណ្តាល និងរៀបចំការប្រកួតគ្រប់លក្ខណៈ។ កីឡដ្ឋាននេះមានឈ្មោះថា RSN Stadium ស្ថិតនៅក្រុមទី១៣ សង្កាត់ទូលសង្កែ ខណ្ឌឫស្សីកែវ រាជធានីភ្នំពេញ។

បង្ហាញខ្លួនក្នុងAFC President’s Cup ៤ដង -ឆ្នាំ២០០៥ធ្លាក់ក្នុងវគ្គជម្រុះក្នុងពូល(Group Stage) -ឆ្នាំ២០០៩ធ្លាក់ក្នុងវគ្គជម្រុះក្នុងពូល(Group Stage) -ឆ្នាំ២០១១ ជើងឯករង -ឆ្នាំ២០១២ ធ្លាក់ក្នុងវគ្គជម្រុះក្នុងពូល (Group Stage)

ASEAN Competitions(១ដង) -ឆ្នាំ២០០៣ ធ្លាក់វគ្គជម្រុះក្នុងពូល(Group Stage)

Singapore Cup ៦ដង -ឆ្នាំ២០០៧ ជុំទី១ (First Round) -ឆ្នាំ២០០៨ ជុំទី១(First Round) -ឆ្នាំ២០០៩វគ្គ១/៨ផ្ដាច់ព្រ័ត្រ(Quarter-finals) -ឆ្នាំ២០១០ ជុំទី១(First Round) -ឆ្នាំ២០១១ ជុំទី១(First Round) -ឆ្នាំ២០១២ ជុំទី១ (First Round)

ចំណាត់ថ្នាក់លេខ២(Runner-up) -ទទួលបានចំណាត់ថ្នាក់លេខ២ពានរង្វាន់មិត្តហ្វូនខេមបូឌានលីក២០០៥និង២០០៦ -ទទួលបានចំណាត់ថ្នាក់លេខ២ពានរង្វាន់សម្ដេចហ៊ុន សែនលើកទី៤ឆ្នាំ២០១០

ស្នាដៃទទួលបាន -ទទួលបានពានរង្វាន់មិត្តហ្វូនខេមបូឌានលីកឆ្នាំ២០០២, ២០០៨, ២០១០, ២០១១ និង២០១៤ -ទទួលបានពានរង្វាន់សម្ដេចហ៊ុន សែនឆ្នាំ២០០៨ និង ២០០៩

គ្រូបង្វឹក ឆ្នាំ២០០៨-២០១០ គ្រូបង្វឹកសញ្ជាតិថៃ Apisit Im Amphai ឆ្នាំ២០១១-២០១១ គ្រូបង្វឹកសញ្ជាតិក្រូអាត Bojan Hodak ឆ្នាំ២០១១-២០១២ គ្រូបង្វឹកសញ្ជាតិអង់គ្លេស David Booth ឆ្នាំ២០១២-បច្ចុប្បន្ន គ្រូបង្វឹកសញ្ជាតិស្វីស Sam Schweingruber