ឆយី ត្រដាបត្រដួសម្នាក់ឯង ដើម្បីអនាគតកូនស្រី

2016-06-01 14:31:20
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លងមកមិនសូវឃើញវត្តមានតារាសម្ដែងស្រីសិចស៊ី ឆយី ក្នុងកម្មវិធីសិល្បៈនានា នាងប្រាប់ថា កំពុងជាប់រវល់រកស៊ីលក់ឡេផ្ទាល់ខ្លួនតាមអនឡាញដើម្បីអនាគតកូនស្រីបណ្ដូលចិត្តតែម្នាក់គត់របស់នាង។

“បងមិនបានទៅណាទេអូន សិល្បៈក៏បងនៅតែប្រឡូកដដែល ពីមុនបងផ្អាកមែន គ្រាន់តែឥឡូវបងរវល់ជាមួយការងាររកស៊ីពេក ទើបមិនសូវបានទួលការងារសិល្បៈ។ ពេលនេះទាន់ឱកាសនាងនៅតូច ដូច្នេះបងត្រូវតែខំ បងត្រូវការសន្សំលុយឲ្យបានច្រើនត្រៀមសម្រាប់អនាគតគាត់ ទោះបីបងពិបាកត្រដាបត្រដួសប៉ុណ្ណាក៏ដោយ ប៉ុន្តែអនាគតកូនគឺសំខាន់សម្រាប់បង"។ ឆយី ថ្លែងប្រាប់ Sabay។

ជាមួយគ្នានេះ តារាស្រីនិយមស្លៀកសិចស៊ី បន្តឲ្យដឹងទៀតថា មានក្រុមហ៊ុន និងតាមស្ថានីយទូរទស្សន៍ទាក់ទងមកដែរ ប៉ុន្តែការងាររកស៊ី ក៏រវល់ទើបបន្ថយទទួលការងារសិល្បៈខ្លះ។ យ៉ាងណាមិញ ឆយី បន្ថែមទៀតថា បើទោះបីជាដំណើរជីវិតកន្លងមកធ្លាប់រងកាត់ព្យុះភ្លៀងយ៉ាងណា នាងនឹងមិនឲ្យកូនស្រី ដើរតាមគន្លងដូចនាងឡើយ។

តួស្រីក្នុងរឿង "រាជិនីដួងចិត្ត" បន្ថែម៖ "បងធ្លាប់ឆ្លងកាត់រឿងរ៉ាវជូរចត់ ញ៉ាំអំបិលប្រហុកតែបងមិនឲ្យ កូនបងដើរតាមគន្លងបងទេ។ រាល់ថ្ងៃបង ទោះមានអ្នកណាពេបជ្រាយ និយាយមិនល្អពីបងយ៉ាងណា ក៏ដោយ ក៏បងមិនដែលខ្វល់ដែរ បងអហោសិកម្មឲ្យគ្រប់បែបយ៉ាង"។