អប់រំកូនបែបណាទើបល្អ?

2016-06-01 18:11:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ការអប់រំកូនឲ្យបានល្អ មិនមែនជារឿងងាយស្រួលនោះទេ គឺទាមទារឲ្យមានវិធីសាស្ត្រត្រឹមត្រូវ និងការអត់ធ្មត់។ ឪពុកម្តាយមួយចំនួនអាចជួបការលំបាកលើបញ្ហានេះ។

មានមុខរបរជាអ្នកបោះពុម្ពផ្សាយសៀវភៅនៅភ្នំពេញ អ្នកស្រី ហេង ដារី បានចែករំលែកបទពិសោធន៍ថា ត្រូវធ្វើជាមិត្តជាមួយកូន មិនមែនជាអ្នកគ្រប់គ្រងកូននោះទេ។ នេះមានន័យថា ត្រូវចេះសម្របខ្លួនជាមួយកូន ជាជាងឲ្យកូនសម្របខ្លួនជាមួយនឹងយើង។

អ្នកម្តាយរបស់កូនពីរនាក់រូបនេះក៏បានបន្ថែមថា ពេលខ្លះអ្នកស្រីត្រូវឆ្លៀតពេលដ៏មមាញឹកពីការងារដើម្បីមានភាពស្និទ្ធស្នាលជាមួយកូន។

រូបតំណាង

ចំណែកអ្នកស្រី លក្ខិណា ដែលមានមុខរបរជាមន្ត្រីរាជការវិញ បានបញ្ជាក់ថា ត្រូវផ្ដល់ជូនកូនឲ្យបានគ្រប់គ្រាន់ទាំងការរៀន ទាំងការលេង និងកីឡា។ អ្នកស្រីបានបញ្ជាក់ថា «ក្រៅពីការរៀនសូត្រ ខ្ញុំនាំកូនទៅដើរកម្សាន្តតាមផ្សារទំនើប ឬសួនកុមារជាដើមនៅថ្ងៃឈប់សម្រាក ដោយមិនបង្ខំកូនឲ្យគិតតែពីរៀនគ្មានពេលសម្រាកនោះទេ»។

ទោះជារវល់នឹងការងារយ៉ាងណាក៏ដោយ ក៏ព្យាយាមតាមដានការសិក្សារបស់កូនៗ តាមរយៈការសួរសំណួរផ្សេងៗ ពេលនៅជាមួយគ្នា។ នេះជាការលើកឡើងរបស់លោក បូរិន បច្ចុប្បន្នជាពាណិជ្ជករមួយរូប។ បុរសដែលមានកូនស្រីអាយុ៨ឆ្នាំម្នាក់ និងប្រុសអាយុ៦ឆ្នាំរូបនេះ បន្ថែមថា «ពេលនេះគេធំៗហើយ និយាយស្តាប់គ្នាយល់ដូច្នេះ របៀបប្រដៅក៏ខុសពីការនៅពីតូចៗដែរ ខ្ញុំយកចិត្តទុកដាក់ខ្លាំងលើវិន័យ និងទម្លាប់ផ្សេង»។ ស្ទើររៀងរាល់យប់ បុរសកូនពីររូបនេះតែងបបួលកូនៗអានសៀវភៅរឿងនិទានខ្លីៗមុនគេង ដោយធ្វើបែបនេះតាំងពីកូនៗអាយុ ២ ឬ ៣ឆ្នាំមកម្ល៉េះ ដែលរហូតមកដល់ពេលនេះទៅជាទម្លាប់ បើថ្ងៃណាលោកអស់កម្លាំងភ្លេចអានសៀវភៅជាមួយគេ ពួកគេមិនសុខចិត្តឡើយ។

រូបតំណាង

អះអាងស្រដៀងគ្នានឹងឪពុកម្តាយខាងលើដែរ អ្នកស្រី សុគន្ធា ជាម្តាយក្មេងប្រុសអាយុ ៣ឆ្នាំកន្លះម្នាក់ បានឲ្យដឹងថា កូនប្រុសលោកស្រី រពឹសខ្លាំងណាស់ ដូច្នេះហើយទាមទារឲ្យអ្នកស្រីចំណាយពេលវេលាច្រើននៅជាមួយកូន។ «ខ្ញុំយកចិត្តទុកដាក់ខ្លាំងលើការបង្រៀនគេឲ្យចេះនិយាយប្រាប់ហេតុផលជាជាងការយំទទូចឲ្យយើងធ្វើអ្វីមួយឲ្យគេ។ ខ្ញុំមិនបន្លាចគេឲ្យខ្លាចដើម្បីឈប់ធ្វើអ្វីមួយទេ គឺត្រឹមដាក់ទណ្ឌកម្មឲ្យអង្គុយកៅអីនៅស្ងៀមប្រហែល ៥ ទៅ ១០ នាទីប៉ុណ្ណោះ។ មួយវិញទៀត ខ្ញុំព្យាយាមជាមួយគេឲ្យបានច្រើន និងមិនស្ដីបន្ទោស ឬវាយដំពេលដែលគេធ្វើខុសឡើយ»។

តើមាតាបិតាដទៃទៀតយល់ស្របនឹងវិធីសាស្ត្រអប់រំទាំងអស់នេះ ឬក៏មានអ្វីផ្សេងទៀត?