ឱកាសស្វែងយល់អាជីវកម្មកម្ពុជាក្នុងពិព័រណ៍ធុរៈកិច្ចអន្តរជាតិ ២០១៦

2016-06-21 18:56:35
ចំនួនមតិ 0 | ចំនួនចែករំលែក 0

ចន្លោះមិនឃើញ

សភាយុវពាណិជ្ជករអន្តរជាតិកម្ពុជា (JCI Cambodia) បានប្រកាសអនុវត្តគម្រោងមួយថ្មីទៀត គឺ «ពិព័រណ៍ធុរៈកិច្ចអន្តរជាតិប្រចាំឆ្នាំ២០១៦»។ នេះជាព្រឹត្តិការណ៍ដ៏ធំមួយដែលនាំមកនូវទំនាក់ទំនងពាណិជ្ជកម្មក្នុងនិងក្រៅស្រុក តាមរយៈបណ្តាញសមាគមសភាយុវពាណិជ្ជកម្មអន្តរជាតិ។

ថ្លែងក្នុងសន្នីសីទសារព័ត៌មានលើកទី១កាលពីម្សិលមិញ លោក សុត សុធារៈ ប្រធានគ្រប់គ្រងគម្រោងពិព័រណ៍ធុរៈកិច្ចឆ្នាំ២០១៦ នេះ ឲ្យដឹងថា គោលបំណងសំខាន់នៃការរៀបចំពិព័រណ៍នេះ គឺដើម្បីចូលរួមលើកកម្ពស់សេដ្ឋកិច្ច ក៏ដូចជាវិស័យធុរៈកិច្ចនៅកម្ពុជា តាមរយៈការបង្កើតឱកាសផ្សព្វផ្សាយម៉ាកយីហោ និងផលិតផលសេវាកម្មរបស់អាជីវកម្ម បង្កើនឱកាសជួបគ្នារវាងម្ចាស់អាជីវកម្ម និងអ្នកវិនិយោគ រួមទាំងបង្កើតឱកាសតាំងបង្ហាញផលិតផល និងសេវាកម្មរបស់អាជីវកម្មក្រៅស្រុក។

ពិព័រណ៍ធុរៈដែលនឹងរៀបចំនៅថ្ងៃទី២៧ ខែសីហា ខាងមុខនេះ នឹងផ្តោតទៅលើវិស័យធំៗចំនួន៣ គឺវិស័យអចលនទ្រព្យ វិស័យភេសជ្ជៈ-ចំណីអាហារ និងវិស័យផលិតផលសរីរាង្គ។ រីឯកម្មវិធីវិញបែងចែកជា២ គឺ ពិព័រណ៍ដែលមានស្តង់ពាណិជ្ជកម្មចំនួន៥០ និងសិក្ខាសាលាស្តីពី ឱកាសអាជីវកម្មនៅកម្ពុជាក្នុងវិស័យសំខាន់ៗទាំងបីខាងលើ ។ អ្វីដែលកាន់តែពិសេសនោះក្នុងឆ្នាំនេះផងដែរពិព័រណ៍ធុរៈកិច្ចអន្តរជាតិនឹងរួមបញ្ចូលការចែករំលែក បទពិសោធរបស់សហគ្រិនជោគជ័យផងដែរ។

នេះជាឱកាសសម្រាប់អ្នកដែលមានបំណងវិនិយោគទាំងក្នុងនិងក្រៅស្រុក រួមទាំងអ្នក ដែលចង់ស្វែងយល់ពីឱកាសវិនិយោគអាជីវកម្ម។ នៅចាំអីទៀត ត្រៀមខ្លួនចូលរួមព្រឹត្តការណ៍ពិព័រណ៍ធុរៈកិច្ចដ៏ធំប្រចាំឆ្នាំ២០១៦នេះ។

សំបុត្រនៃការចូលរួមក្នុងសិក្ខាសាលា និងស្តង់ពាណិជ្ជកម្ម ចាប់ផ្តើមបើកលក់ចាប់ពីថ្ងៃនេះតទៅ ។ សម្រាប់ព័ត៌មានលម្អិតនៃពិព័រណ៍នេះ សូមទាក់ទងលេខទូរសព្ទ ០១៧ ៥៩ ៤៦ ១៩ ឬ ០១៥ ៧១ ៧២ ៥៣ ឬតាមរយៈអ៊ីម៉ែល sothearak2510@gmail.com/jci.phnompenh@gmail.com

អត្ថបទៈ ឆៃ យ៉ារិទ្ធ