Van Gaal ប្រាប់ពីមូលហេតុលក់ Welbeck ខ្ចី Falcao

2014-09-13 15:19:11
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លិបបិសាចក្រហមលោក Louis van Gaal បានបញ្ជាក់ពីហេតុផលដែលលោកលក់កីឡាករ Danny Welbeck ឱ្យក្លិប Arsenal គឺដោយសារខ្សែប្រយុទ្ធរូបនេះមានទម្រង់លេងមិនដល់កីឡាករ Wayne Rooney និង Robin van Persie។

ការ លក់កីឡាករបណ្ដុះចេញពីយុវជនថ្នាល Welbeck ទៅឱ្យក្លិបកាំភ្លើងធំ Arsenal ដែលជាគូប្រជែងនៅ Premier League ក្នុងតម្លៃ១៦លានផោន(២៦លានដុល្លារអាមេរិក) បណ្ដាលឱ្យមានការរិះគន់និងចោទជាសំណួរមួយចំនួនចំពោះអ្វីដែលលោក Van Gaal កំពុងធ្វើ។

នៅ ក្នុងសន្និសីទកាសែតបង្ហាញខ្លួនសមាជិកថ្មីចុងក្រោយគេពីររូបជា ផ្លូវការគឺ Radamel Falcao និង Daley Blind លោក Van Gaal បានពន្យល់ថា៖ “យើងបាននិយាយគ្នាជាមួយ Welbeck និង Chicharito មុនពេលយើងមានឱកាសទទួលបានខ្សែប្រយុទ្ធថ្មី Radamel Falcao។ ខ្ញុំបានផ្ដល់ឱកាសដល់កីឡាករគ្រប់គ្នាដើម្បីបង្ហាញសមត្ថភាពរបស់ ពួកគេឱ្យខ្ញុំមើល តាំងពី Pre-season រហូតដល់រដូវកាលចាប់ផ្ដើម។ Danny Welbeck នៅ Man Utd តាំងពីអាយុ៩ឆ្នាំ។ គាត់បានលេងនៅទីនេះ៣រដូវកាល បន្ទាប់ពីត្រូវក្លិប Sunderland ខ្ចីជើង ប៉ុន្តែគាត់អត់មានកំណត់ត្រាល្អដូច Van Persie ឬ Rooney ដែលជាកម្រិតស្តង់ដារយើងចង់បាននោះទេ។ អីចឹងហើយទើបយើងសម្រេចឱ្យគាត់ចាកចេញ ដើម្បីយក Falcao ដែលជាកំពូលខ្សែប្រយុទ្ធដ៏គ្រោះថ្នាក់បំផុតម្នាក់លើលោកមក Old Trafford ព្រោះមិនងាយមានឱកាសយកបានកីឡាករឆ្នើមបែបនេះទេ”។

អ្នកចាត់ការ ដែលឈ្នះពាននៅ Ajax, Barcelona, AZ Alkmaar, Bayern Munich និងនាំហុល្លង់ជាប់លេខ៣នៅ FIFA World Cup 2014 បន្ថែមថា៖ “យើងបានទិញកីឡាករ៥នាក់និងខ្ចីជើងម្នាក់ នោះគឺ Falcao។ យើងប្រហែលជាអាចទិញគាត់ផ្ដាច់នៅរដូវកាលក្រោយ។ យើងក៏ត្រូវបណ្ដុះយុវជនដែរ នេះហើយជាគោលការណ៍របស់ Manchester United។ យើងបានឱ្យកីឡាករ១៤នាក់ចាកចេញ ហើយនាំចូលវិញ៦នាក់។ បើអ្នកមិនឱ្យកីឡាករផ្លាស់ចេញទៅក្លិបដទៃទេ នោះអ្នកនឹងមិនមានសល់ឱកាសសម្រាប់ផ្ដល់ឱ្យយុវជនបង្ហាញសមត្ថភាព ឡើយ។ យើងបានផ្ដល់ឱកាសដល់យុវជនរួចមកហើយ ហើយយើងតែងតែមានកីឡាករយុវជនថ្នាលនៅក្នុងឈុតធំរបស់ក្លិប។ នេះជាគោលការណ៍របស់ក្លិប។ ប៉ុន្តែសំខាន់នៅត្រង់ថាតើពួកគេមានសមត្ថភាពចាប់យកឱកាសទាំង នេះដែរឬអត់? ខ្ញុំមិនអាចយកឱកាសនេះទៅឱ្យពួកគេបានទេ គឺពួកគេត្រូវប្រឹងប្រែងចាប់យកវាដោយខ្លួនឯង ហើយកីឡាករក្មេងៗទាំងអស់ក៏ត្រូវតែដឹងពីរឿងនេះដែរ។ ខ្ញុំជឿថា Manchester United ជ្រើសយកខ្ញុំគឺដោយសារមូលហេតុនេះហើយ”។

ខ្សែ ប្រយុទ្ធជម្រើសជាតិអង់គ្លេសវ័យ២៣ Welbeck លេងឱ្យឈុតធំរបស់ក្រុមបិសាចក្រហម៥២ប្រកួតស៊ុតចូលតែ១០គ្រាប់ ប៉ុណ្ណោះ ខណៈ៥៦ប្រកួតចុងក្រោយរបស់ Rooney ស៊ុតចូល២៩គ្រាប់ ហើយ៥៩ប្រកួតរបស់ Van Persie ស៊ុតចូល៣៨គ្រាប់៕

ប្រែសម្រួល៖ សុខ មុន្នីរម្យ ប្រភព៖ manutd