ពីក្មេងលើកតែ ក្លាយជាមហាសេដ្ឋីទាំងវ័យ១៩ឆ្នាំ

2016-08-17 16:06:17
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតវ័យទើប១៩ឆ្នាំមួយរូប បានវិវឌ្ឍខ្លួនក្លាយជាមហាសេដ្ឋីប្រាក់រាប់លានដុល្លារ និងអាចទិញរថយន្តទំនើបម៉ាក Bentley ជិះដោយខ្លួនឯង ក្រោយខិតខំព្យាយាមធ្វើជំនួញរយៈពេលបីឆ្នាំ។

Robert Mfune រស់នៅប្រទេសអង់គ្លេស បានចាប់ផ្ដើមធ្វើការក្រៅម៉ោង ២កន្លែងពេលអាយុ ១៦ឆ្នាំ នៅហាង McDonald ជាអ្នកលើកតែ និងក្នុងក្រុមហ៊ុនហិរញ្ញវត្ថុមួយ ខណៈខ្លួនកំពុងរៀនថ្នាក់មហាវិទ្យាល័យ ដើម្បីស្វែងយល់ពីការចំណូលចំណាយរបស់ក្រុមហ៊ុនមួយ។

ក្រោយធ្វើការនៅទីនោះដឹងពីវិធីរកស៊ី គេបានសម្រេចចិត្ត ធ្វើជំនួញខ្នាតតូចខ្លួនឯងនៅទីក្រុង Southamton នៅអាយុ ១៧ឆ្នាំ រហូតមានលុយទិញ Bentley តម្លៃជិត ១៧ម៉ឺនដុល្លារ ថែមទាំងទិញផ្ទះ និងរថយន្តមួយគ្រឿងទៀតឲ្យម្ដាយតម្លៃជិត ១៧ម៉ឺនដុល្លារ។

ជំនួញរបស់គេ គឺបើកហាងកាហ្វេពីរកន្លែង និងទិញផ្ទះទុកលក់មួយកន្លែងនៅអង់គ្លេស និងវិនិយោគវិស័យអចលនទ្រព្យនៅប្រទេសកំណើតអាហ្វ្រិកខាងត្បូងផ្សេងទៀត។ អ្នកជំនួញវ័យក្មេងរូបនេះនិយាយថា "ទៅរៀននៅសាលា ហើយធ្វើការជាក្មេងលើកតែឲ្យភ្ញៀវនៅហាង McDonald បណ្ដើរ គឺជាកិច្ចការលំបាកសម្រាប់ជីវិតខ្ញុំ តែខ្ញុំនៅតែព្យាយាម"។

Mfune និងម្ដាយបានផ្លាស់ទៅរស់នៅទីក្រុង Southampton ជាមួយគ្នានៅឆ្នាំ ២០០៩ កាលគេអាយុ១២ឆ្នាំ។ យុវជនរូបនេះប្រាប់ពីការសិក្សារវិញថា គាត់ភ្ញាក់ផ្អើលមែនទែន ក្រោយរៀនចប់ទទួលបានពិន្ទុកម្រិត A -Level ទោះជាខ្លួនមានការងារច្រើនពេលកំពុងសិក្សាក៏ដោយ៕