សំ វ៉ាន់ដេត៖ បឹងកេតត្រូវការឈ្នះ តែស្វាយរៀងក៏ចង់ឈ្នះដើម្បីអ្នកគាំទ្រដែរ
- 2016-08-19 15:48:38
- ចំនួនមតិ 0 | ចំនួនចែករំលែក 0
សំ វ៉ាន់ដេត៖ បឹងកេតត្រូវការឈ្នះ តែស្វាយរៀងក៏ចង់ឈ្នះដើម្បីអ្នកគាំទ្រដែរ
ចន្លោះមិនឃើញ
លោក សំ វ៉ាន់ដេត គ្រូបង្វឹកក្លឹបបាល់ទាត់ព្រះខ័នរាជស្វាយរៀងចង់ឈ្នះក្រុមភ្ញៀវបឹងកេតអង្គរដើម្បីផ្គាប់ចិត្តអ្នកគាំទ្រ ស្របពេលក្លឹបរបស់លោក ប្រាក់ សុវណ្ណារ៉ា ត្រូវការឈ្នះជាចាំបាច់ក្នុងការប្រជែងលើកពានលីគកំពូលកម្ពុជា សម្រាប់សប្ដាហ៍ទី១៧ វេលាម៉ោង៦:០០ល្ងាចនេះនៅកីឡដ្ឋានខេត្តស្វាយរៀង។
ក្រុមព្រះខ័នរាជស្វាយរៀងបានបាត់បង់ឱកាស ក្នុងការដណ្ដើមយកពានលីគកំពូលកម្ពុជាឆ្នាំ២០១៦ ពីព្រោះពិន្ទុមានគំលាតឆ្ងាយពីក្រុមកំពូលតារាង បើទោះការប្រកួតរបស់ក្រុមមួយនេះនៅសល់ ២ប្រកួតក្រោយជំនួបល្ងាចនេះទៀតក៏ដោយ។
លោក សំ វ៉ាន់ដេត បានឲ្យដឹងថា ក្រុមរបស់លោកក៏ចង់ឈ្នះដើម្បីផ្គាប់ចិត្តអ្នកគាំទ្រដែរ បើទោះអស់ឱកាសដណ្ដើមពាន។ ចំពោះកីឡាករពេញជើងល្អណាស់ សម្រាប់ការប៉ះបឹងកេតល្ងាចនេះ។ លោកពិតជាសោកស្ដាយ ដែលព្រះខ័នរាជស្វាយរៀងបាត់បង់ឱកាសក្នុងការលើកពាន ប៉ុន្តែក្រុមភ្ញៀវមិនងាយយកឈ្នះក្រុមរបស់លោកដែលជាម្ចាស់ផ្ទះឡើយ។
គ្រូបង្វឹកដែលដឹកនាំស្វាយរៀងឲ្យលើកពាន Hun Sen Cup 2015 រូបនេះបន្តថា ការប្រកួតមិនមានបន្ធូរបន្ថយនោះទេ។ ប្រសិនបើបឹងកេតខ្លាំង នោះនឹងអាចលើកពានលីគឆ្នាំនេះ ដោយយកឈ្នះស្វាយរៀងនៅក្រៅដី ដែលជាជំនួបដ៏សំខាន់មួយនេះ។
ងាកទៅខាងលោក ប្រាក់ សុវណ្ណារ៉ា គ្រូបង្គោលក្រុមបឹងកេតអង្គរវិញលើកឡើងថា ក្រុមលោកនឹងដាក់កីឡាករល្អៗ និងលេងឲ្យអស់សមត្ថភាពពោលគឺគ្មានទុកជើងសោះឡើយ។ ប្រសិនបើឈ្នះស្វាយរៀងក្រុមរបស់លោករំពឹងលើកពាន ៩០% បើទោះត្រូវប៉ះប៉ូលិសនាជំនួបចុងក្រោយក៏ដោយ។
ក្រុមព្រះខ័នរាជស្វាយរៀងមាន ២៥ពិន្ទុឈរលេខ៥ ឆ្លងកាត់ការប្រកួតចំនួន ១៥លើក។ ចំណែកបឹងកេតអង្គរមាន ៤១ពិន្ទុក្នុងចំណោម១៦ប្រកួតឈរលេខ ១តាមប្រកៀកពីក្រោយដោយក្លឹបក្រសួងការពារជាតិមាន៤០ពិន្ទុ។ ដូច្នេះមានន័យថា ប្រសិនបើបឹងកេតភ្លាត់ស្មើឬចាញ់ ហើយក្រសួងការពារជាតិឈ្នះវិញ នោះលេខ១នឹងបានទៅលើក្រុមរបស់លោក ទេព ឡុងរចនា វិញជាបណ្ដោះអាសន្ន៕
ក្រុមបឹងកេតអង្គរ
អត្ថបទ៖ ស្រី សុវណ្ណដារ៉ា