វិធីសាស្ត្របីយ៉ាងធ្វើជីធម្មជាតិដោយខ្លួនឯង មិនចាំបាច់ប្រើជីគីមី

2016-08-26 18:37:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រើប្រាស់ជីធម្មជាតិ លើផលដំណាំ បន្លែ ផ្លែឈើហូបផ្លែ ជាសកម្មភាពមួយដែលបងប្អូនខ្មែរនិយមគាំទ្រ ព្រោះវាមានភាពល្អប្រសើរជាង ជីគីមីដែលប៉ះពាល់ដល់សុខភាព។ ដើម្បីជាការចែករំលែកដល់កសិករ នូវវិធីធ្វើជីសរីរាង្គ លោកឥន្ទ សុខសាន្ត អ្នកឯកទេសផ្នែកជីធម្មជាតិ បានណែនាំពីវិធីសាស្រ្តចំនួនបីដូចយ៉ាងក្រោម៖

លោកឥន្ទ សុខសាន្ត អ្នកឯកទេសផ្នែកជីធម្មជាតិ

***វិធីសាស្ត្រទី១ ការធ្វើជីហប់ (សំបូរជាតិអាសូត និងផូស្វ័រ) ធាតុផ្សំ៖

ស្លឹកទន្ទ្រានខេត្ត ស្លឹកចន្ទគីរី ឬស្លឹកអម្ពិលបារាំង ដែលអាចរកបានក្នុងចំនួនមួយសមល្មម
លាមកគោសើម បីបង្គី របៀបធ្វើ៖
យកស្លឹកទន្ទ្រានខេត្ត ឬស្លឹកអម្ពិលបារាំងលាយជាមួយលាមកគោ ច្រកក្នុងថង់ប្លាស្ទិករួចចងមាត់ឲ្យជិត។
ជីកដីកប់ថង់ជីខាងលើនោះរយៈពេល១០ ទៅ១២ថ្ងៃ។
គ្រប់រយៈពេល១០ ទៅ១២ថ្ងៃ កាយយកជីទៅដាក់ក្នុងពាងមួយចំណុះ៣០០លីត្រ រួចបូមទឹកដាក់ចូល។ ពេលនោះអ្នកបានជីហប់សម្រាប់ប្រើប្រាស់ ដោយពេលយកទៅប្រើគឺអាចដួសជីមួយបោយ (១លីត្រ) លាយជាមួយទឹកមួយធុងប៉េត្រូ (១៦លីត្រ) រួចយកទៅស្រោចដំណាំបាន។

***វិធីសាស្ត្រទី២

គល់ចេកចិតរួច ៨គ.ក. ដាក់ត្រាំក្នុងទឹកបីលីត្រ រយៈពេល៨ថ្ងៃ
ស៊ុតទាឬស៊ុតមាន់គោះដាក់ក្នុងក្រឡមួយឲ្យបាន១គ.ក. (២៣ទៅ២៤គ្រាប់) គ្របទុករយៈពេល៧ថ្ងៃ
ទឹកសុទ្ធ៧លីត្រ របៀបធ្វើ៖ -យកគល់ចេកចិតរួចច្រោះយកទឹកគល់ចេកតែ១លីត្រ ដាក់ក្នុងធុងប៉េត្រូ រួចលាយជាមួយស៊ុតមាន់ឬស៊ុតទា កូរឲ្យសព្វ គ្របទុករយៈពេល៧ថ្ងៃ។
គ្រប់៧ថ្ងៃ យកទឹកសុទ្ធចាក់ចូលកូរឲ្យសព្វ រួចគ្របទុករយៈពេល៧ថ្ងៃទៀត។ គ្រប់៧ថ្ងៃ អាចប្រើប្រាស់ជីនោះបាន ដោយការប្រើទឹកជីនោះនោះបែងចែកជាបីគឺ៖
ប្រើសម្រាប់បាញ់លើបន្លែយកស្លឹក គឺប្រើ១៥ CC លាយទឹក២០លីត្រ។
បាញ់លើបន្លែយកផ្លែ ដូចជាពោត គឺប្រើ២៥ទៅ៣០ CC លាយទឹក២០លីត្រ។
បាញ់លើស្រូវ ឬដំណាំហូបផ្លែ គឺប្រើ៤០ CC លាយទឹក២០លីត្រ។

***វិធីសាស្ត្រទី៣

កាកសំណល់ត្រី ឬ លាមកត្រី ៥ គ.ក.
ស្ករល្ងូរ (អាចម៍ស្ករ) ១គ.ក. របៀបធ្វើ៖
យកកាកសំណល់ត្រី ឬ លាមកត្រី មកប្រឡាក់ជាមួយស្ករល្ងូរ (អាចម៍ស្ករ) ទុកក្នុងពាងមួយផ្អាប់ទុករយៈពេលកន្លះខែ ទៅ១ខែរួចអាចយកទឹកវាប្រើប្រាស់បាន ។ បើពុំមានស្ករល្ងូរ (អាចម៍ស្ករ) អាចយកកាកសំណល់ត្រី ឬ លាមកត្រីត្រាំទឹកក្នុងពាងមួយ ដាក់អំបិលបន្តិច ផ្អាប់ទុករយៈពេលកន្លះខែរួចអាចយកទឹកវាប្រើប្រាស់បាន ដោយពេលប្រើគឺយកទឹកជី១លីត្រ លាយនឹងទឹក១៥លីត្រ៕

ចុចអាន៖ ចម្ការបន្លែធម្មជាតិ ២០ហិកតានៅស្រែអំបិល គ្មានប៉ះសារជាតិគីមីសូម្បីបន្តិច