«ម្ទេសហឹរ ប៉ះអំបិលប្រៃ» ជារឿងភាគខ្មែរមានគុណភាពរូបភាពច្បាស់បំផុត

2016-08-29 17:34:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាងហ្វាងផលិតកម្មអិលឌី ភិចឆ័រ (LD Picture Production) និងជាអ្នកដឹកនាំរឿង លោក លៀក លីដា បានអះអាងថា រឿងភាគ «ម្ទេសហឹរ ប៉ះអំបិលប្រៃ» គឺជារឿងដែលមានគុណភាពរូបភាពច្បាស់បំផុត ដោយការប្រើប្រាស់ទាំងកាមេរ៉ា និង Len ដែលមិនងាយនឹងមានរឿងភាគទូរទស្សន៍ណាប្រើប្រាស់ឡើយ។

លោកបានថ្លែងបែបនេះក្នុងពេលផ្តល់បទសម្ភាសពិសេសមួយនៅក្នុងកម្មវិធីព័ត៌មានកម្សាន្តរបស់ស្ថានីយទូរទស្សន៍ភីអិនអិន កាលពីថ្ងៃសុក្រ ទី២៦ សីហា។

លោក លៀក លីដា ចាងហ្វាងផលិតកម្មអិលឌី ភិចឆ័រ

លោកថា៖ "យើងប្រើកាមេរ៉ាប្រភេទ Film 35 mm ឯLens យើងប្រើប្រភេទ Prime lens ឬCinema lens ដែលជាទូទៅមិនងាយគេប្រើទេសម្រាប់ថតកុនភាគសូម្បីតែនៅក្រៅប្រទេសក៏ដោយ ដោយសារវាចាយពេលច្រើន"។

សម្រាប់ដំណើរការនៃការកាត់តវិញ លោកបានរៀបរាប់ថា៖ "គ្រប់ភាគនៃរឿងម្ទេសហឹរ ប៉ះអំបិលប្រៃ គឺសុទ្ធសឹងតែបានឆ្លងកាត់ការEdit យ៉ាងសម្រិតសម្រាំងបំផុតដោយក្រុមការងាររបស់យើងដែលទទួលបានការបណ្ដុះបណ្ដាលពីបរទេស ដូចជា ការ Edit online, offline, sound mixing, color correctionនិងmastering contrast ដោយមិនមែនគ្រាន់តែកាត់តភ្លាមហើយចាក់ផ្សាយនោះទេ"។

លោក លៀក លីដា ជឿជាក់ខ្ពស់ថា រឿងភាគបែបកំប្លែងដែលមានគុណភាពខ្ពស់មួយនេះ ប្រាកដជាទទួលបានជោគជ័យពីសំណាក់ទូរទស្សនិកជន។

«ម្ទេសហឹរ ប៉ះអំបិលប្រៃ» ជារឿងភាគមនោសញ្ចេតនាស្នេហា កំប្លែង កាច់កុងគ្នារវាងប្តីប្រពន្ធវ័យក្មេងមួយគូរស់នៅជាមួយម្ដាយក្មេកដែលពិបាកយល់ចិត្តស្គាល់តែកំហុសរបស់កូនប្រសាស្រី។ រឿងនេះមានគំនិតអប់រំទៅដល់ម្ដាយក្មេក និងកូនប្រសាសម័យថ្មីទាំងអស់ឲ្យចេះយោគយល់អធ្យាស្រ័យគ្នាទើបអាចរស់នៅជាមួយគ្នាប្រកបដោយសេចក្ដីសុខ។ ខ្សែរឿងមួយនេះធានាថាទូរទស្សនិកជនប្រាកដជាទទួលបានសំណើចសើចក្អាកក្អាយ ដោយសារសំបូរទៅដោយឈុតឆាកកំប្លែងច្រើន ជាមួយនឹងការសម្តែងដ៏ប៉ិនប្រសព្វរបស់សិល្បករល្បីៗដែលមានបទពិសោធន៍សម្តែងយូរឆ្នាំមកហើយ ក្នុងនោះមាន កញ្ញា តូតា លោក អេវីន អ្នកនាង គ្រត លោក ជា សំណាង អ្នកស្រី ង៉ែត សុវណ្ណលីតា លោក ចាប ចៀន កញ្ញា ទឹម រដ្ឋា នាយ សុបិន រួមនឹងសិល្បករ-សិល្បការនីល្បីៗមួយចំនួនទៀត។

«ម្ទេសហឹរ ប៉ះអំបិលប្រៃ» គឺជាខ្សែភាពយន្តភាគខ្មែរមួយក្នុងចំណោមរឿងភាគទាំង៥របស់ភីអិនអិនដែលនឹងចាក់បញ្ចាំងចាប់ពីថ្ងៃទី៥ កញ្ញា ខាងមុខនេះ។ រឿងនេះនឹងមានផ្សាយជូនទស្សនានៅរៀងរាល់ថ្ងៃចន្ទ ដល់ពុធ ចាប់ពីវេលាម៉ោង៨យប់តទៅ។

ស្ថានីយទូរទស្សន៍ភីអិនអិន បានប្ដេជ្ញាផលិតខ្សែភាពយន្តភាគក្នុងស្រុកឲ្យបានច្រើនជាងមួយរយម៉ោងក្នុងឆ្នាំ២០១៦នេះ ដើម្បីចាក់ផ្សាយជូនទូរទស្សនិកជន ហើយគិតជាមធ្យម ភីអិនអិន ត្រូវចំណាយប្រមាណ ៨០០០ដុល្លារ ក្នុងរយៈពេលមួយម៉ោងនៃខ្សែភាពយន្តភាគ៕

សូមទស្សនាឈុតខ្លីរឿង ម្ទេសហឹរ ប៉ះអំបិលប្រៃ៖

អត្ថបទ៖ ពាណិជ្ជកម្ម