ប្រាសាទភ្នំដា រមណីយដ្ឋានប្រវត្តិសាស្រ្ត នាសម័យនគរភ្នំ

2016-09-23 16:38:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទភ្នំដា ជាតំបន់ទេសចរណ៍ប្រវត្តិសាស្ត្រដ៏ល្បីល្បាញស្ថិតនៅភូមិព្រែកតាផ ឃុំគោកធ្លក ស្រុកអង្គបុរី ខេត្តតាកែវ ដែលមានចម្ងាយប្រមាណជាង ២០គីឡូម៉ែត្រ ពីទីរួមខេត្តតាកែវ។ ប្រសិនបើបន្តដំណើរទៅមុខបន្តិចនឹងបានទៅដល់ព្រំដែនប្រទេសកម្ពុជា វៀតណាមហើយ។

លោក សុខ ទ្រី មន្ត្រីទេសចរប្រចាំការរមណីយដ្ឋានខាងលើប្រាប់ Sabay ថាភ្ញៀវទេសចរដែលចង់ទៅទស្សនាប្រាសាទភ្នំដាអាចចេញដំណើរពីកំពង់ដខាងកើតផ្សារណាត់តាកែវ។ ជិះអូប័រទាំងទៅ និងមក ចម្ងាយ២៤គីឡូម៉ែត្រ ត្រូវចំណាយ ៣៥ដុល្លារ តែបើចង់អស់តិចលោកអ្នកគ្រាន់តែធ្វើខ្លួនជាអ្នកដំណើរធម្មតាចំណាយប្រាក់ ១២ ០០០៛ ជិះទូកបណ្តើរគយគន់ទេសភាពវាលស្រែប្រាំងដ៏ខៀវស្រងាត់នារដូវប្រាំង ភ្លេចខ្លួនបន្តិចភ្ញៀវនឹងបានមកដល់ទីរមណីយដ្ឋានដ៏ស្រស់ត្រកាលដែលបង្កប់ខ្លួននៅលើកូនភ្នំតូចមួយនេះ។

នៅច្រកផ្លូវលំចូលពីខាងមុខមានរូបសំណាកព្រះនាងលីវ យីកំពុងឈរញញឹមរង់ចាំស្វាគមន៏ភ្ញៀវទេសចរមកទីជិតឆ្ងាយហាក់មិនចេះជិនណាយ។ ភ្ញៀវអាចបន្តធ្វើដំណើឡើងតាមជណ្តើរខាងមុខ ១៤៧កាំ តែហាក់ដូចជាលំបាកសម្រាប់ភ្ញៀវព្រោះជណ្តើរាងចោទបន្តិច ប៉ុន្តែមិនថ្វីទេ ភ្ញៀវអាចសម្រាកលេងនៅចង្កេះភ្នំបំបាត់ភាពចុករោយមួយសន្ទុះក្រោមម្លប់ដើមឈើត្រឈឹងត្រឈៃគយគន់ទេសភាពវាលស្រែដ៏ខៀវខ្ចីអមដោយខ្យល់បក់ត្រសៀកប៉ះកាយា ធ្វើអោយអារម្មណ៏ស្រស់ស្រាយរលាយទុក្ខកង្វល់នាំមកនូវសុភមង្គលជាអនេក។ រួចបន្តដំណើរឡើងទៅកំពូលភ្នំភ្ញៀវអាចទស្សនារចនាបថលើតួប្រាសាទជាស្នាដៃបុព្វបុរសយើងបន្សល់ទុក។ នៅមិនឆ្ងាយប៉ុន្មានពីទីនេះមានប្រាសាទមួយទៀតហៅថា អាស្រមមហាឥសីជាទីបន់ស្រន់សុំពរជ័យពីសំណាក់ភ្ញៀវ។ ដោយឡែកនៅខាងកើតប្រាសាទវិញមានផ្ទាំងថ្មធំៗបន្តុបលើគ្នាគួរអោយចង់គយគន់ប្រៀបបាននឹងផ្ទាំងទស្សនីយភាពរំលេចដោយវិចិត្រករដៃទិព្វ។ តែថ្មមួយផ្ទាំងហាក់ដូចជាអណ្តែតខ្ពស់ជាងគេបន្តិចដែលភ្ញៀវខ្លះមានជំនឿថាថ្មហោះហើយទីនេះតែងត្រូវបានគេនាំគ្នាដុតធូបបន់ស្រន់ជាហូរហែ។ ថ្វីត្បិតរមណីយដ្ឋាននេះស្រស់ស្អាតតយ៉ាងណា ក៏មន្ត្រីទេសចរខាងលើប្រាប់ថា រមណីយដ្ឋាននេះខ្សត់ភ្ញៀវណាស់នៅថ្ងៃធម្មតាលើកលែងតែថ្ងៃបុណ្យជាតិ ជាពិសេសបុណ្យភ្ជុំបិណ្យ ចូលឆ្នាំ ទើបសំបូរភ្ញៀវច្រើន។ ក្រៅពីនោះមានភ្ញៀវបរទេសប្រមាណជាងដប់នាក់ដែរក្នុង១ខែៗ ដែលភាគច្រើនជាអ្នកស្រាវជ្រាវខាងប្រវត្តិសាស្ត្រ។

“រៀងរាល់ថ្ងៃពេញបរមីខែកត្តិក ប្រជាពលរដ្ឋជុំវិញតំបន់នេះតែងនាំគ្នាធ្វើបុណ្យបួងសួងសុំពរជ័យ…. បើមិនបានធ្វើបុណ្យទេពួកគាត់មានជំនឿថាចេះតែមានបញ្ហាផ្សេងៗ ឈឺថ្កាត់ជាដើម”។ លោកទ្រីបញ្ជាក់។

គួររម្លឹកថា ប្រាសាទភ្នំដា ជាប្រាសាទថ្មបាយក្រៀមកសាងឡើងនៅសតវត្សទី៦ ដោយព្រះបាទរុទ្រ្ទវរ្ម័ន ដែលជាស្តេចចុងក្រោយបង្អស់នៃសម័យនគរភ្នំមាន អាយុកាលរាប់ពាន់ឆ្នាំមកហើយ។