ទឹកជ្រោះ ចំបក់ បានទៅម្ដង ដក់ក្នុងចិត្តរហូត

2016-10-14 22:48:46
ចំនួនមតិ 0 | ចំនួនចែករំលែក 0

ចន្លោះមិនឃើញ

សហគមន៍អេកូធម្មជាតិ ចំបក់ ជារមណីយដ្ឋានធម្មជាតិទាក់ទាញមួយក្នុងខេត្ត កំពង់ស្ពឺនៅទីនេះមានទេសភាពដ៏ស្រស់ស្អាតដូចជា ព្រៃភ្នំ ទឹកជ្រោះជាច្រើនកន្លែង នឹង រូងប្រជៀវជាដើម។ សម្រស់ធម្មជាតិទាំងអស់នេះ បានទាក់ទាញភ្ញៀវទេសចរណ៍ដែលមកកម្សាន្ត ដក់ជាប់អារម្មណ៍ជានិច្ច។

ចំបក់ ស្ថិតក្នុងទឹកដី ភូមិចំបក ឃុំចំបក់ ស្រុកភ្នំស្រួច ខេត្ត កំពង់ស្ពឺ ជាប់ព្រំដែនឧទ្យានជាតិគិរីរម្យ។ រមណីយដ្ឋានមួយនេះបានដាក់ឲ្យដំណើរការកាលពីដើមឆ្នាំ២០០៣ លើផ្ទៃដី ១៣៩១ ហិតា។ ភ្ញៀវទេសចរណ៍ អាចធ្វើដំណើរពីរាជធានីភ្នំពេញ តាមបណ្ដោយផ្លូវជាតិលេខ៤ ត្រង់គីឡូម៉ែត្រ១៨៥ បទស្ដាំត្រង់ត្រែងត្រយឹង ផ្លូវចូលគិរីរម្យ មានចម្ងាយប្រហែល២០គីឡូម៉ែត្រ លុះដល់ជើងភ្នំគិរីរម្យបត់ស្កាំតាមផ្លូវក្រួសក្រហមចម្ងាយប្រហែល៨ គីឡូម៉ែត្រ នោះយើងនឹងទៅដល់សហគមន៍អេកូធម្មជាតិ ចំបក់ ។

មុនចូលទៅដល់ទៅដល់កន្លែងទឹកធ្លាក់ ភ្ញៀវទេសចរណ៍ ត្រូវជិះរទេះគោ ឬម៉ូតូឌុប ចម្ងាយប្រហែលជាង២គីឡូម៉ត្រ បន្ទាប់មកធ្វើដំណើរដោយថ្មើរជើងឡើងលើភ្នំ ជាច្រើនគីឡូម៉ែត្រទៀតទើបទៅដល់កន្លែងកម្សាន្តជាច្រើនដែលមានចម្ងាយផ្សេងៗគ្នា។ ប្រសិនបើលោកអ្នកចង់ទៅកម្សាន្តនៅទីនេះ គួរតែមកថ្ងៃចុងសប្ដាហ៍ ឬ ថ្ងៃថ្ងៃបុណ្យជាតិ ព្រោះមានភ្ញៀវទៅទស្សនាច្រើន នឹងមានអ្នកភូមិយករបស់របរហូបចុកទៅលក់ ប៉ុន្តែបើទៅចំថ្ងៃ ធ្វើការអាចមិនឃើញមានឡើយ ដូចនេះលោកអ្នកត្រូវមាន ទឹក ឬ អាហារ ជាប់តាមខ្លួន ព្រោះផ្លូវធ្វើដំណើរនៅកណ្ដាលព្រៃជ្រៅ។

លោកអ្នកគួរតែមានទ្រនាប់ជើងសម្រាប់ពាក់ឡើងភ្នំកាន់តែល្អ ព្រោះត្រូវដើរឡើងតាមផ្លូវច្រើនគីឡូម៉ែត្រ កាត់ព្រៃឫស្សី ឬ ព្រៃរបោះមានថ្មតូចធំជាដើម។ ពេលឡើងជិតដល់ទឹកជ្រោះ នីមួយៗ លោកអ្នកនឹងលឺសូរ្យសំឡេងទឹកជ្រោះហូរមិនដាច់ បូកសំឡេងសត្វបក្សាបក្សីជាច្រើនប្រភេទ ធ្វើឲ្យលោកអ្នកបាត់ការនឿយហត់។

តាមការឲ្យដឹងពីលោក ទូច ម៉ន ប្រធានសហគមន៍អេកូធម្មជាតិ ចំបក់ នៅទីនេះ មានកន្លែងទេសចរណ៍៥សំខាន់ៗ។ ១/ទឹកធ្លាក់ទី១ មានចម្ងាយពី ចំណតរទេះគោ ១៤៥០ ម៉ែត្រ ២/ ទឹកធ្លាក់ទី២ មានចម្ងាយ២១០០ ម៉ែត្រ ៣/ ទឹកធ្លាក់ទី៣ មានចម្ងាយ ២៤៥០០ (មានទឹកជ្រោះ កម្ពស់ ៤០ ម៉ែត្រ) ៤/ ទឹកធ្លាក់ទី៤ មានចម្ងាយ ៦០០០ ម៉ែត្រ ៥/ រូងប្រជៀវ មានចម្ងាយ ១៩៥០០ ម៉ែត្រ

ភ្ញៀវទេសចរណ៍ដែលចង់មកទស្សនាសហគមន៍អេកូធម្មជាតិ ចំបក់ ត្រូវទិញសំបុត្រ ក្នុងនេះភ្ញៀវជាតិតម្លៃ ២០០០រៀល ក្នុងម្នាក់ ចំពោះភ្ញៀវបរទេស១ ដុល្លារ សម្រាប់កូនក្មេង ហើយមនុស្សពេញវ័យ ៣ ដុល្លារ។ ភ្ញៀវទេសចរណ៍អាចមកស្នាក់នៅទីនេះបាន ព្រោះក្នុងភូមិមានផ្ទះប្រជាពលរដ្ឋសម្រាប់ជួលឲ្យស្នាក់នៅ (Home Stay)។ តម្លៃនៃការស្នាក់នៅក៏ដូចជាម្ហូបអាហារត្រូវបានកំណត់ដោតសហគមន៍ ។

ប្រធានសហគមន៍ខាងលើប្រាប់ថា ការស្នាក់នៅ១យប់ មនុស្សម្នាក់តម្លៃ៤ ដុល្លារ ចំពោះអាហារវិញចាប់ពីមនុស្ស៥នាក់ឡើង ពេលព្រឹកម្នាក់ ២.៥0 ដុល្លារ ពេលថ្ងៃ និង ល្ងាច៣.៥០ ដុល្លារ ចំពោះមនុស្សក្រោម៥នាក់ ពេលព្រឹក៣ ដុល្លារ ពេលថៃ នឹង ល្ងាច៤ ដុល្លារ ក្នុងម្នាក់។

ដោយសារ សក្ដានុពលធម្មជាតិដូចបានរៀបរាប់ខាងលើ បានធ្វើឲ្យភ្ញៀវទេសចរណ៍មកទស្សនានៅទីនេះមិនដាច់ឡើយ ជាមធ្យមសហគមន៍អេកូធម្មជាតិ ចំបក់ អាចទាក់ទាញភ្ញៀវទេសចរណ៍ជាង១៨០០០នាក់ក្នុងមួយឆ្នាំ។ ផែនការទៅថ្ងៃអនាគត សហគមន៍គ្រោងធ្វើផ្ទះសំណាក់នៅក្នុងព្រៃតែម្ដង មិនឲ្យភ្ញៀវពិបាកទៅស្នាក់នៅផ្ទះអ្នកភូមិឡើង ជាមួយគ្នានោះផ្លូវឡើងទៅទីតាំងនីមួយៗក៏មានផែនការ អភិវឌ្ឍន៍ឲ្យបានប្រសើរជាងនេះផងដែរ៕ អត្ថបទ៖ ខុត សីហា