មកលេងរមណីយដ្ឋានច្រកល្អៀង កុំបារម្ភរឿងអ្នកលក់កោមិនដាក់ទឹក

2016-10-21 21:03:46
ចំនួនមតិ 0 | ចំនួនចែករំលែក 0

ចន្លោះមិនឃើញ

រមណីយដ្ឋានទឹកធ្លាក់ច្រកល្អៀងកំពុងក្លាយជាតំបន់កម្សាន្តដ៏មានប្រជាប្រិយបំផុតរបស់ខេត្តពោធិ៍សាត់។ ក្រៅពីសម្រស់ធម្មជាតិដ៏ស្រស់ស្អាត រមណីយដ្ឋានទឹកធ្លាក់ច្រកល្អៀង បានផ្ដល់ភាពកក់ក្ដៅមួយទៀតដល់អ្នកកម្សាន្តគឺការផ្ដល់សេវាម្ហូបអាហារ ដែលមានតម្លៃសមរម្យទាំងអ្នកទិញម្ហូប និង អ្នកលក់អាចទទួលយកបានទាំងអស់គ្នា។

លោក សំ ឃីម ប្រធានមន្ទីរទេសចរណ៍ខេត្តពោធិ៍សាត់ បានប្រាប់ក្រុមការងារ "ផ្លូវទៅស្រុក" ថា តម្លៃនៃការលក់ដូរ គឺមានការណែនាំពីមន្ទីរ ដោយមានការស្ទង់មតិត្រឹមត្រូវរវាងអ្នកលក់ និង អ្នកទិញរួមទាំងតម្លៃរមណីយដ្ឋានផ្សេងៗទើបសម្រេចពីគណៈកម្មការកំណត់តម្លៃសមរម្យមួយដែលអាចទទួលបានទាំងអស់គ្នា តាមរយៈការបោះតម្លៃ លើបដា ឲ្យសាធារណៈបានដឹង។

ដូច្នេះអ្នកមកលេងនៅរមណីយដ្ឋាននេះអាចទទួលយកបានភាពកក់ក្ដៅ និង ទទួលបាននូវអារម្មណ៍ស្រស់ស្រាយជាមួយនឹងសម្រស់ធម្មជាតិព្រៃភ្នំ និង ទឹកធ្លាក់ដ៏ត្រជាក់ ផងដែរ។ លោក សំ ឃីម មានប្រសាសន៍។

ចង់ដឹងព័ត៌មានពិស្ដារ សូមចុចទស្សនាវីដេអូខាងក្រោមនេះ

គួរកត់សម្គាល់ដែរថា រមណីយដ្ឋានច្រកល្អៀង ជាកន្លែងកម្សាន្តធម្មជាតិដ៏ស្រស់ប្រណីតមួយបង្កប់ក្នុងព្រៃធម្មជាតិនៃកម្រងជួរភ្នំឱរ៉ាល់ខេត្តពោធិ៍សាត់ដែល មានចម្ងាយ ៧៣ គីឡូម៉ែត្រ ពីក្រុងពោធិ៍សាត់ និង ១៩៥ គីឡូម៉ែត្រពីរាជធានីភ្នំពេញ ស្ថិតនៅក្នុងឃុំឈើតុំ ស្រុកក្រគរ ខេត្តពោធិ៍សាត់។

រមណីយដ្ឋាននេះ មានកម្ពស់ ៧ ម៉ែត្រ និង ល្បាក់ទឹកធ្លាក់ត្រជាក់ និងថ្លាឆ្វង់ជាច្រើនដំណាក់ហូរលើផ្ទាំងថ្មប៉ប្រះទឹក លាន់ជាសំឡេងពេញព្រៃភ្នំដែលភ្ញៀវអាចកម្សាន្តគយគន់ទេសភាព ងូតទឹកលេងកម្សាន្តបំបាត់បាននូវទុក្ខកង្វល់នានា។

ការកម្សាន្តនៅក្នុងរមណីយដ្ឋាននេះមានចំនួន ៩ ដំណាក់ មានទេសភាព និង ប្រវត្តិខុសៗគ្នា មានដំណាក់តាង៉ុកគយ ដំណាក់កោះយាយចាំតា ដំណាក់ទឹកឈូ ដំណាក់មនោរម្យ ដំណាក់ថ្មសណ្ដុក ជ្រោះដំណាក់ព្រះ ដំណាក់ម្លប់ជ្រៃក្រឹម ដំណាក់កោះសុបិន និង ដំណាក់ទឹកធ្លាក់ ជាដំណាក់ចុងក្រោយ។ សរុបទាំង ៩ដំណាក់នេះ គឺមានប្រវែង ១.៣០០ ម៉ែត្រ និង អាចទទួលភ្ញៀវបាន ១ម៉ឺននាក់ក្នុង ១ថ្ងៃ៕