តារាម៉ូដែលម្នាក់ត្រូវចោរឆក់កាលពីចុងសប្ដាហ៍មុន

2014-11-05 16:30:41
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា យុន ដាណែត តារាសម្ដែង និង ម៉ូដែល ត្រូវបានចោរឆក់កាលចុងសប្ដាហ៍កន្លងទៅ គ្រាដែលនាងចេញពីធ្វើការធ្វើដំណើរទៅផ្ទះ របស់នាងត្រង់ម្ដុំ ត្រង់ម្ដុំវត្តនាគវ័ន្ត។ ដាណែត បានប្រាប់ Sabay ថា កាលពីចុងសប្ដាហ៍កន្លងទៅ នាងបានទទួលធ្វើម៉ូដែលឲ្យក្រុមហ៊ុន រថយន្ត BMW ក្នុងព្រឹត្តិការតាំងពិព័រណ៍ Phnom Penh International Auto Show 2014 ចាប់ពីថ្ងៃ ៣០ តុលា ដល់ថ្ងៃទី២ វិច្ឆិកា ឆ្នាំ ២០១៤ ដែលប្រជុំដោយរថយន្តទំនើបៗ និង ស្រីស្អាតៗ នៅសាលពិព័រណ៍កោះពេជ្រ។

តារារូបនេះបានរៀបរាប់ឲ្យដឹងថា នៅម៉ោងប្រហែល ១ រសៀល គ្រាដែលនាងធ្វើចេញពីកោះពេជ្រ ដំណើរតាមម៉ូតូតែម្នាក់ឯង តាមផ្លូវទៅផ្ទះរបស់ខ្លួន ត្រង់ម្ដុំវត្តនាគវ័ន្ត ស្រាប់តែត្រូវបានយុវជន ២ នាក់ ជិះម៉ូតូមួយគ្រឿងមិនចាំម៉ាក ជិះមកកៀកម៉ូតូរបស់នាង ហើយឆក់យកកាបូប រួចគេចខ្លួនទៅបាត់។ ដាណែតប្រាប់ថា ក្នុងកាបូបនោះ មិនមានរបស់របរច្រើនទេ គឺមានតែទូរសព្ទ១គ្រឿង ប្រាក់ប្រហែល៣០ដុល្លារ និង សំលៀកបំពាក់ត្រូវស្លៀកឲ្យរថយន្ត BMW មួយឈុត។

ទោះបីជា ត្រូវចោរឆក់បែបនេះក្ដី តែតារាស្រីម្នាក់នេះ មិនបានទៅដាក់ពាក្យបណ្ដឹងឡើយ ព្រោះគិតថា អស់តិចតួច ហើយមិនសង្ឃឹមថា អាចរកឃើញឡើយ ប៉ុន្តែ អ្វីដែលនាងស្ដាយនោះ គឺខោអាវត្រូវស្លៀករបស់ BMW ដែលកាត់ឲ្យនាង ត្រូវស្លៀកបន្តនៅពេលល្ងាចទៀត។

ដោយសារតែត្រូវចោរឆក់ខោអាវបែបនេះ កញ្ញា យុន ដាណែត មិនបានទៅឈរកាច់រាងឲ្យរថយន្ត BMW ក្នុងព្រឹត្តិការតាំងពិព័រណ៍ Phnom Penh International Auto Show 2014 នោះទេ ព្រោះអត់មានឯកសណ្ឋានស្លៀក។ ដាណែត បានលើកឡើងថា សំណាងហើយដែលមិនមានគ្រោះថ្នាក់ដូចជាដួលម៉ូតូជាដើម ទៅថ្ងៃខាងមុខនាងលែងដាក់កាបូបធ្វេសប្រហែសទៀតហើយ៕

អានអត្ថបទបន្ត៖ សឿ សុធារ៉ា នាំកូនស្រីដើរផ្សារ AEON លែងខ្វល់រឿងស្នេហ៍បាក់បែក! អានអត្ថបទបន្ត៖ បេក្ខជន The Voice អឿម រុន ត្រូវ Fan ប្រដូចទៅនឹង Justin

អត្ថបទ៖ ខុត សីហា 