ខ្លែងឯកខ្មែរ បង្ហាញវត្តមានជុំវិញពិភពលោក មានប្រវត្តិយ៉ាងណា?

2016-10-31 15:47:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្លែងឯក ដែលជាខ្លែងមួយក្នុងចំណោមប្រភេទខ្លែងខ្មែរជាង២០ប្រភេទ មានឈ្មោះល្បីល្បាញដល់ឆាកអន្តរជាតិ ដោយវាត្រូវបានយកទៅចូលរួមក្នុងមហោស្រពខ្លែងអន្តរជាតិ ចាប់ពីឆ្នាំ១៩៩៤ នៅប្រទេសជាច្រើនដូចជា បារាំង អ៊ីតាលី អង់គ្លេស ចិន ជប៉ុន កូរ៉េ ឥណ្ឌា ឥណ្ឌូណេស៊ី ប្រ៊ុយណេ ម៉ាឡេស៊ី និងវៀតណាមជាដើម។ នេះបើតាមលោក រឿង សារ៉េត អនុប្រធាននាយកដ្ឋានអភិវឌ្ឍន៍វប្បធម៌។

កញ្ញា នួន កន្និកា សមាជិកមួយរូបនៃក្រុមនិស្សិតស្ម័គ្រចិត្ត សំឡេងឯក ជួយផ្សព្វផ្សាយអំពីខ្លែងខ្មែរបានរៀបរាប់ពីដំណើរដើមទងរបស់ខ្លែងឯកដោយយោងតាមសៀវភៅរបស់លោក ស៊ឹម សារ៉ាក់ ដែលជាអ្នកប្រមូលចងក្រងពីប្រវត្តិ និងអត្ថន័យរបស់ខ្លែងខ្មែរថា ខ្លែងនេះមានឈ្មោះដើមថា ខ្លែងព្នង ដែលបង្កើតឡើងដោយបុព្វបុរសខ្មែរតាំងពី៤០០ឆ្នាំ មុនគ្រិស្តសករាជ គឺតាំងពីពេលមុនសម័យនគរភ្នំ ។

ខ្លែងនាសម័យនោះ ឆ្អឹងធ្វើឡើងដោយឫស្សី និងតួខ្លែងពាសដោយស្លឹកឈើ ដែលត្បាញដូចកន្ទេលសម្រាប់បង្ហោះក្នុងពិធីបង្ហោះខ្លែងនារដូវច្រូតកាត់ ។ ដោយសារមុនសម័យនគរភ្នំបុព្វបុរសខ្មែរមានជំនឿលើអ្នកតា ដូចនេះតែងតែប្រារព្ធពិធីបង្ហោះខ្លែងសម្ដែងការដឹងគុណចំពោះអ្នកតាដែលជួយឲ្យភោគផលស្រូវដំណាំបានផលល្អ។

កញ្ញា នួន កន្និកា សមាជិកក្រុមនិស្សិតស្ម័គ្រចិត្ត សំឡេងឯក ជួយផ្សព្វផ្សាយអំពីខ្លែងខ្មែរ

រហូតដល់សម័យនគរភ្នំ( សតវត្សទី១ដល់ទី៦) គេហៅខ្លែងនេះថា ឬខ្លែងមេកូន។ ដោយសារតែខ្មែរនាសម័យនោះប្រកាន់របបមាតាធិបតេយ្យ ទើបខ្លែងត្រូវបានចាត់ទុកជាមេ ឬព្រះមហាក្សត្រីយានី ហើយព្នងត្រូវអ្នកស្រុកហៅថា ខ្លែងមេកូន ដែលពាក្យ"មេ" ដែលតំណាងឲ្យព្រះមហាក្សត្រីយានី និងពាក្យ"កូន" តំណាងឲ្យប្រជារាស្ត្រ។

ចំពោះខ្លែងឯក មានលក្ខណៈពិសេសជាច្រើនដូចជា៖

ខ្លែងឯកបំពាក់ដោយឧបករណ៍ភ្លេង "ឯក" ដែលជាប្រដាប់មួយប្រភេទមានដងសណ្ឋានស្រដៀងនឹងដងធ្នូ តូចរៀវ សម្រាប់ដាក់ភ្ជាប់នឹងក្បាលខ្លែងឯក អាចបន្លឺសំឡេងលាន់ឮសូររងំដោយកម្លាំងខ្យល់បក់ត្រូវ។ បង្ហោះខ្លែងឯកជាការកម្សាន្តសប្បាយ បង្ហោះជាសហគមន៍។ ពេលអ្នកស្រុកមានឱកាសបង្ហោះខ្លែង គឺបង្ហាញឲ្យដឹងថា អ្នកស្រុកមានសេរីភាព និងប្រទេសជាតិមានសន្តិភាព។ ខ្លែងឯក តំណាងឲ្យមានមាតាខ្មែរ ឬអ្នកដឹកនាំប្រទេសខ្មែរ៕