ស្ករតាំងម៉ែស្រូវរសជាតិផ្អែមប្រហើរ ជាផលិតខ្មែរ ប្រចាំខេត្តកំពង់ធំ

2016-12-01 03:23:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ករតាំងម៉ែស្រូវជាផលិតខ្មែរមួយដែលអ្នកភូមិកងសៅ ឃុំកំពង់ថ្ម ស្រុកសន្ទុក ខេត្តកំពង់ធំ ចេះធ្វើតាំងពីដូនតាមក ប៉ុន្ដែ មុខរបរមួយនេះស្ទើរតែបាត់បង់ទៅហើយដោយសារតែពិបាកធ្វើ ចំណាយពេលយូរ តែបានចំណូលតិច។

ស្ករតាំងម៉ែស្រូវមានរសជាតិផ្អែមប្រហើរ ខុសប្លែកពីស្ករតាំងម៉ែធ្វើពីស្ករផែន ឬស្ករផ្សេងៗ។ រសជាតិស្ករតាំងម៉ែស្រូវ ផ្អែមប្រហើរ ដែលចំរាញ់ចេញពីបាយដំណើប និង ស្រូវសុទ្ធសាធ ពុំមានជាតិគីមី ដែលអ្នកមានបញ្ហាសុខភាព ជាពិសេសអ្នកកើតជំងឺទឹកនោមផ្អែមអាចញុំាបានដោយមិនប៉ះពាល់ដល់សុខភាព។

*ស្ករតាំងម៉ែស្រូវ ផ្អែមប្រហើរ ស្អិតល្មួតដូចទឹកឃ្មុំ រសជាតិចេញពីអង្ករដំណើប និង ស្រូវ*

អ៊ុំស្រី កាន់ សាគុណ ដែលបានចាប់អាជីពជាអ្នកធ្វើស្ករតាំងម៉ែស្រូវ តាំងពីឆ្នាំ ២០០៤ បានរៀបរាប់ប្រាប់ក្រុមការងារ "ផ្លូវទៅស្រុក" ថា ការចាប់អាជីពធ្វើស្ករតាំងម៉ែ ព្រោះជាផលិតផលប្រចាំភូមិកងសៅ ឃុំកំពង់ថ្ម ស្រុកសន្ទុក ខេត្តកំពង់ធំ។ ប៉ុន្ដែ មុខរបរមួយនេះបានបាត់បង់បន្ដិចម្ដងៗ ដោយសារតែលំបាកធ្វើ តែចំណូលបានតិច។

“តាំងពីដូនតាមកគឺនៅភូមិនេះគេចេះធ្វើស្ករតាំងម៉ែស្រូវគ្រប់ៗផ្ទះ ប៉ុន្ដែ វាពិបាកធ្វើចំណាយពេលយូរទើបបានផល តែចំណូលបានតិច ទើបគេឈប់ធ្វើ ហើយងាកទៅធ្វើការផ្សេងៗវិញ។" អ៊ុំស្រី សាគុណ និយាយបន្ថែម។

ស្រ្តីវ័យជិត ៧០ឆ្នាំ រូបនេះបានរៀបរាប់ទៀតថា ការធ្វើស្ករតាំងម៉ែស្រូវ ត្រូវចំណាយពេលយ៉ាងតិច ១៣ថ្ងៃ។

*អ៊ុំស្រី កាន់ សាគុណ អតីតគ្រូបង្រៀន និងជាអ្នកធ្វើស្ករតាំងម៉ែស្រូវ*

គ្រឿងផ្សំស្ករតាំងម៉ែស្រូវ៖

១. ស្រូវ ២. អង្ករដំណើប

វិធីធ្វើស្ករតាំងម៉ែស្រូវ៖ យកស្រូវទៅត្រាំរួចស្រង់មកវិញផ្អាប់ទុកយ៉ាងតិច ៦-៧ថ្ងៃ ក្រោយមកទៀតយកទៅហាលថ្ងៃវិញ (បើមានថ្ងៃល្អ ២-៣ថ្ងៃគឺបានហើយ)។ នៅពេលហាលស្ងួតល្អជង្រុកស្រូវនេះអាចទុកបានយូរ ហើយនៅពេលចាប់ផ្ដើមធ្វើ តាំងម៉ែស្រូវ ត្រូវយកទៅហាលម្ដងទៀតប្រហែល ១ថ្ងៃ រួចយកទៅបុកនៅពេលព្រឹក។ ឯល្ងាចដាំបាយដំណើបទុក។ ស្អែកឡើងទើបយកបាយដំណើប និង ស្រូវដែលបានបុកលាយច្របល់ចូលគ្នាលាយជាមួយទឹក ក្រោយមកទៀតពូតយកកាកវាយចេញ ឯទឹកវាយកទៅរំងាស់ដូចជាស្ករត្នោត គឺត្រូវចំណាយពេលរំងាស់ប្រហែលជា ៣ម៉ោង នឹងទទួលបានផលមិនខាន។

អ៊ុំស្រី កាន់ សាគុណ បានរៀបរាប់ទៀតថា ស្ករតាំងម៉ែស្រូវគឺធ្វើឡើងបែបធម្មជាតិសុទ្ធសាធ ដូច្នេះ រសជាតិផ្អែមរបស់ស្ករតាំងម៉ែស្រូវ ផ្ដើមចេញពីជាតិផ្អែមរបស់អង្ករដំណើប និង ស្រូវ។ ដូច្នេះ កន្លងមកមានអ្នកជំងឺទឹកនោមផ្អែមធ្លាប់ទិញយកទៅញុំា ហើយពួកគេប្រាប់ថា ក្រោយពីញុំាស្រួលខ្លួន។

សព្វថ្ងៃនេះ អ៊ុំស្រី សាគុណ បានចែកចាយស្ករតាំងម៉ែនៅក្នុងភូមិផង ហើយខាង រមណីយដ្ឋានបឹងសំរឹទ្ធ យកទៅលក់បន្តផងដែរ។ អ៊ុំស្រី បានអំពាវនាវដូច្នេះថា "សូមពុកម៉ែ បងប្អូន ជួយគាំទ្រផលិតផលខ្មែរមួយនេះ ព្រោះជាស្ករតាំងម៉ែស្រូវ ដែលផលិតឡើងពុំមានប្រើប្រាស់សារធាតុគីមីអ្វីនោះទេ ដែលស្ករតាំងម៉ែស្រូវ អាចញុំាលេងសុធក៏បាន លាយជាមួយនំប៉័ងក៏បាន"៕

ចង់ដឹងព័ត៌មានលម្អិត ចុចទស្សនាវីដេអូខាងក្រោមនេះ