៦ចំណុចសំខាន់ៗបំផុត ជំរុញឱ្យ ក្មេងៗធំមិនទាន់ ចេះមានស្នេហា

2016-12-06 08:24:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យស្នេហា សំដៅដល់ការស្រឡាញ់គ្នារវាងបុគ្គលពីរនាក់ ដែលធំពេញវ័យមានអារម្មណ៍ មនោសញ្ចេតនា រវាងគ្នាហើយឈានទៅរកពាក្យជាសង្សារឬ ជាស្វាមីភរិយា។ ប៉ុន្តែបច្ចុប្បន្ននេះស្នេហាហាក់ដូចជាងាយកើតឡើងមិនថាវ័យណានោះទេ ជាពិសេសគឺក្មេងដែលមិនទាន់គ្រប់អាយុ ក៏អាចឈានទៅរកការស្រឡាញ់គ្នាបានដែរ។ ដូច្នេះតើកត្តាអ្វីបានជា ធ្វើឱ្យកត្តាធម្មជាតិដែលធ្លាប់កំណត់ថាមនុស្សពេញវ័យទើបមានអារម្មណ៍ស្នេហា ប្រែប្រួលយ៉ាងនេះ? ខាងក្រោមនេះជាការយល់ឃើញពីអ្នកមានបទពិសោធន៍ច្រើនក្នុងសង្គម៖

១.ភាពយន្ត និងបទចម្រៀង

កញ្ញា ឈាវ រចនា ជានិស្សិតកំពុងសិក្សាផ្នែកច្បាប់ ជាភាសាអង់គ្លេសបានលើកឡើងថា កត្តាដែលជំរុញឱ្យក្មេងសម័យឥលូវធំមិនទាន់ចេះមានស្នេហា នោះទីមួយភាពយន្ត ដែលធ្វើឱ្យក្មេងទទួលយកអ្វីដែលបានទស្សនា បានឃើញ ហើយចង់ក្លាយជាតួអង្គក្នុងរឿងនោះ។ ភាពយន្តបច្ចុប្បន្ននេះកម្រមានភាពយន្តបែបអប់រំណាស់គឺភាពយន្តបែបស្នេហា ស្រឡាញ់គ្នាផ្អែមល្ហែម មានជួបមានបែក។ ក្មេងដែលស្ថិតក្រោមអាយុ១៦ឆ្នាំជាវ័យដែលចង់ដឹង ចង់លឺ ចង់សាកនូវអ្វីដែលថ្មីដូចអ្វីដែលខ្លួនបានឃើញ។ ចំណែកបទចម្រៀងក៏ជាចំណែកមួយដែរ គឺចម្រៀងកាយវិការបែបស្នេហា ស្រឡាញ់គ្នាមួយឆាវមិនទាន់ដឹងអីផង ឈានទៅរកការរួមរស់ជាមួយគ្នា។ ដូច្នេះរូបភាពដែលផ្សព្វផ្សាយយ៉ាងទូលំទូលាយបែបនេះហើយទើបជំរុញឱ្យក្មេងមិនទាន់គ្រប់អាយុផងយកតម្រាប់តាម។

២. បណ្ដាញទំនាក់ទំនងសង្គម Facebook

Facebook អាចនិយាយបានថាជាជង្រុកគ្រប់រឿងរ៉ាវ គ្រប់រូបភាព គ្រប់ព័ត៌មាន។ ហេតុអ្វីបានជាFacebookជំរុញឱ្យក្មេងចេះមានស្នេហា? មូលហេតុនោះគឺ រាល់រូបភាពផ្អែមល្ហែម ស្និទ្ធស្នាល កៀកកើយ ដែលគេបង្ហោះ ជាសាធារណៈគឺធ្វើអោយពួកគាត់ជាអនីតិជន ក្រោម១៨ឆ្នាំ មានអារម្មណ៍ថា ច្រណែនជាមួយគូស្នេហ៍គេ ហើយចង់មានមនុស្សម្នាក់ ធ្វើរឿងបែបនោះចំពោះខ្លួនឯង។ ចំណុចនេះហើយធ្វើឱ្យគាត់ ឈានបង្កើតទំនាក់ទំនង ជាមួយមនុស្សដែលនាង ឬគាត់ចាប់អារម្មណ៍ ហើយឈានទៅរកស្នេហាទាំងវ័យក្មេង។ នេះជាចំណុចបន្ថែមទៀតរបស់ កញ្ញា រចនា។

៣. ប្រលោមលោកបរទេស

ការអានច្រើនចេះច្រើនចម្រើនវិជ្ជា ប៉ុន្តែហេតុអ្វីបានជាយុវវ័យអានប្រលោមលោកហើយបែរជាមានស្នេហា? ប្រលោមលោកគឺមានច្រើនប្រភេទ មានប្រលោមលោកបែបអប់រំ និងប្រលោមលោកបែបស្នេហា យុវវ័យឆើតឆាយ ស្រើបស្រាល។ ការអានប្រលោមលោកច្រើន ជាពិសេសប្រលោមលោកបែបបរទេស រឿងកូរ៉េ ដែលគេឧស្សាហ៍ឃើញលក់នៅតាមរបងសាលា ដែលក្មេងៗជាពិសេសស្រីៗតែងជួលអាន បាននឹងកំពុងជំរុញឱ្យពួកគាត់ចាប់ផ្ដើមកើតកូនចិត្តមួយចង់មានស្នេហា ដូចជាតួអង្គក្នុងរឿង ចង់មានទេវបុត្ត ជិះសេះសមកលួងលោមកៀក កិត ជិតប្រាណ។ មួយវិញទៀតប្រលោមលោកបែបស្នេហាកូរ៉េនេះ ធ្វើអោយគាត់ញៀនភ្លេចរៀនភ្លេចសូត្រក៏មានដែរ អានអស់មួយក្បាលចូលមួយក្បាល។ ដូច្នេះគួរប្ដូរការជួលរឿងប្រលោមលោកនេះ មកទិញសៀវភៅ ច្បាប់ក្រមង៉ុយ សៀវភៅប្រវត្តិសាស្ត្រ ឬសៀវភៅដែលជំរុញឱ្យមានចំណេះដឹងល្អជាង។

៤. ប្រើប្រាស់បច្ចេកវិទ្យាខុស

វិបុល រតនកែវ និស្សិតនៃសាកលវិទ្យាល័យឯកជនមួយបានលើកឡើងថា បច្ចេកវិទ្យា ប្រើប្រាស់ដើម្បីទាញប្រយោជន៍ មកបំពេញតម្រូវការក្នុងការសិក្សាមិនអីទេតែមានអ្នកប្រើប្រាស់ខុសគោលដៅក៏ជះឥទ្ធិពលមិនល្អដែរ។ ចាស់ៗកាលពីសម័យមុនមិនដែលមានបច្ចេកវិទ្យា គាត់ស្រឡាញ់គ្នា មកតាមផ្លូវទៅតាមច្បាប់ ប៉ុន្តែក្មេងសម័យឥលូវមិនបាច់និយាយទេ ទូរស័ព្ទទំនើបៗ គ្រប់ដៃ។ អ្នកខ្លះទាក់ទងគ្នាតាមទូរស័ព្ទ និងកម្មវិធីផ្សេងៗក្នុងទូរស័ព្ទ កុំព្យូទ័រ Laptop អាចនិយាយគ្នាបាន ចង់ឃើញមុខគ្នាក៏បាន។ ដូច្នេះ កត្តានេះហើយដែលជួយសម្រួលដល់ពួកគាត់ក្នុងការបង្កើតស្នេហា។

៥. កត្តាគ្រួសារ

រតនកែវ បន្តទៀតថា គ្រួសារក៏ជាចំណែកមួយដែរ ឪពុកម្ដាយដែលគ្មានពេលវេលា សម្រាប់កូន មិនបានគ្រប់គ្រងមើលខុសត្រូវកូន ក៏ជំរុញឱ្យពួកគាត់ដើរទៅរកផ្លូវនេះដែរ។ ឪពុកម្ដាយ ដែលធ្វើការ រកស៊ីរហូតគ្មានពេលសម្រាប់កូន អាចធ្វើអោយកូនមានអារម្មណ៍ឯកា ខ្វះភាពកក់ក្ដៅ ដូចនេះឱ្យតែមានអ្នកណាចូលមកក្នុងជីវិតរបស់គាត់អាចធ្វើឱ្យមានស្នាមញញឹម ភាពរីករាយ គឺគាត់នឹងចាប់ផ្ដើមទទួលយកម្នាក់នោះជាចំណែកមួយក្នុងជីវិត។ មួយវិញទៀតគ្រួសារដែលមានជីវភាពធូរធារ ឱ្យលុយកូនចាយពេញៗដៃ ក៏ជាមូលហេតុមួយជំរុញឱ្យពួកគាត់ មានឱកាសដើរលេង ចេញក្រៅ មានទំនាក់ទំនងច្រើន ហើយក្នុងនោះក៏មានទំនាក់ទំនងស្នេហាដែរ។

៦. កត្តាមិត្តភក្ដិ

វ័យជំទង់ជាវ័យមួយងាយទទួលយកអ្វីដែលថ្មី ប្លែក។ ដូច្នេះប្រសិនបើក្មេងនោះ សេពគប់ជាមួយមិត្តភក្ដិដែលមានស្នេហា គេអាចចង់មានស្នេហាដូចគេដែរ។ ចង់មានអ្នកខ្វល់ខ្វាយ ចង់មានអ្នកនាំដើរលេង ញ៉ាំនេះញ៉ាំនោះ បង្ហោះសារស្នេហាផ្អែមល្ហែមចង់ឱ្យគេដឹងលឺថាខ្លួនមានស្នេហាតាំងពីក្មេង ចាស់ៗសុំខ្មាស។

អត្ថបទ៖ ថោ ច័ន្ទឬទ្ធិ