នួន សុធារ័ក្ស មានប្រវត្តិតស៊ូបែបណាទម្រាំបានដូចសព្វថ្ងៃ?
- 2016-12-26 03:15:40
- ចំនួនមតិ 0 | ចំនួនចែករំលែក 0
នួន សុធារ័ក្ស មានប្រវត្តិតស៊ូបែបណាទម្រាំបានដូចសព្វថ្ងៃ?
ចន្លោះមិនឃើញ
Top3 ក្នុងកម្មវិធីលំដាប់ពិភពលោក Cambodian Idol នួន សុធារ័ក្ស មុននឹងឈានមកដល់ចំណុចនេះលោកមានការតស៊ូជាច្រើន។ មកតាមដានពីជីវប្រវត្តិខ្លះៗ និងការតស៊ូ របស់ នួន សុធារ័ក្សជាមួយ Sabayខាងក្រោម ៖
១. ប្រវត្តិរូបសង្ខេប៖ នួន សុធារ័ក្ស កើតថ្ងៃទី ០៣ ខែ កុម្ភៈ ឆ្នាំ ១៩៩២ កម្ពស់ ១.៧៤ ម៉ែត្រ និង ៨២គីឡូក្រាម លោកមានស្រុកកំណើតមកពីខេត្ត ពោធិ៍សាត់ ជាកូនទី២ក្នុងគ្រួសារ។
២.ស្ថានភាពគ្រួសារ៖
សុធារ័ក្ស កើតនៅក្នុងគ្រួសារ មធ្យម មួយក្នុងខេត្ត ពោធិ៍សាត់ ដោយលោកឪពុកអ្នកម្ដាយប្រកបរបរ លក់បាយម្ហូប។ លោក មានបងប្អូន ៤ នាក់ ស្រី១ ដោយ សុធារ័ក្ស ជាកូនទី២ ក្នុងគ្រួសារ។
៣. ប្រវត្តិការសិក្សា៖
នួន សុធារ័ក្ស បានបញ្ចប់ការសិក្សាថ្នាក់ទី១២ នៅក្នុងឆ្នាំ ២០០៩ នៅវិទ្យាល័យ បាកាន ខេត្ត ពោធិ៍សាត់។ ពេលបញ្ចប់ការសិក្សាភ្លាមលោកមកបន្តការសិក្សាផ្នែក Design នៅវិទ្យាស្ថាន ស៊ីតិច ប៉ុន្តែដោយសារជួបបញ្ហាមួយចំនួនតម្រូវឲ្យលោកផ្អាកការសិក្សាក្នុងឆ្នាំទី ២ ព្រោះលោកត្រូវស្វែងរកថវិកាដើម្បីជួយជ្រោមជ្រែងគ្រួសារ។
៤. ប្រវត្តិការងារ៖
សុធារ័ក្ស ជាអ្នកចម្រៀងប្រចាំភោជនីយដ្ឋាន BRANDY ដោយភាគច្រើនលោកធ្វើការទាក់ទងតែផ្នែកសិល្បៈប៉ុណ្ណោះព្រោះជាចំណង់ចំណូលចិត្តតាំងពីកំណើត។
៥. បទពិសោធន៍ក្នុងវិថីសិល្បៈ៖
លោកធ្លាប់ចូលរួមក្នុងកម្មវិធីប្រឡងចម្រៀងក្នុងស្រុកមួយតែពុំបានទទួលលទ្ធផលល្អនោះទេ ជាងនេះទៅទៀតលោកក៏ធ្លាប់បានបង្ហាញខ្លួនក្នុងស្ប៉តពាណិជ្ជកម្ម កីឡាកាសមាស និង អាឡិចហ្សង់វីស្គី មិនត្រឹមតែប៉ុណ្ណោះ សុធារ័ក្ស ក៏ធ្លាប់ចូលរួមសម្ដែងរឿង "ផ្កាបួនទង" របស់ស្ថានីយទូរទស្សន៍ CTN ដោយសម្ដែងជាតួអង្គ ប៉ូលិស ផងដែរ។
៦.ឧបសគ្គក្នុងវិថីសិល្បៈ៖
សុធារ័ក្ស បានលើកឡើងថាជីវិតសិល្បៈរបស់លោក ជួបបញ្ហាច្រើនដោយសារតែលោកជាអ្នកមកពីតាមបណ្ដាខេត្ត ដំបូងឡើយលោកមិនសូវស្គាល់ភ្នំពេញប៉ុន្មាននោះទេ តែលោកតែងតែព្យាយាមព្រោះលោកត្រូវរកថវិកាផ្គត់ផ្គង់ខ្លួនឯងនៅទីក្រុងភ្នំពេញ និងមួយចំនួនទៀតត្រូវផ្ញើទៅឲ្យគ្រួសារ។ ដោយចុងក្រោយលោកបានសម្រេចចិត្តចូលប្រឡងចម្រៀងក្នុងកម្មវិធី Cambodian Idol រដូវកាលទី២ សុធារ័ក្ស បានបង្ហាញមុខក្នុងវគ្គដំបូងបទ "មានតែអូនអាចធ្វើឲ្យបងយំ" ដែលជាសំនៀងដើមរបស់លោក ព្រាប សុវត្តិ។
៧. រឿងរ៉ាវដែលចាំមិនភ្លេចក្នុងជីវិត៖
ជីវិតដែលរស់ក្នុងភាពតស៊ូម្នាក់ឯងនៅក្នុងទីក្រុងភ្នំពេញ តាំងពីឆ្នាំ២០០៩ ដោយរៀនបណ្ដើរធ្វើការរកលុយចិញ្ចឹមខ្លួនឯងនិងគ្រួសារបណ្ដើរ។
៨. គោលបំណងទៅថ្ងៃអនាគត៖ ក្រៅពីអាជីពជាតារាចម្រៀង សុធារ័ក្ស បានលើកឡើងថា លោកចង់ក្លាយជាអ្នកជំនួញម្នាក់។
៩. នារីនៅក្នុងក្ដីស្រមៃ៖
បេក្ខភាពរបស់កម្មវិធីប្រឡងចម្រៀងលំដាប់ថ្នាក់ពិភពលោក Cambodian Idol រដូវកាលទី២បញ្ជាក់ថាលោកចូលចិត្តមនុស្សស្រីដែលស្រលាញ់ភាពស្អាត(អនាម័យ) ហើយឆ្នាសបន្តិច និងអ្វីដែលចាំបាច់នោះគឺទឹកចិត្តតែម្ដង។
១០. ការងារបច្ចុប្បន្ន៖
សព្វថ្ងៃលោកនៅតែប្រកបរបរជាអ្នកចម្រៀងតាមភោជនីយដ្ឋានដដែល ប៉ុន្តែលោកបានសូមអនុញ្ញាតអ្នកគ្រប់គ្រងភោជនីយដ្ឋានសម្រាកតាំងពីលោកជាប់ក្នុងកម្មវិធីតាំងពីសប្ដាហ៍ទី៧ ដោយមូលហេតុលោកចង់ផ្ដោតទៅលើការហ្វឹកហាត់ដើម្បីប្រឡងប្រជែងសិន៕