ចំណុចសំខាន់ៗបំផុតគួរតែដឹង មុនទៅលេងកំពង់សោម
- 2016-12-27 03:01:29
- ចំនួនមតិ 0 | ចំនួនចែករំលែក 0
ចំណុចសំខាន់ៗបំផុតគួរតែដឹង មុនទៅលេងកំពង់សោម
ចន្លោះមិនឃើញ
ខេត្តព្រះសីហនុគឺជាគោលដៅទេសចរណ៍ ដ៏សំខាន់ក្នុងឱកាសថ្ងៃឆ្លងឆ្នាំខាងមុខនេះសម្រាប់បងប្អូនប្រជាពលរដ្ឋទូទាំងប្រទេសកម្ពុជាធ្វើដំណើរកម្សាន្ត។ ដំណើរកម្សាន្តជាទូទៅភ្ញៀវទេសចរណ៍ភាគច្រើនបំផុត គឺមិនបានគិតគូពីបញ្ហាដែលអាចកើតមានពេលទៅលេងកម្សាន្ត ឬប្រការគួរយល់ដឹងមុនពេលទៅខេត្តព្រះសីហនុឡើយ ប្រជាពលរដ្ឋគិតថាមានតែលុយគឺគ្រប់គ្រាន់ហើយ។ ប៉ុន្តែដើម្បីឱ្យដំណើរកម្សាន្តចុងឆ្នាំនេះពោរពេញដោយភាពរីករាយ មានសុវត្ថិភាព កាត់បន្ថយការចំណាយ គួរស្វែងយល់ចំណុចសំខាន់ៗដូចខាងក្រោម៖
១.ធ្វើម្ហូបខ្លួនឯងអង្គុយញ៉ាំចុងឆ្នេរ
អ្នកស្រី ថារី ជាអ្នកស្រុកកំណើតនៅខេត្តព្រះសីហនុផ្ទាល់ បានប្រាប់ថា ក្នុងថ្ងៃឆ្លងឆ្នាំប្រសិនបើមកលេងកម្សាន្តនៅខេត្តព្រះសីហនុ អាចមានមនុស្សច្រើនលើសពីថ្ងៃធម្មតា ហើយតម្លៃម្ហូប និងថ្លៃតូបអាចឡើងថ្លៃតិចតួច។ ដូចនេះប្រសិនបើចងកាត់បន្ថយការចំណាយអាចធ្វើម្ហូបពីផ្ទះ ដាំបាយ រៀបចំភេសជ្ជៈ ឱ្យហើយ បន្ទាប់មកអាចយកកន្ទេល ឬតង់ក្រាលអង្គុយនៅចុងឆ្នេរ ដូចជាឆ្នេរអូឈើទាល ឆ្នេរអូត្រេះ ឆ្នេរឯករាជ្យ ដោយគ្មាននរណាហាមឃាត់នោះឡើយ។ ធ្វើបែបនេះមិនត្រឹមតែអាចកាត់បន្ថយការចំណាយនោះទេ ប៉ុន្តែថែមទាំងសប្បាយជាងការជួលតូបគេអង្គុយទៀតផង។
២. ទិញម្ហូបពីផ្សារលើឱ្យហើយ
អ្នកស្រី ថារី បន្តទៀតថា ប្រសិនបើបងប្អូនមិនមានពេលវេលាគ្រប់គ្រាន់ ដើម្បីរៀបចំម្ហូបពីផ្ទះទេ គួរតែទិញម្ហូបពីផ្សារលើខេត្តព្រះសីហនុឱ្យហើយ ព្រោះមានតម្លៃថោកជាងម្ហូបដែលគេលក់នៅតូបផ្ទាល់។ អ្នកស្រី ថារី ប្រាប់ថានៅផ្សារលើ ភ្ញៀវទេសចរណ៍អាចទិញម្ហូបឆៅ ដូចជាគ្រឿងសមុទ្រស្រស់ៗយកឱ្យគេចម្អិនក៏បាន ឬមួយទិញម្ហូបស្រាប់ក៏បានដែរ ចំណែកឯរសជាតិឆ្ងាញ់អាចទទួលយកបាន។ ប៉ុន្តែអ្នកស្រីប្រាប់ថា ប្រសិនបើជួលតូបគេអង្គុយគួរហៅម្ហូបគេតិចតួច បើមិនដូច្នោះទេ ម្ចាស់តូបអាចដំឡើងថ្លៃតូប ដោយសារមិនបានជួយទិញម្ហូបគេ។
៣. ពេលគិតលុយ
លោក ឆាត ជាអ្នករស់នៅខេត្តព្រះសីហនុម្នាក់ដែរ បានបន្ថែមមួយចំណុចទៀតគឺពេលគិតលុយ។ លោកប្រាប់ថា នៅពេលគិតលុយសូមពិនិត្យផ្ទៀងផ្ទាត់តារាងតម្លៃមុខម្ហូបជាមួយនឹងវិក្កយបត្រឱ្យបានច្បាស់លាស់ ពីព្រោះមានម្ចាស់តូបខ្លះអាចឆ្លៀតកែតម្លៃក្នុងវិក្កយបត្រ ឬអាចបន្ថែមមុខម្ហូបដែលមិនបានហៅដើម្បីចំណេញពីភ្ញៀវទេសចរណ៍។ ចំណុចនេះលោកថាកម្រកើតឡើង ប៉ុន្តែអាចនឹងកើតមានចំពោះអ្នកមិនបានគិតដល់ពីបញ្ហានេះ។
៤. កក់ផ្ទះសំណាក់មួយអាទិត្យមុន
ប្រសិនបើមានគម្រោងទៅលេងខេត្តព្រះសីហនុ គួរតែកក់ផ្ទះសំណាក់មុនយ៉ាងហោចណាស់បានមួយអាទិត្យមុនទៅដើរលេង។ លោក ឆាតប្រាប់ថា ប្រសិនបើពេលមកដើរលេងទើបរកផ្ទះសំណាក់ ឬកក់លឿនពេកជាធម្មតាគឺមានតម្លៃថ្លៃលើសពីតម្លៃធម្មតា។ ដូច្នេះហើយគួរកក់ទុកមុនដើម្បីចំណេញលុយទុកដើរលេង និងចំណាយលើអ្វីដែលចាំបាច់ផ្សេងទៀត។
៥. ក្មេងតូចៗ
ចំពោះអ្នកដែលមានកូនតូចៗគួរប្រយ័ត្នបំផុតពេលទៅលេងឆ្នេរសមុទ្រ ការធ្វេសប្រហែសរបស់អ្នកមួយពព្រិចភ្នែកអាចធ្វើឱ្យមានវិប្បដិសារីបាន។ មានកូនតូចមិនគួរឱ្យលេងទឹកសមុទ្រម្នាក់ឯង ឬទុកចោលនោះឡើយ ព្រោះមានករណីគ្រោះថ្នាក់ដោយការលង់ទឹកនេះច្រើនលើកច្រើនសារហើយ ដោយសារឪពុកម្ដាយធ្វេសប្រហែស។
៦. សម្ភារៈមានតម្លៃ
ចំណុចនេះមិនថាតែទៅលេងខេត្តព្រះសីហនុឬតំបន់ទេសចរណ៍ណាក៏ដោយ របស់របរមានតម្លៃគួរកុំទុកចោលឱ្យសោះជាពិសេសក្មេងតូចៗដែលជាអ្នករើសអេតចាយជាដើម ឱ្យតែហ៊ានទុកចោលតែមួយវិនាទី គឺដឹងតែរកលែងឃើញតែម្ដង។ ដូចនេះប្រសិនបើចង់លេងទឹកសមុទ្រ គួរផ្ញើរបស់មានតម្លៃជាមួយបងប្អូន ឬអ្នកណាដែលអ្នកទុកចិត្តបំផុត។
៧. ពេលលេងទឹកសមុទ្រ
ជាទូទៅពេលលេងទឹកសមុទ្រ គឺមានការដោតទង់ជាការកំណត់ជម្រៅទឹក កន្លែងដែលគេដោតទង់នោះមានន័យថាអាចលេងទឹកត្រឹមទង់សម្គាល់នោះតែប៉ុណ្ណោះ។ ដូច្នេះសូមកុំទៅលេងហួសដែនដែលគេកំណត់គឺលេងហួសពីកន្លែងទង់ ទោះបីជាចេះហែលទឹកយ៉ាងណាក៏ដោយ ព្រោះជាកន្លែងគ្រោះថ្នាក់អាចមានគ្រោះថ្នាក់ដល់អាយុជីវិត៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
