រក្សាទំនាក់ទំនងល្អជាមួយមិត្តសំណព្វចិត្តអ្នកដោយរបៀបណា?

2017-01-11 02:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

“មិត្តភាពធ្វើឲ្យអ្នកមិនឯកការ តែបើរាប់អានមិត្តភ័ក្តខុសធ្វើឲ្យអ្នកខុសមួយជីវិត” យល់ស្របដែរទេ ?

ការរាប់អានមិត្តភ័ក្តមានមានឥទ្ធិពលខ្លាំងណាស់មកលើភាពរីករាយប្រចាំថ្ងៃរបស់អ្នក ។ រាប់អានប៉ះមិត្តល្អពូកែរលេងសើច ពេលជួបគ្នាអាចជួយអ្នកបំបាត់ស្ត្រេស មិត្តខ្លះពូកែរនិយាយអាចជួយលួងលោម និងផ្តល់យោបល់ល្អពេលអ្នកជួយទុក្ខលំបាក ជាដើម។ ប៉ុន្តែមិត្តស្និតស្នាលល្អបែបនេះមិនងាយមាននោះទេ តែបើអ្នកជួបហើយត្រូវចេះថែរក្សាទំនាក់ទំនងឲ្យនៅតែល្អជារៀងរហូត ដោយរបៀបណា ?

តោះ ! មើលការចែករំលែកបទពិសោធន៍របស់ អ្នកសារព័ត៌មានវ័យក្មេង កញ្ញា ប៉ុន សោភ័ណ នៃវិទ្យុបារាំងអន្តរជាតិខេមរភាសា (RFI Khmer) ដូចតទៅ ៖

១. តើសោភ័ណចូលចិត្តរាប់អានមិត្តភ័ក្ត ឬ ស្គាល់គេច្រើនដែរទេ ? ចូលចិត្តរាប់អានគេក្នុងអាជីពដូចគ្នា ឬ ផ្សេងៗគ្នា?

ចម្លើយ ៖ ចំពោះខ្ញុំអាចនិយាយបានថា ខ្ញុំចូលចិត្តរាប់អានមនុស្សឱ្យបានច្រើន ណាមួយវាអាចទាក់ទងនិងអាជីពរបស់ខ្ញុំដែរ ។ ធម្មតាធ្វើជាអ្នកសារព័ត៌មានម្នាក់ ប្រាប់គេថាមិនស្គាល់មនុស្សច្រើនក៏គេមិនជឿដែរ ហិហិ។ តែទន្ទឹមនិងនេះ ខ្ញុំយល់ថា ការស្គាល់មនុស្សច្រើនពិតជាអាចធ្វើឱ្យយើងស្គាល់បានច្បាស់នៅប្រភេទមនុស្សផ្សេងៗគ្នា។ មិនថាមនុស្សដែលមាន អត្តចរិកលក្ខណៈដូចយើង ខុសពីយើង ឬប្រហាក់ប្រហែលយើង ។ មនុស្សម្នាក់ៗសុទ្ធតែមានលក្ខណៈពិសេសរៀងៗខ្លួនដែលយើងអាចរៀនសូត្រពីគ្នាទៅវិញទៅមកបាន។ សំខាន់តើយើងបើកចិត្តចង់រាប់អានដែរឬអត់?

២.មានមិត្តស្និតស្នាលសំណព្វចិត្តប៉ុន្មាននាក់ ? ចំនុចពិសេសរបស់មិត្តភាពនេះគឺអ្វី ?

ចម្លើយ ៖ អូ! បើនិយាយពីមិត្តសំណព្វចិត្តវិញ ខ្ញុំមានមិនដល់១០ទេ ក្នុងនោះមាន ២នាក់ដែលស្គាល់គ្នារយៈពេល១៥ឆ្នាំ ។ ព្រោះមិនប្រាកដថាមនុស្សរាប់រយនាក់ដែលយើងស្គាល់អាច ក្លាយជាមិត្តស្និតស្នាលនោះទេ ខ្ញុំក៏មិនដឹងត្រូវបកស្រាយយ៉ាងណាដែរ បើថាខ្ញុំជឿលើរឿងនិស្ស័យបន្តិចក៏ថាបាន គ្រាន់តែយល់ថា មនុស្សយើងគួរមានអ្វីម្យ៉ាងដែលអាចចុះសម្រុងគ្នា បើទោះបីជាពួកយើងមិនមានចរិកលក្ខណៈដូចគ្នាមួយរយភាគរយក៏ដោយ ។

៣.ធ្វើដូចម្តេចខ្លះដើម្បី រក្សាទំនាក់ទំនងល្អជាមួយមិត្តភ័ក្តសំណព្វចិត្តអ្នក?

ចម្លើយ ៖ ជាការពិត បើទោះបីជាមិត្តស្និតស្នាលមែន តែមិនប្រាកដថាត្រូវតែនៅជាធ្វើការជាមួយ ស្នាក់នៅផ្ទះជាមួយ រឺ ទៅណាទៅមកណាជាមួយគ្នាគ្រប់ពេលវេលានោះទេ ។ ពួកយើងមានភារៈកិច្ច កាតព្វកិច្ច និង បេសកម្មជីវិតរៀងៗខ្លួន ។ ម្លោះហើយការរក្សានូវចំណងមិត្តភាពក៏ទាមទារការព្យាយាមរបស់យើងម្នាក់ៗផងដែរ។ ខ្ញុំមានបីចំនុចដែលចង់ចែករំលែកទាក់ទៅ នឹងការរក្សាទំនាក់ទំនងជាមួយមិត្តភក្កិ៖

ទី១ ព្យាយាមធ្វើយ៉ាងណាឲ្យទំនាក់ទំនងកាន់តែស៊ីម្រៅ៖ ព្យាយាមចំណាយពេលដែលល្អៗជាមួយគ្នា, ផ្តល់ការជឿទុកចិត្ត, ចែករំលែកនៅអ្វីដែលអ្នកទាំងពីរស្រលាញ់, គាំទ្រ និង លើកទឹកចិត្តគ្នាទៅវិញទៅមក ។
ទី២ រក្សាទំនាក់ទំនង ៖ ទូរសព្ទ័ រឺ ផ្ញើរសារឲ្យគ្នា សួរសុខទុក្ខ, ទោះរវល់យ៉ាងណាគួរឆ្លៀតពេលជួបគ្នា ញ៉ាំកាហេ្វជុំគ្នា និយាយពីនេះពីនោះ ។ ខ្ញុំចូលចិត្ត Surprise មិត្តភ័ក្តឲ្យគេសប្បាយរំភើបចិត្ត ដូចជា ទិញកាហេ្វកំប៉ុងដែលគេចូលចិត្តផឹកយកទៅឲ្យគេដល់កន្លែងធ្វើការ ។ មិត្តភ័ក្តខ្ញុំមានចរិកប្លែកៗគ្នា តែលក្ខណៈរួមរបស់យើងគឺ ចូលចិត្តផឹកកាហ្វេ ដើរលេង និង ថតរូបលេង ។ បើនិយាយពីរឿងផឹកកាហ្វេក៏គួរឲ្យចាប់អារម្មណ៍ដែរ យើងចូលចិត្តផឹកNescafe កំប៉ុងដូចគ្នាតែរសជាតិខុសប្លែកគ្នាទាំងអស់! ខ្ញុំផឹកតែ Nescafe Latte មានទឹកដោះគោច្រើនហើយកាហ្វេមិនសូវខ្លាំង ឯមិត្តខ្ញុំប៉ុន្មានអ្នកចូលចិត្តជាតិកាហ្វេខ្លាំង អញ្ចឹងគាត់ផឹក Nescafe Expresso Roast និង Dark Roast ។ ហើយយើងមិនដែលខានឡើយ ថតរូបSelfieជុំគ្នាបែបកំប្លែងៗ ធ្វើមុខឃ្យូតៗ និង ថតរូបលេងបែបstyleអត់ដឹងខ្លួន ថតពីក្រោយអីអញ្ចឹង..

ទី៣ សិក្សាលើជម្លោះ ៖ ត្រង់ចំណុចនេះខ្ញុំយល់ថា សំខាន់ណាស់ ! មិត្តភក្កិស្គាល់គ្នាកាន់តែយូរ តិចរឺច្រើនប្រាកដជាធ្លាប់ឈ្លោះគ្នា ។ ដូច្នេះអ្វីដែលជួយកាត់បន្ថយជម្លោះ ឬការយល់ច្រលំ ៖ ត្រូវចេះអត់ធ្មត់, ស្វែងរកហេតុផលនៃបញ្ហាដើម្បីដំណោះស្រាយ, ស្តាប់ការរៀបរាប់ហេតុផលរបស់មិត្តភក្កិ, ត្រូវមានទំនួលខុសត្រូវក្នុងជម្លោះ កុំព្យាយាមយកត្រូវតែខ្លួនឯង និង ជាពិសេសត្រូវរកវិធីដោះ ស្រាយណាមួយដែលល្អបំផុតសម្រាប់អ្នកទាំងពីរក្នុងការជជែកវែកញែកគ្នា។

សរុបមកវិញ ខ្ញុំយល់ថាមិត្តភាពគឺសំខាន់ណាស់ ពេលខ្លះមានអារម្មណ៍ថាហាក់ដូចជាផ្នែកមួយនៃក្រុមគ្រួសាររបស់យើងអច្ចឹង ។ ដូច្នេះហើយទំនាក់ទំនងដែលប្រៀបដូចជាក្រុមគ្រួសារមួយនេះពិតជាត្រូវការពេលវេលា ធ្វើអ្វីៗជាច្រើនជាមួយគ្នា បង្កើនភាពជឿជាក់ ផ្តល់ការគាំទ្រ លើកទឹកចិត្ត និងធ្វើការឆ្លើយតបឱ្យទៅវិញទៅមកជាដើម, នោះខ្ញុំជឿជាក់ថា យើងនឹងអាចកសាងមិត្តភាពមួយដែលគង់វង្សយូរអង្វែង។