ម្នាក់ទៀតហើយ! ល្បីថាក្លឹបនៅចិន ចាយលុយកប់ពពកប្រមាញ់យក Falcao

2017-01-16 11:26:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធសញ្ជាតិកូឡុំប៊ី Radamel Falcao បានក្លាយជាផ្ទាំងស៊ីបរបស់ក្លឹប Tianjin Quanjian ដែលល្បីថាហ៊ានចំណាយ ៥៣លានដុល្លារ ដើម្បីនាំយកកីឡាករជើងស៊ុតក្លឹប Monaco រូបនេះទៅទឹកដីចិន។

កីឡាករ Radamel Falcao បានក្លាយជាតារារះឡើងវិញម្ដងទៀតនៅក្លឹបបារាំង Monaco បន្ទាប់ពីធ្លាក់ស្ទើរដល់បាត អំឡុងពេលចូលរួមជាមួយបិសាចក្រហម Manchester United និង Chelsea ក្នុងនាមជាកីឡាករខ្ចីជើង។ នៅរដូវកាលនេះ កីឡាករវ័យ ៣០ឆ្នាំ បានស៊ុតបញ្ចូលទី១២គ្រាប់ ក្នុងការបង្ហាញខ្លួន ១៤លើកនៃក្របខណ្ឌ Ligue 1 ជួយឲ្យ Monaco ឈរលេខ១ បណ្ដោះអាសន្ន។

ចំណែកក្លឹប Tianjin Quanjian បានឈរនៅចំណាត់ថ្នាក់លេខ១ ក្នុងកំពូលតារាងលីគទី២ របស់ប្រទេសចិនឆ្នាំ២០១៦ ដែលត្រូវឡើងមកលេងនៅលីគទី១ ក្នុងឆ្នាំ២០១៧ នេះ។ ដោយសារចង់ប្រជែងតំណែងក្នុងរដូវកាលថ្មី អ្នកចាត់ការទូទៅរបស់ Tianjin Quanjian ដែលជាអតីតខ្សែការពារសញ្ជាតិអ៊ីតាលី Fabio Cannavaro ចង់រកកម្លាំងថ្មីមកពង្រឹងបន្ថែម ហើយក៏សម្លឹងឃើញ Falcao ជាខ្សែប្រយុទ្ធ។

Cannavaro បានចុះកុងត្រាជាខ្សែបម្រើសញ្ជាតិបែលហ្សិក Axel Witsel ម្នាក់រួចមកហើយ និងកំពុងរកមើលកីឡាករបន្ថែមទៀត ខណៈកីឡាករនៅអឺរ៉ុបជាច្រើនកំពុងស្ថិតក្នុងរ៉ាដា។ ក្លឹបនានានៅប្រទេសចិនពេលនេះ កំពុងប្រជែងគ្នានាំចូល Super Stars លំដាប់ពិភពលោក ដែលធ្វើឲ្យអ្នកគាំទ្របាល់ទាត់ចាប់អារម្មណ៍យ៉ាងខ្លាំង៕