បង្ហាញអារម្មណ៍ពិត សឿយ វិសាល បានស្គាល់យន្តហោះក៏ដោយសារ...

2017-02-06 07:25:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារឆ្នើមរបស់ក្រុមបាល់ទាត់ ព្រះខ័នរាជស្វាយរៀង សឿយ វិសាល ដោយសារអាជីពបាល់ទាត់មួយនេះ ទើបធ្វើឲ្យគេបានជិះយន្តហោះ និងមានជីវភាពធូរធារបន្តិចនាពេលបច្ចុប្បន្ននេះ។

កីឡាករ សឿយ វិសាល

កីឡាករជម្រើសជាតិ សឿយ វិសាល និងជាខ្សែការពារឆ្នើមរបស់ក្រុមបាល់ទាត់ព្រះខ័នរាជស្វាយរៀង បានឲ្យដឹងថា លោកអរគុណណាស់ចំពោះអាជីពមួយនេះ ស្ទើរមិនគូរឲ្យជឿថាបាល់ទាត់បានផ្ដល់ឲ្យគេបានច្រើនដូចនេះ។ ពីមុនជីវភាពក្នុងគ្រួសារលំបាកលំបិន តែបច្ចុប្បន្នកីឡាកររូបនេះ អាចយកលុយមួយផ្នែកពីប្រាក់ខែទៅជួយផ្គត់ផ្គង់គ្រួសារ ពីមុនគ្រាន់តែជាមនុស្សធម្មតា ដែលគេមិនស្គាល់ តែឥលូវបាល់ទាត់ធ្វើឲ្យគេល្បី។

ក្រុមបាល់ទាត់ព្រះខ័នរាជស្វាយរៀង

កីឡាកររបស់ក្រុមស្វាយរៀងម្នាក់នេះបន្ថែមទៀតថា ក្រៅពីថវិកាដែលបានមកពីបាល់ទាត់ គេបានស្គាល់សង្គមខាងក្រៅជាច្រើនដូចជា បានទៅបណ្ដាប្រទេសផ្សេងៗ តាមរយៈការប្រកួតក៏ដូចជាការចេញទៅហ្វឹកហាត់ជាដើមផងដែរ។ ខ្សែការពារដែលជួយឲ្យវិស័យបាល់ទាត់កម្ពុជាមានការរីកចម្រើនរូបនេះ ក៏អរគុណដល់ក្លឹបរបស់ខ្លួនដែលបានជួយជ្រោមជ្រែង និងបណ្ដុះបណ្ដាលឲ្យគេមានការអភិវឌ្ឍន៍ខ្លួនបានល្អរហូតឈានដល់ជាកីឡាករសម្រាប់ក្រុមបាល់ទាត់ជម្រើសជាតិដូចនេះ។

ក្រុមបាល់ទាត់ព្រះខ័នរាជស្វាយរៀង អាវខៀវ

សឿយ វិសាល ជាខ្សែការពាររបស់ក្រុមបាល់ទាត់ ព្រះខ័នរាជស្វាយរៀង ហើយកាលពីប៉ុន្មានថ្ងៃកន្លងទៅនេះ គេបានជួយឲ្យក្រុមមកពីខេត្តស្វាយរៀងមួយនេះ ឈានដល់វគ្គផ្ដាច់ព្រ័ត្រ ពានរង្វាន់ Asia Club Pre-Season Championship (ACC)។ តែកាលពីយប់មិញនេះខ្សែការពារម្នាក់នេះ មិនអាចជួយឲ្យក្រុមស្វាយរៀង លើកពានរង្វាន់ Pre-Season នេះបានទេ គឺចាញ់ក្រុមការពារជាតិ ដោយទាត់បាល់កាត់សេចក្ដី ១១ម៉ែត្រ ៣-៥៕