សត្វចិញ្ចឹមមានសណ្ឋានចម្លែកទាំងនេះ ហាមចិញ្ចឹមដាច់ខាតព្រោះអាចនាំគ្រោះ

2017-02-07 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងជីវភាពរស់នៅប្រចាំថ្ងៃរបស់ប្រជាពលរដ្ឋខ្មែរ តែងចិញ្ចឹមសត្វមួយចំនួនដូចជា គោ ក្របី មាន ទា ជ្រូក ឆ្មា ឆ្កែ ជាដើម។ ប៉ុន្តែចាស់ៗពីដើមក្នុងសង្គមខ្មែរ ក៏មានជំនឿទាក់ទងនឹងការចិញ្ចឹមសត្វក្នុងផ្ទះដែរ។ លោកយាយ វែន រ៉េត ដែលធ្លាប់ដឹងច្រើនពាក់ព័ន្ធជំនឿនេះ បាននិយាយថា សត្វចិញ្ចឹមមួយចំនួនដែលមានសណ្ឋានចម្លែក ខុសប្លែកពីសត្វចិញ្ចឹមទូទៅ ចាស់ៗតែងហាមប្រាមកូនចៅមិនឱ្យចិញ្ចឹមឡើយ ព្រោះអាចនាំឱ្យមានបញ្ហាក្នុងគ្រួសារមិនចេះចប់។

១. គោក្រយៅក្រឡាច់

ជាធម្មតាសត្វគោជាប្រភេទសត្វស្លូត ហើយអាចជួយធ្វើជាកម្លាំងអូសទាញ ក្នុងការធ្វើស្រែចម្ការរបស់មនុស្សទៀតផង។ ប៉ុន្តែតាមជំនឿរបស់ដូនតាខ្មែរតាំងពីបុរាណមក លោកយាយ វ៉ែន រ៉េត ប្រាប់ថាមិនឱ្យចិញ្ចឹមគោក្រយៅក្រឡាច់ដាច់ខាត។ លោកយាយ វ៉ែន រ៉េត និយាយថា ជាទូទៅសត្វគោក្រយៅក្រឡាច់នេះ មានក្រយៅនៅក្បែរនឹងបូករបស់វា ហើយក្រឡាច់ចុះមកក្រោម ដូចនេះប្រសិនបើគោមានក្រយៅបែបនេះដូនតាខ្មែរហាមមិនឱ្យចិញ្ចឹមឡើយ។ តាមជំនឿ ប្រសិនបើចិញ្ចឹមគោប្រភេទនេះ អាចនាំឱ្យមានឧបទ្រពចង្រៃដល់គ្រួសារ រកស៊ីមិនឡើង កូនចៅអាចមានជំងឺឈឺថ្កាត់ តាមទំនៀមត្រូវលក់វាចេញជាបន្ទាន់ ទើបគ្រួសារមានសេចក្ដីសុខ។

២. ឆ្កែកន្ទុយខ្វៀន

លោកយាយ វ៉ែន រ៉េត បាននិយាយទៀតថា សត្វឆ្កែកន្ទុយខ្វៀន ចាស់ៗពីដើមហាមមិនឱ្យកូនចៅចិញ្ចឹមឡើយ។ លោកយាយប្រាប់ថា ឆ្កែកន្ទុយខ្វៀន ជាប្រភេទសត្វឆ្កែដែលមានសន្ដានអាក្រក់បន់ឱ្យម្ចាស់វាស្លាប់អាលនឹងបានស៊ីសាច់ជាអាហារ។ ហេតុដូច្នេះហើយទើបចាស់ៗក្នុងសង្គមខ្មែរតាំងពីបុរាណមិនឱ្យចិញ្ចឹមឆ្កែកន្ទុយខ្វៀនឡើយ។ ប្រសិនបើសុខៗវាមករស់នៅជាមួយត្រូវប្រញាប់យកវាទៅលែងនៅក្នុងវត្ត ទើបក្នុងគ្រួសាររស់នៅមានសេចក្ដីសុខ។

៣. ឆ្មាកូនមួយ

តាមជំនឿរបស់ដូនតាខ្មែរ ដាច់ខាតមិនឱ្យចិញ្ចឹមឆ្មាកូនមួយឡើយ ព្រោះអាចនាំឱ្យមានរឿងមិនល្អដល់គ្រួសារ។ ឆ្មាមានកូនចាប់ពី ២ឡើងទៅ ចាស់ៗគិតថាល្អ អាចទុកចិញ្ចឹមបាន ប៉ុន្តែបើវាមានកូនតែមួយត្រូវយកទៅលែងក្នុងវត្តអារាម ឱ្យស៊ីបាយលោក ទើបអាចបញ្ចៀសគ្រោះចង្រៃផ្សេងៗបាន។

៤. ជ្រូកក្រចកប្រាំ

សត្វជ្រូក ជាទួទៅមានក្រចកបួន មុខពីរក្រោមពីរ ប៉ុន្តែបើជ្រូកមានក្រចករហូត៥ តាមជំនឿខ្មែរពីបុរាណមិនឱ្យចិញ្ចឹមដាច់ខាត។ លោកយាយ វ៉ែន រ៉េត អះអាងថា កាលពីដើមបើផ្ទះអ្នកណាចិញ្ចឹមជ្រូកក្រចកប្រាំ គឺរស់នៅពុំបានសុខឡើយ។ ក្នុងគ្រួសារអាចកើតមានជាជម្លោះ កូនចៅមានជំងឺឈឺថ្កាត់មិនចេះចប់។ ដូច្នេះហើយបានជាចាស់ៗមិនឱ្យទុកចិញ្ចឹមទេ ត្រូវតែលក់ចេញ ឬយកទៅលែងក្នុងវត្ត៕

អត្ថបទ៖ វឌ្ឍនៈ