សម្តេចតេជោក៏គ្រោងចូលរួមលេងពានវាយកូនហ្គោលសម្តេច ហ៊ុន សែន
- 2017-03-22 07:16:36
- ចំនួនមតិ 0 | ចំនួនចែករំលែក 0
សម្តេចតេជោក៏គ្រោងចូលរួមលេងពានវាយកូនហ្គោលសម្តេច ហ៊ុន សែន
ចន្លោះមិនឃើញ
ការប្រកួតវាយកូនហ្គោលពានរង្វាន់សម្តេច ហ៊ុន សែន ឆ្នាំ២០១៧ដែលគ្រោងធ្វើនាថ្ងៃទី១២ ខែមេសា ឆ្នាំ២០១៧ខាងមុខនេះក៏នឹងមានវត្តមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែរ។
ក្នុងសន្និសីទសារព័ត៌មានកាលពីព្រឹកថ្ងៃទី២២ ខែមីនានេះ ឯកឧត្តម ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការនៃសហព័ន្ធកីឡាវាយកូនហ្គោលកម្ពុជាបានឲ្យដឹងថា ការប្រកួតពានរង្វាន់វាយកូនហ្គោលសម្តេច ហ៊ុន សែន លើកទី១ ឆ្នាំ២០១៧នេះត្រូវបានបែកជា២ផ្នែក។ ផ្នែកទី១គឺការប្រកួតពេលព្រឹកដែលមានថ្នាក់ដឹកនាំ និងមន្ត្រីចូលរួមការប្រកួតក្នុងនោះមានទាំងសម្តេចនាយករដ្ឋមន្ត្រី ហ៊ុន សែនផងដែរ។ សម្តេច ហ៊ុន សែនចូលរួមការប្រកួតនេះក្នុងនាមជាកិត្តិយសដល់ព្រឹត្តិការណ៍ប្រកួតទាំងមូល។ ការប្រកួតពេលព្រឹកនេះគឺជាផ្នែកមិនជំនាញពោលគឺក្នុងគោលបំណងមិត្តភាព សាមគ្គីភាព និងសុខភាព។
ឯកឧត្តមបានបន្តថា ចំពោះផ្នែកទី២គឺការប្រកួតលក្ខណៈជំនាញដែលត្រូវធ្វើថ្ងៃរសៀល។ ផ្នែកនេះជាការចូលរួមប្រកួតប្រជែងដោយកីឡាករអាជីពទាំងកីឡាករជាតិ និងអន្តរជាតិ។ មិនប្រកាន់ថា កីឡាករវ័យក្មេង ចាស់ ឬអាយុប៉ុន្មានឡើយឲ្យតែគិតថា ខ្លួនមានជំនាញវាយកូនហ្គោលកម្រិតខ្ពស់គឺអាចចូលរួមបាន។ បន្ទាប់ពីបញ្ចប់ការប្រកួតនៅវេលាប្រហែលម៉ោង៥ល្ងាចក៏នឹងមានពិធីជប់លៀងយ៉ាងពិសេសដែលចូលរួមដោយសម្តេច ហ៊ុន សែន ព្រមទាំងមន្ត្រី និងកីឡាករទាំងអស់។
ឯកឧត្តម ជា បូរ៉ា បានបរិយាយពីគោលបំណងនៃការរៀបចំពានរង្វាន់នេះគឺមាន៣ចំណុច។ ទី១គឺដើម្បីបង្កើនគុណភាព និងសមត្ថភាពរបស់កីឡាករ។ ទី២ដើម្បីស្វែងថវិកាជួយដល់មន្ទីរពេទ្យកុមារគន្ធបុប្ផា និងទី៣ដើម្បីអបអរសាទរដល់ឆ្នាំថ្មីប្រពៃណីជាតិដែលអង្គរសង្ក្រានឆ្នាំនេះក៏ធ្វើនៅខេត្តសៀមរាប។ ថវិកាដែលទទួលបានពីសប្បុរសជនគឺរក្សាសម្រាប់សប្បុរសធម៌ទាំងអស់ ខណៈការចំណាយមានថវិកាផ្សេង។
ចំពោះប្រាក់រង្វាន់ដល់ជយលាភីមិនត្រូវបានប្រកាសនៅឡើយទេ។ ការប្រកួតនឹងប្រព្រឹត្តទៅថ្ងៃទី១២ ខែមេសា ឆ្នាំ២០១៧នៅទីលានវាយកូនហ្គោលអង្គររីសត់៕