អធិរាជកែងឆេះជង្គង់ហោះ អេ ភូថង ឡើងវ៉ៃជាមួយថៃ ថ្ងៃអាទិត្យនេះ

2017-05-31 03:31:50
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីឃ្លាតឆ្ងាយពីសង្វៀនប្រដាល់ជាច្រើនឆ្នាំ លោក អេ ភូថង អតីតកំពូលអ្នកប្រដាល់ដែលអ្នកស្នេហាវិស័យកីឡាប្រដាល់ក្បាច់គុនបុរាណខ្មែរចាត់ទុកជា អធិរាជកែងចេះជង្គង់ហោះ នឹងវិលត្រឡប់មកកាន់សង្វៀនសាជាថ្មី ក្នុងជំនួបមិត្តភាពអន្តរជាតិចុងក្រោយបង្អស់របស់លោកលើសង្វៀន សមរភូមិអ្នកប្រយុទ្ធភេសជ្ជៈគោជល់ នៅស្ថានីយទូរទស្សន៍ ភីអិនអិន នាថ្ងៃអាទិត្យ ទី៤ មិថុនា ២០១៧ នេះ។

ការវិលត្រឡប់មកកាន់សង្វៀននេះ គឺដើម្បីស្វែងរកថវិកាជួយមន្ទីរពេទ្យ គន្ធបុប្ផា ជាការរួមចំណែកមនុស្សធម៌ ត្បិតលោកពុំមានទ្រព្យធន ក្រៅពីប្រើអាជីពដែលធ្លាប់ពឹងអាស្រ័យស្ទើរមួយជីវិតទៅហើយ។ គ្រូបង្វឹកគុនខ្មែរជម្រើសជាតិកម្ពុជាវ័យ ៤៣ ឆ្នាំរូបនេះ ត្រូវទទួលស្វាគមន៍អ្នកប្រដាល់ថៃរួមជំនាន់ កាណុងស័ក្តិលេក ខេធីយិម ដែលជាគ្រូបង្វឹកប្រចាំក្លឹបប្រដាល់ ផ្រានយីស៊ីបហុក ក្នុងប្រភេទទម្ងន់ ៩០ គ.ក្រ។

ក្រៅពីវត្តមានអធិរាជកែងឆេះជង្គង់ហោះ អេ ភូថង កំពូលអ្នកលេងកណ្ដាប់ដៃមហាទម្ងន់ប្រជាប្រិយភាពខ្ពស់នាពេលបច្ចុប្បន្ន រឿង សោភ័ណ្ឌ ក៏ទទួលភារកិច្ចស្វាមន៍អ្នកប្រដាល់ថៃជំនាញក្បាច់រន្ទះជើង ស៊ុភឆ័យ ក្នុងប្រភេទទម្ងន់ ៦៩ គ.ក្រ ផងដែរ។ នេះជាការប្រកួតលើកទី៣ របស់សិស្សគុនខ្មែរក្លឹបមកុដរាជសីហ៍ក្នុងកម្មវិធី សមរភូមិអ្នកប្រយុទ្ធ ដែលការប្រកួតចុងក្រោយកន្លងទៅថ្មីៗនេះ រូបគេបានស្មើពិន្ទុ នឹងជើងខ្លាំងថៃ ឃុនផែន។

ដើម្បីលើកស្ទួយវិស័យកីឡាប្រដាល់ក្បាច់គុនបុរាណខ្មែរ និងបណ្តុះបណ្ដាលថ្នាលកីឡាករជំនាន់ថ្មី សមរភូមិអ្នកប្រយុទ្ធភេសជ្ជៈគោជល់ នឹងរៀបចំការប្រកួតមិត្តភាពអន្តរជាតិសម្រាប់អ្នកប្រដាល់វ័យក្មេងជារៀងរាល់សប្ដាហ៍។ សម្រាប់ថ្ងៃអាទិត្យ ទី៤ មិថុនា នេះ កូននាគជាយដែនខេត្តបន្ទាយមានជ័យ វ័ន្ត ថៃដេ ទទួលបានឱកាសសាកល្បងសមត្ថភាព និងអ្នកប្រដាល់វ័យក្មេងថៃ កានក្រៃ ក្នុងប្រភេទទម្ងន់ ២៧ គ.ក្រ។

ព្រឹត្តិការណ៍ប្រដាល់គុនខ្មែរដ៏កក្រើកមួយនេះ នឹងចាប់ផ្ដើមនៅម៉ោង ៥:០០ ល្ងាច ហើយផ្សាយផ្ទាល់លើកញ្ចក់ទូរទស្សន៍ ភីអិនអិន។ សម្រាប់អ្នកដែលចង់ចូលរួមឧបត្ថម្ភលោក អេ ភូថង អាចទាក់ទងដោយផ្ទាល់មកកាន់លោក ស្រ៊ឺ ស្រេង ប្រធានផ្នែកកីឡារបស់ ភីអិនអិន តាម 016 757 168៕

ដោយ៖ សុផាត