មកមើលជំនាញសិល្បៈកូនទាំង២ ខាត់ សុឃីម អាចស្នងត្រកូលខាត់បានអត់?

2017-07-19 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនប្រុសច្បងអ្នកនាងខាត់ សុឃីម មានអាយុជិត ១២ឆ្នាំ ចំណែកកូនស្រីវ័យជិត៤ឆ្នាំ អ្នកទាំងពីរ សុទ្ធតែមានជំនាញសិល្បៈផ្សេងៗគ្នា នេះបើលើកឡើងរបស់អ្នកនាងខាត់ សុឃីម ប្រាប់ Sabay។

កូនប្រុសច្បងមានឈ្មោះ បញ្ញា ស្កាយ យសសក្ក័ កើតថ្ងៃទី២០ ខែ តុលា ឆ្នាំ ២០០៥ បច្ចុប្បន្នទើបតែបញ្ចប់ថ្នាក់ទី៧ ហើយចូលកងវិញឡើងថ្នាក់ទី៨។ ចំណែកកូនស្រីឈ្មោះ បញ្ញា ហ្វូតូស្អាត នៅថ្ងៃទី៩ ខែ តុលា ឆ្នាំ ២០១៣។ អ្នកនាងប្រាប់ថា កូនច្បងរបស់ខ្លួនចេះជំនាញសិល្បៈច្រើន ក្នុងនោះមានទាំងផ្នែកឧបករណ៍ភ្លេងបូរាណ និង សម័យ ចំពោះស្គរមានជំនាញខ្លាំងជាងគេ។

"ឧបករណ៍វាចេះច្រើនមុខតើ ហើយវាច្រៀងបាន តែវាច្រៀងបែបរ៉េប វាយវ៉ៃស្គរផងច្រៀងផង បើកីឡាវិញវាចូលចិត្តបាល់ទាត់ណាស់" អ្នកនាង ខាត់ សុឃីម ថ្លែង។

ចំពោះកូនស្រីវិញដោយសារតែទើបតែអាយុជិត៤ឆ្នាំ ដូចនេះមិនទាន់ចេះអ្វីច្រើនទេ ពោលគឺចេះតែរាំលេងប៉ុណ្ណោះ ប៉ុន្តែបើតាមសង្កេតមើលអ្នកនាងថា កូនទាំង២របស់ខ្លួនមានគឺមានជំនាញទៅខាងសិល្បៈច្រើន មិនខុសសមាជិកផ្សេងទៀតក្នុងត្រកូលខាត់ឡើយ។

ទោះបីជាកូនអាចមានសមត្ថភាពសម្ដែងសិល្បៈដែលអាចជួយរកប្រាក់បានក្ដី អ្នកនាង ខាត់ សុឃីម មិនបានឲ្យកូនដើរតាមក្រុមអកកេស ឬក្រុមភ្លេងខ្មែរ ជាមួយម្ដាយឡើយ គឺទុកពេលឲ្យកូនរៀនឲ្យបានច្រើនសិន។ "ខ្ញុំអត់ទាន់ឲ្យដើរច្រៀងតាមខ្ញុំទេ ទុកឲ្យវារៀនសិន តែបើឡើងកម្មវិធីថ្នាក់ជាតិធំៗជុំក្រុមត្រកូលខាត់ទេ ដូចកម្មវិធីជាមួយសម្ដេចនៅស្តាតអូឡាំពិកថ្ងៃមុនអីចឹង ដឹងថាខ្ញុំឲ្យពួកគាត់ឡើងហើយ " តារាស្រីមានពហុជំនាញបញ្ជាក់បន្ថែម។

តាមការឲ្យដឹងពីអ្នកនាង ខាត់ សុឃីម ត្រកូលខាត់មានកូនបង្កើតចំនួន៩នាក់ ប្រុស៥ស្រី ៤រៀបការអស់៨ សល់១ ហើយបច្ចុប្បន្នមានចៅ១៤នាក់ប្រុស ៧ស្រី៧ ៕

អត្ថបទៈ ស៊ុនហួត