iPhone ចេញឆ្នាំនេះ នឹងមានតែ ៣ ពណ៌គត់

2017-08-09 02:06:24
ចំនួនមតិ 0 | ចំនួនចែករំលែក 0

ចន្លោះមិនឃើញ

iPhone ស៊េរីថ្មីរបស់ Apple ដែលនឹងបង្ហាញខ្លួនឆាប់ៗខាងមុខនេះរួមមាន iPhone 7s, 7s Plus និង iPhone 8 នឹងមានជម្រើសពណ៌តែបីគត់។ នេះបើតាមការឲ្យដឹងពីអ្នកវិភាគល្បីឈ្មោះលោក Ming-Chi Kuo។

កន្លងមកលោក Kuo ធ្លាប់បានលើកឡើងថា iPhone 8 នឹងមានជម្រើសពណ៌តិចបំផុត ដោយមិនបាននិយាយពី iPhone 7s និង 7s Plus ឡើយ។ ប៉ុន្តែលើកនេះសរុបចូលគ្នាតែម្ដង ដោយជម្រើសពណ៌ទាំងបីរួមមានពណ៌មាស, ពណ៌ខ្មៅ និង ពណ៌ប្រាក់។ ជម្រើសពណ៌បីនេះស៊ីគ្នានឹងរូបរាងលេចធ្លាយកាលពីដើមសប្ដាហ៍កន្លងទៅ ប៉ុន្តែពណ៌មួយក្នុងចំណោមរូបលេចធ្លាយនោះមើលទៅដូចជាពណ៌ទង់ដែងច្រើនជាងពណ៌មាស។

ប្រសិនបើ Apple ពិតជាបង្ហាញចេញ iPhone ស៊េរីថ្មីជាមួយជម្រើសពណ៌ត្រឹម ៣ មែន នោះនឹងលែងមានជម្រើសពណ៌ផ្កាឈូក ឬ ជម្រើសពណ៌ខ្មៅប្រភេទខុសៗគ្នាដូចដែលមានលើ iPhone 7 ទៀតហើយ។

iPhone 7 Plus ពណ៌ផ្កាឈូក

អ្នកវិភាគខាងលើក៏បានបង្ហាញការរំពឹងថា Apple នឹងចាប់ផ្ដើមផលិតសាកល្បងនូវ iPhone 8 នាចុងខែសីហា ហើយនឹងផលិតទ្រង់ទ្រាយធំនៅពាក់កណ្ដាលខែកញ្ញា លឿនជាងការប៉ាន់ស្មានកន្លងមកដែលថាការផលិតទ្រង់ទ្រាយធំនឹងធ្វើឡើងពាក់កណ្ដាលខែតុលាឯណោះ។ ការផលិតក្នុងពេលលឿនជាងបែបនេះនាំឲ្យលោក Kuo រំពឹងថា Apple នឹងប្រកាស iPhone ស៊េរីថ្មីទាំងបីក្នុងពេលជាមួយគ្នានាខែកញ្ញា ហើយនឹងចេញលក់ក្នុងថ្ងៃតែមួយផងដែរ៕

ចុចអាន៖

ប្រភព៖ macrumors ប្រែសម្រួល៖ សុខហេង