សួន ចាន់ណារ៉ូ៖ ប្រធានក្រុមជម្រើសជាតិបាល់ទះកម្ពុជាមានប្រវត្តិជូរចត់មិនធម្មតា

2017-08-15 03:24:31
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករបាល់ទះឆ្នើមរបស់ក្រុមវិសាខា ដែលបានជួយក្រុមឲ្យឈ្នះពានរង្វាន់ធំៗ ជាច្រើនកន្លង សួន ចាន់ណារ៉ូ ដំបូងឡើងចាប់ផ្ដើមលេងបាល់នៅក្នុងវត្ត ហើយបន្តព្យាយាមតស៊ូរហូតជោគជ័យដល់សព្វថ្ងៃនេះ។

កីឡាករ សួន ចាន់ណារ៉ូ

កីឡាករ សួន ចាន់ណារ៉ូ បានឲ្យដឹងថា ដោយចិត្តស្រឡាញ់បាល់ទះតាំងពីកុមារភាព ទើបជំរុញរូបគេឲ្យខិតខំ និងចាប់យកអាជីពបាល់ទះនេះតែម្ដង។ មុនក្លាយជាកីឡាករជម្រើសជាតិបាល់ទះកម្ពុជា កីឡាកររូបនេះ បានឆ្លងកាត់ការលេងបាល់ទះនេះរាប់ភ្លេចទៅហើយ មិនថាលេងធម្មតាតាមភូមិ ឬតាមសាលានោះទេ។

កីឡាករជម្រើសជាតិកម្ពុជា

ដោយដឹងថាខ្លួនមិនអាចចាប់យកការសិក្សាទៀតបាននោះ ទើបកីឡាករវ័យ ២២ឆ្នាំ រូបនេះក៏សម្រេចចិត្តសុំក្រុមគ្រួសារហាត់ចាប់អាជីពបាល់ទះមកដល់សព្វថ្ងៃនេះតែម្ដង។ មុនក្លាយជាកីឡាករឆ្នើម និងមានសមត្ថភាព ខ្លួនឆ្លងកាត់លំបាកជាច្រើន សំណាក់ក្រុមគ្រួសារជាពិសេសម្ដាយតែម្ដង ក្រៅពីនោះលទ្ធភាពក្នុងការទៅហ្វឹកហាត់ក៏មិនសូវមាន និងមិនអំណោយផង ហើយក៏មានរនាំងពីមជ្ឈដ្ឋានខាងក្រៅត្រូវគេប្រមាថមើលងាយជាដើមផងដែរ។

កីឡាករដែលជួយឲ្យវិសាខាឈ្នះមេដាយមាសកីឡាជាតិលើកទី១ នេះ បន្ថែមទៀតថា សព្វថ្ងៃនេះអាចថាការតស៊ូទាំងប៉ុន្មានកន្លងមកនេះ វាទទួលបានបានជោគជ័យហើយ ដោយបច្ចុប្បន្ននេះបានលេងនៅក្លឹបធំមួយ និងបានជាប់ជាកីឡាករជម្រើសជាតិទៀតផង។

កីឡាករ សួន ចាន់ណារ៉ូ

សួន ចាន់ណារ៉ូ ជាប្រធានក្រុមជម្រើសជាតិបាល់ទះកម្ពុជា គេលេងក្នុងទម្រង់ជាអ្នកលើកបាល់(ប៉ះសេ) ហើយប្រធានក្រុមរូបនេះ រួមនិងកីឡាករជម្រើសជាតិបាល់ទះកម្ពុជាទាំងអស់ នឹងចេញទៅប្រទេសម៉ាឡេស៊ី នៅថ្ងៃទី ១៩ សីហា នេះ ដើម្បីចូលរួមប្រកួតកីឡាស៊ីហ្គេម លើកទី២៩៕

អត្ថបទ៖ នួន ស៊ីណា