ចាប់ពី ៨០ដុល្លារទៅ! ហោះផ្ទាល់រវាងម៉ាឡេ និងកំពង់សោម

2017-08-16 09:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងឱកាសបើកសម្ពោធជើងហោះហើរដំបូងបង្អស់របស់អាកាសចរណ៍ AirAsia ពីក្រុងកូឡាឡាំពួរ ម៉ាឡេស៊ី ទៅក្រុងព្រះសីហនុ សម្រេចបានជោគជ័យដោយមានផ្ទុកអ្នកដំណើរពេញយន្តហោះគ្មានកៅអីទំនេរឡើយ។ ផ្លូវអាកាសថ្មីរបស់ Air Asia ទៅកាន់ក្រុងព្រះសីហនុ មាន ៤ជើង ក្នុងមួយសប្ដាហ៍ ហោះផ្ទាល់ពីក្រុងព្រះសីហនុទៅកាន់កូឡាឡាំពួរ ប្រទេសម៉ាឡេស៊ី ដោយមានតម្លៃចាប់ពី ៨០ដុល្លារឡើងទៅ ។ នេះគឺជាក្រុមហ៊ុនអាកាសចរណ៍ទីមួយរបស់ម៉ាឡេស៊ីដែលបើកដំណើរការផ្លូវអាកាសតែមួយគត់នេះនៅកម្ពុជា។

ការហោះហើរដ៏ថ្មីស្រឡាងដោយយន្តហោះ AK264 ចេញពីកូឡាឡាំពួរនេះ ត្រូវបានកត់ត្រាទុកជាជើងហោះហើរពិសេសដោយការផ្ទុកពេញចំណុះ 100% ហើយភ្ញៀវទាំងអស់ត្រូវបានបម្រើដោយមានរៀបចំនូវពិធីអបអរជូនដំណើរភ្ញៀវយ៉ាងពិសេសផងដែរ។ ចំណែកនៅឯព្រលានចំណតគោលដៅក្នុងក្រុងព្រះសីហនុវិញ ក៏មានពិធីទទួលភ្ញៀវក៏ត្រូវបានរៀបចំយ៉ាងឱឡារិកដោយការបាញ់ទឹក អបអរយន្តហោះនៅពេលចុះសំចត។

លោក Spencer Lee នាយកពាណិជ្ជកម្មអាកាសចរណ៍ AirAsia Berhad បានថ្លែងថា « ដំណើរហោះហើរលើកទីមួយមកកាន់ក្រុងក្រុងព្រះព្រះសីហនុត្រូវបានចាត់ទុកការវិវត្តន៍ថ្មីមួយដោយការដឹកជញ្ជូនភ្ញៀវពេញយន្តហោះសម្រាប់ផ្លូវអាកាសទី ៥០ របស់យើងនេះ។ ក្នុងនាមជាអាកាសចរណ៍ចេញពីប្រជាជាតិអាស៊ានពិតៗ យើងនឹងបន្តការប្ដេជ្ញាដើម្បីលើកស្ទួយ និងជំរុញវិស័យទេសចរណ៍សម្រាប់គ្រប់ប្រទេសទាំងអស់ដែលយើងបានបើកដំណើរការ ជាពិសេសប្រទេសក្នុងតំបន់នេះ»។

« ទីក្រុងមាត់សមុទ្ររបស់កម្ពុជាមួយនេះបង្ហាញនូវកាលានុវត្តសក្ដានុពលដ៏ធំធេងនិងការវិវត្តយ៉ាងឆាប់រហ័សសម្រាប់វិស័យ ទេសចរណ៍ ពាណិជ្ជកម្ម និងសេដ្ឋកិច្ច ដែលយើងសប្បាយចិត្តក្នុងការចូលរួមមួយផ្នែកដើម្បីដើម្បីអភិវឌ្ឍក្រុងព្រះសីហនុបន្ថែមទៀត។ ឆ្លៀតក្នុងឱកាសនេះ យើងខ្ញុំសូមថ្លែងអំណរគុណដល់ អាកាសចរណ៍កម្ពុជា អាជ្ញាធរដែនដីនិងអាជ្ញាធរទេសចរណ៍កម្ពុជាចំពោះការជួយគាំទ្រយ៉ាងកក់ក្ដៅរបស់គាត់ក្នុងការបើកដំណើរការផ្លូវហោះហើរថ្មីមួយនេះ» ។

«ដោយការបន្ថែមផ្លូវអាកាសក្រុងព្រះសីហនុចូលក្នុងបណ្ដាញរបស់យើងខ្ញុំដែលមានជាង ១២០ ចំណតគោលដៅ យើងខ្ញុំសង្ឃឹមថាទីក្រុងនេះនឹងរីកចម្រើនទៅមុខដោយក្លាយជាចំណតគោលដៅទេសចរណ៍ដ៏មានប្រជាប្រិយភាពមួយដែលបើកផ្លូវដល់អ្នកធ្វើដំដំណើរទទួលបាននូវបទពិសោធន៍ថ្មីៗជាច្រើននូវទឹកដីលាក់កំបាំងដ៏មានសក្ដានុពលក្នុងតំបន់អាស៊ានដែលមិនទាន់បានដឹងនៅឡើយ» ។

លោកបន្ថែមថា «សំខាន់ជាងនោះ ការបើកការហោះហើរដោយផ្ទាល់នេះ គឺយើងចង់បើកឱកាសដល់ប្រជាជនក្រុងព្រះសីហនុមានភាពងាយស្រួលក្នុងក្នុងការធ្វើដំណើរតាមអាកាសទៅកាន់តំបន់អាស៊ានផ្សេងៗនិងទៅកាន់ពិភពលោកដោយបណ្ដាញតភ្ជាប់ទូលំទូលាយរបស់យើងដែលមាន ២៧ប្រទេស។»

ក្រុងកូឡាឡាំពួរ ជាចំណុចប្រសព្វដ៏ធំរបស់អាកាសចរណ៍ AirAsia ដោយតភ្ជាប់ទៅកាន់ ២៧ប្រទេសដែលជាចំណតគោលដៅរួមមាន Gold Coast ស៊ីដនី Perth, Auckland តូក្យូ ប៉េកាំង សៀងហៃ និងចំណតផ្សេងៗដែលជាការហោះហើរត្រង់ចេញពីទីក្រុងនេះ។

អាកាសចរណ៍ AirAsia ភ្ជាប់ការហោះហើរពីក្រុងភ្នំពេញទៅក្រុងកូឡាឡាំពួរ ដោយមានជើងហោះហើរ ២១ដងក្នុងមួយសប្ដាហ៍ និងព្រលានយន្តហោះសៀមរាបមានជើងហោះហើរ ១៤ដងក្នុងមួយសប្ដាហ៍។ អាកាសចរណ៍នេះក៏មានសេវាបម្រើសម្រាប់ការហោះហើរមិនឆ្លងការត្រួតពិនិត្យអន្តោប្រវេសន៍ (Fly-Thru ) ពីកម្ពុជាទៅកាន់ជើងហោះហើរចំនួន ៥៨ផ្លូវអាកាសដែលចេញពី ១៣ប្រទេសរួមមាន ឥណ្ឌូណេស៊ី អូស្ត្រាលី ម៉ាឡេស៊ី នូវែលហ្សេឡង់ តៃវ៉ាន់ ជប៉ុន ចិន ឥណ្ឌា កូរ៉េខាងត្បូង ហ្វីលីពីន ប្រ៊ុយណេ នេប៉ាល់ និងអ៊ីរ៉ង់។

ដើម្បីទទួលព័ត៌មានថ្មីពី AirAsia សកម្មភាពផ្សេងៗ និងកម្មវិធីពិសេសៗ សូមតាមដាន តាមប្រព័ន្ធ Twitter.com/AirAsia និង Facebook.com/AirAsia។

ដោយ៖ លីដា