សន្យាផ្ដល់រង្វាន់ ១ម៉ឺនដុល្លារ ក្នុងករណីរកឃើញភស្តុតាងធ្លាយវិញ្ញាសាបាក់ឌុប

2017-08-18 14:39:11
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានអះអាងថា នឹងផ្ដល់រង្វាន់លើកទឹកចិត្ត១ម៉ឺនដុល្លារអាមេរិក ក្នុងករណីជនណាម្នាក់ រកឃើញមានការបែកធ្លាយវិញ្ញាសាការប្រលងសញ្ញាបត្រមធ្យមសិក្សាទុតិយភូមិ (បាក់ឌុប) ២០១៧នេះ។

ថ្លែងក្នុងឱកាសជួបជុំអ្នកសង្កេតការណ៍ប្រលងបាក់ឌុបនៅថ្ងៃទី១៨ ខែសីហា នេះ លោក ឱម យ៉ិនទៀងបានលើកឡើងថា ACU ហ៊ានទិញ ឬផ្ដល់រង្វាន់១ម៉ឺនដុល្លារសហរដ្ឋអាមេរិក ករណីអ្នកស្ម័គ្រចិត្តសង្កេតការណ៍ប្រឡងបាក់ឌុប ឬ អ្នកផ្សេងចាប់បាន ភស្តុតាងច្បាស់លាស់ថា មានការបែកធ្លាយវិញ្ញាសាប្រលងសញ្ញាបត្រមធ្យមឆ្នាំ ២០១៧។

«វាអត់មាន…បើមានខ្ញុំមិនសូវហ៊ានចាយលុយទេ គឺចាប់យកតែម្តង ព្រោះចាប់វាមិនបាន បានចាយលុយហ្នឹង…ខ្ញុំមិនជឿថាមានបើមានខ្ញុំជូនតម្លៃនៃការប្រឹងប្រែង ប៉ុន្តែខ្ញុំមើលទៅស៊ីឡាកទេ…ព្រោះអត់មានអ្វីពិតប្រាកដទេ។» កន្លងមកអំឡុងការប្រលងសញ្ញាបត្របាក់ឌុប តែងមានពាក្យចរចាមអារ៉ាមបែក ធ្លាយវិញ្ញាសាប្រលង រហូតមានបង្ហោះតាមបណ្ដាញសង្គម Facebook ក៏មាន។ ប៉ុន្តែការបង្ហោះនោះត្រូវបានក្រសួងអប់រំបដិសេធ និងថា ជាវិញ្ញាសាក្លែងក្លាយ។ លោក ឱម យ៉ិនទៀង លើកឡើងថា ក្រសួងអប់រំទាំងបច្ចុប្បន្ន និងសម័យលោក អ៊ឹម សិទ្ធី ជារដ្ឋមន្ត្រីមានការប្រុងប្រយ័ត្នខ្ពស់ណាស់ជុំវិញការរក្សាសម្ងាត់វិញ្ញាសាប្រលងនេះ។ ការប្រលងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះ មានបេក្ខជនប្រលងជិត ១០ម៉ឺននាក់។ លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាធ្លាប់បានលើកឡើងពីការរក្សាការសម្ងាត់វិញ្ញាសាប្រលងយ៉ាងម៉ត់ចត់បំផុតមិនឱ្យបែកធ្លាយនោះទេ។ ក្នុងនោះរាប់បញ្ចូលទាំងការវេចខ្ចប់ និងការដឹកជញ្ជូនក្រដាសវិញ្ញាសាទៅកាន់មណ្ឌលប្រលងទូទាំងប្រទេស៕

អត្ថបទ៖ សុផល