បែកធ្លាយ! ហាង Addidas លក់អាវ Man Utd លេខ ១០ មានឈ្មោះ Zlatan ពីក្រោយ

2017-08-22 12:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យចចាមអារាមទាក់ទងនឹងការវិលត្រលប់មកវិញឆាប់ៗ របស់ខ្សែប្រយុទ្ធសញ្ជាតិស៊ុយអែត Zlatan Ibrahimovic មកក្លឹបបិសាចក្រហម Manchester United កក្រើកខ្លាំងក្នុងថ្ងៃនេះ បន្ទាប់ពីហាង Addidas ផ្លូវការ (អ្នកផ្គត់ផ្គង់ដ៏ធំសម្រាប់ក្លឹបបិសាចក្រហម) នៅសហរដ្ឋអាមេរិក បានដាក់លក់ខោអាវ លេខ ១០ របស់ក្លឹបមួយនេះដោយមានឈ្មោះ Zlatan Ibrahimovic នៅពីខាងក្រោយ។

កីឡាករវ័យ ៣៥ឆ្នាំរូបនេះ បច្ចុប្បន្នកំពុងចរចាជាមួយក្លឹបបិសាចក្រហម ក្នុងការចុះកុងត្រាថ្មី ដើម្បីចូលលេងឲ្យក្លឹបវិញ បន្ទាប់ពីរូបគេជិតជាពីរបួសក្បាលជង្គង់វិញ តាំងពីខែមេសាកន្លងមក។

ព័ត៌មានបែកធ្លាយនៃការលក់អាវរបស់កីឡាកររូបនេះ បានបង្ហាញពីភាពជឿជាក់របស់ Addidas ថា ខ្សែប្រយុទ្ធរូបនេះនឹងចុះកុងត្រាឲ្យរបស់ក្លឹបបិសាចក្រហមជាក់ជាមិនខាន។ រីឯអាវលេខ ៩ របស់ក្លឹបត្រូវបានពាក់ដោយខ្សែប្រយុទ្ធទើបនាំចូលថ្មី Romelu Lukaku បើសិនជា Zlatan ត្រលប់ចូលរួមក្លឹបបិសាចក្រហមមែន គេអាចនឹងពាក់អាវលេខ ១០ ដែលជាអាវទំនេរមិនទាន់មានម្ចាស់ បន្ទាប់ពីការចាកចេញរបស់ខ្សែប្រយុទ្ធ Wayne Rooney ទៅ Everton កាលពីពេលថ្មីៗនេះ។

អាវ Man Utd លេខ ១០ មានឈ្មោះ Zlatan

កាលពីខែមិថុនា ខ្សែប្រយុទ្ធចាស់វស្សារូបនេះ មិនត្រូវបានក្លឹបផ្ដល់កុងត្រាថ្មីឲ្យឡើយ ដោយសាររបួសជង្គង់របស់គេ ហាក់មានសភាពធ្ងន់ធ្ងរនៅឡើយ ហើយត្រូវបានក្រុមអ្នកជំនាញគិតថា កីឡាកររូបនេះនឹងមិនអាចចូលលេងវិញបានរហូតដល់ដើមឆ្នាំក្រោយ។ ក៏ប៉ុន្តែក្រុមគ្រូពេទ្យបានភ្ញាក់ផ្អើលយ៉ាងខ្លាំងចំពោះដំណើរការនៃការជាសះស្បើយនៃរបួសរបស់កីឡាកររូបនេះ ដែលធ្វើឲ្យគេអាចចូលលេងវិញបានក្នុងអំឡុងខែ តុលាឆ្នាំនេះ។

ជាមួយគ្នានេះដែរ កីឡាករខ្សែការពាររបស់ក្លឹបបិសាចក្រហម Eric Bailly កាលពីថ្មីៗ បានបង្ហោះក្នុងបណ្ដាញសង្គម Instagram របស់ខ្លួន ក្នុងន័យសង្ឃឹមថា Zlatan នឹងត្រលប់មកក្លឹបម្ចាស់ជើងឯកលីគអង់គ្លេស ២០សម័យនេះវិញ។ ជាមួយនឹងការដាក់លក់អាវមានឈ្មោះ ខ្សែប្រយុទ្ធចាស់វស្សារូបនេះ របស់ហាងផ្លូវការរបស់ Addidas នៅសហរដ្ឋអាមេរិកថែមទៀត ធ្វើឲ្យពាក្យចចាមអារាមមួយនេះ រឹតតែពុះកញ្ជ្រោល៕

ប្រភព៖ The Sun ប្រែសម្រួល៖ ហ៊ីម រស្មី